Mbaakani Mbotu Yamumwaka Wamulimo Mupya
1. Ino nimbaakani nzi njotweelede kulanga-langa mumwaka wamulimo mupya?
1 Tweelede kulibikkila mbaakani ikuti katuyanda kuyaambele kumuuya. Ino nimbaakani zili buti nzyomwalibikkila nywebo kumugama mumwaka wamulimo mupya? Mbaakani mbotu nkucita bupainiya bwakugwasyilizya kwamwezi omwe naa yobilo. Mbwaanga mulimo ooyu uukkomanisya uyandika kulibambila, ecino nceciindi cibotu cakutalika kulibambila. Nkaambo nzi ncotweelede kulanga-langa mulimo wabupainiya bwakugwasyilizya kuba mbaakani mbotu?
2. Ntwaambo nzi tutupa kubona mulimo wabupainiya kuba mbaakani?
2 Twaambo Tupa Kucita Bupainiya Bwakugwasyilizya: Bupainiya bwakugwasyilizya butupa kuti katukkomanisya Taata wesu wakujulu “kapati” kwiinda mukuyungizya ciindi ncotubeleka mumulimo. (1 Tes. 4:1; NW) Notulanga-langa zintu zyoonse Jehova nzyaatucitila, myoyo yesu ilatukulwaizya kwaambila bamwi kujatikizya nguwe. (Int. 34:1, 2) Jehova ulabona alimwi ulalumba kulyaaba nkotucita kutegwa tucite zinji mumulimo. (Heb. 6:10) Ikuziba kuti tukkomanisya Jehova kwiinda mukubeleka kwesu canguzu kutupa kukkomana.—1 Mak. 29:9.
3, 4. Ino tugwasyigwa buti mukucita bupainiya bwakugwasyilizya?
3 Kanji-kanji, notucita cintu cimwi, cintu eeco cilauba-uba alimwi cilakkomanisya kucicita. Kubeleka ciindi cilamfwu mumuunda kuyoomupa kulimvwa kwaanguluka nomwaambaula abantu amilyango. Muyooba bantu bacibwene kutalisya mibandi akubelesya Bbaibbele. Nomubandika kujatikizya lusyomo lwanu, alwalo luyooyuma. Bantu banji batakali kweendelezya ziiyo zya Bbaibbele bakonzya kutalisya ziiyo nobakali kucita bupainiya bwakugwasyilizya.
4 Bupainiya bwakugwasyilizya bulakonzya kutukulwaizya kululamika nzila imwi yakumuuya njotwatakali kucita kabotu. Mukwesu umwi wakali mupainiya waciindi coonse wakabona kuti wakali kubikkila kapati maano kumulimo wakumubili, aboobo wakayeeya kucita bupainiya bwakugwasyilizya kwamwezi omwe. Wakati: “Ndakagambwa bupainiya bwamwezi omwe buyo mbobwakandiyumya kumuuya! Ndakayeeya kucita bupainiya bwakugwasyilizya cakutaleka, bwalo bwakandipa kuba mupainiya waciindi coonse alimwi.”
5. Ino mbuti mbotukonzya kuzunda mizeezo yakulimvwa kuti inga tiitwacikonzya?
5 Kuzunda Mampindamangobe: Bamwi balakonzya kuwaya-waya kulembya bupainiya bwakugwasyilizya nkaambo kakuti balimvwa kuti tabajisi luzibo lwakukambauka. Ikuti aaka nkakaambo kamupa kutacita bupainiya, Jehova ulakonzya kumugwasya mbuli mbwaakagwasya Jeremiya. (Jer. 1:6-10) Nokuba kuti Musa wakali “mulemu kululimi akumilomo,” Jehova wakamubelesya kuzuzikizya makanze aakwe. (Kul. 4:10-12) Ikuti mulimvwa kuti inga tiimwacikonzya, amumulombe Jehova kutegwa amupe busicamba.
6. Mbuti mbocinga cakonzyeka kucita bupainiya bwakugwasyilizya nokuba kuti kuli mapenzi aakuciswa-ciswa naa kujata bubi?
6 Sena mulawaya-waya kulilembya akaambo kamapenzi aakuciswa-ciswa naa akaambo kakuti mujisi bubi? Ikuti kamuciswa-ciswa, kubeleka kweelana ampomugolela kulakonzya kupa kuti mucikonzye kucita bupainiya bwakugwasyilizya. Ikuti kamujisi bubi, ambweni mulakonzya kusumpya zintu zitayandiki kapati mumwezi uumwi. Bantu bamwi babeleka mulimo wakumubili bakonzya kujana ciindi cakucita bupainiya kwiinda mukulomba buzuba bomwe naa obilo.—Kol. 4:5.
7. Nkaambo nzi ncocigwasya kwaapailila makani aakuyanda kucita bupainiya?
7 Mbomukonzya Kuucita: Amwaapailile makani aakuyanda kucita mulimo wabupainiya bwakugwasyilizya. Amumulombe Jehova kuti akulongezye kusoleka kwanu kwakuyungizya ciindi ncomubeleka mumulimo wanu. (Rom. 12:11, 12) Ulakonzya kumugwasya kusala camaano kujatikizya mbomukonzya kucinca mulongo wanu. (Jak. 1:5) Ikuti kamutajisi luyandisyisyo, amumulombe Jehova kutegwa amugwasye kuba alukkomano mumulimo wakukambauka.—Lk. 10:1, 17.
8. Mbuti kubelesya lugwalo lwa Tusimpi 15:22 mbokukonzya kumugwasya kucita bupainiya bwakugwasyilizya?
8 Amubandike mbaakani yakucita bupainiya bwakugwasyilizya antoomwe mumukwasyi. (Tus. 15:22) Ambweni umwi wamumukwasyi ulakonzya kucita bupainiya bwakugwasyilizya ikuti bamwi bamuŋanda kabamugwasya. Amubandike abamwi mumbungano makanze aanu aakuyanda kucita bupainiya, ikapati amubandike abaabo bajisi bukkale buli mbuli bwanu. Eeci ciyoobakulwaizya kucita bupainiya bwakugwasyilizya.
9. Myezi iili njomunga mwasala kucita bupainiya bwakugwasyilizya?
9 Nomulanga-langa mulongo wanu wamulimo mumwaka wamulimo mupya, ndilili nomunga mwakonzya kucita bupainiya bwakugwasyilizya? Ikuti kamubeleka mulimo wakumubili naa mulaiya, mulakonzya kucita bupainiya nomutaunki kumilimo naa nomwajala zikolo naa mumwezi uujisi mazuba aamu Mujibelo osanwe naa aamu Nsondo osanwe. Mucikozyanyo, myezi ya September, December, March, a August ijisi mazuba aamu Mujibelo osanwe naa aamu Nsondo osanwe. Mwezi wa May ujisi mazuba aamu Mujibelo osanwe alimwi mwezi wa June ujisi mazuba aamu Nsondo osanwe. Ikuti kamuciswa-ciswa, mulakonzya kusala mwezi nokutako mvwula naa mpeyo. Mulakonzya kucita bupainiya mumwezi mulangizi wabbazu naswaya mbungano yanu. Naswaya, muyakuba acoolwe cakujanika mucisela camuswaangano uucitwa abapainiya baciindi coonse. Mbwaanga Ciibalusyo ciyooba mu March 22 mwaka uuboola, March, April a May myezi mibotu yakucita bupainiya ayalo. Mbomwasalila buyo mwezi naa myezi njomuyanda kuyoocita bupainiya bwakugwasyilizya, amutalike kulemba mulongo uuyoomupa kuti mucikonzye kukkwanya mawoola ayandika.
10. Ncinzi ncomunga mwacita ikuti kacitakonzyeki kucita bupainiya bwakugwasyilizya?
10 Nokuba kuti mulimvwa kuti tamukonzyi kucita bupainiya bwakugwasyilizya mumwaka wamulimo uuboola, mulakonzya kuba basungu mumulimo wamumuunda. Amuzumanane kucita kusikila mpomugolela mumulimo, kamusyomede kuti Jehova ulaukkomanina mulimo uucitwa camoyo woonse. (Gal. 6:4) Amugwasye akukulwaizya aabo bakonzya kucita bupainiya bwakugwasyilizya. Ambweni mulakonzya kucinca mulongo wanu kutegwa mutole lubazu mumulimo kwiinda mukuyungizya buzuba bomwe bwansondo abaabo bacita bupainiya.
11. Nkaambo nzi ncotweelede kubindaana?
11 Bantu ba Jehova balizi mbocibindene ciindi. Kuli mulimo uuyandika kucitwa—mulimo wakukambauka makani mabotu. Maumi aabantu ali muntenda alimwi ciindi ciceede nciniini. (1 Kor. 7:29-31) Luyando ndotujisi kuli Leza akuli basimukoboma lulatukulwaizya kubeleka kusikila mpotugolela mumulimo. Kwiinda mukusoleka akulibambila kabotu, tulakonzya kucita bupainiya bwakugwasyilizya kwamwezi omwe mumwaka wamulimo mupya—mbaakani mbotu kapati!