Amukambauke Akupa Bumboni Cakulomya

¹ Jesu mbwali “musolozi asilutwe,” wakabayiisya basikwiiya bakwe kutegwa bakacite mulimo mupati wakukambauka iwakali kumbele. (Is. 55:4; Lk. 10:1-12; Inc. 1:8) Mboobu mwaapostolo Petro mbwaakaupandulula mulimo Jesu ngwaakabapa: “Wakatulailila kuti tukambaukile bantu, tulungulule kuti ngonguwe uwakabikwa Leza kuti abe mubetesi wabaumi abafwide.” (Inc. 10:42) Ino ncinzi cijatikizyidwe mukupa bumboni cakulomya?

² Tulakonzya kwiiya zintu zinji kwiinda mukulanga-langa cikozyanyo camwaapostolo Paulo. Naakaswaangana abapati bamumbungano yamu Efeso, wakabayeezya kuti: “Nsikamusisilide akaniini kumwaambila aamweelede, ndakamwiisya mukati kabantu akunjilauka mumaanda. Ndakali kulungulwida ba-Juda aba-Helene kuti basandukile kuli-Leza, basyome Mwami wesu Jesu Kristo.” Nokuba kuti Paulo wakali mumasukusyo, wakabeleka canguzu kubakambaukila mulumbe mubotu bantu banji. Tanaakagolela buyo akubaambila kasimpe baswiilizi kanjiisyo zyantalisyo, pele wakabeleka canguzu kubaambila “luyando loonse lwa-Leza.” Ikutegwa acikonzye kucita boobu, wakalyaaba kwiinda mukubeleka canguzu. Wakayaambele akwaamba kuti: “Nsilikataazyi neciba comwe azeezi zintu, nsiyeeyi kuti buumi bwangu ncintu pe, ndiyandisisya buyo kuti ndimanizye lweendo lwangu, amulimo oyo ngwendakapegwa ku-Mwami Jesu, kuti ndilungulule Makani Mabotu aaluzyalo lwa-Leza.”—Inc. 20:20, 21, 24, 27.

³ Ino mbuti mbotukonzya kwiiya cikozyanyo ca Paulo mazubaano? (1 Kor. 11:1) Tulakonzya kumwiiya kwiinda mukuyandaula bantu beelede noliba leelyo notuli mubukkale bukatazya, kubasikila bantu bamisyobo yoonse amyaambo yoonse amakani mabotu alimwi akusungwaala kugwasya bantu bajisi luyandisisyo. (Mt. 10:12, 13) Kucita boobo kuyanda ciindi, kubeleka canguzu alimwi akubaa luyando kubantu.

⁴ Sena Mulakonzya Kubeleka Bupainiya Bwakugwasyilizya? Mwezi wa March alimwi a April cilakonzya kumubeda ciindi cibotu cakupa bumboni cakulomya kwiinda mukuba bapainiya bagwasyilizya. Elo kaka cakali kukkomanisya kapati mwaka wamana ikubona bantu banji bakabeleka canguzu mumulimo wabupainiya bwakugwasyilizya!

⁵ Mucizyi umwi uujisi myaka iili 80 alimwi iwakali kuciswa-ciswa wakakulwaizyigwa kapati ambunga ya Jehova. Wakalemba kuti: “Luyando ndweekajisi kwaciindi cilamfwu lwakabukulusigwa eelyo ndakalimvwa kuti kubota alimwi ndacita bupainiya bwakugwasyilizya.” Wakalibikkila mbaakani yakucita bupainiya bwakugwasyilizya mu March. Mboobu mbwakaamba: “Cakusaanguna, ndakakkala ansi kuyeeya ikubona zintu zyakali kuyandika. Ndakamwaambila mwanaangu musimbi makanze aangu mbwaanga ndakali kuyanda kuti andigwasye. Wakandigambya kapati nkaambo awalo wakabweza foomu yakulombela mulimo wabupainiya bwakugwasyilizya.” Mumwezi woonse, mucizyi ooyu uucembeede wakabeleka maola aali 52 mumulimo. “Kwaziindi zinji ndakali kumulomba Jehova kuti abukulusye nguzu zyangu nondakali kuwizuka. Kumamanino aamwezi ndakakkomana citaambiki amoyo wakakkala, alimwi ndakamulumba Jehova ziindi zinji nkaambo wakandigwasya. Ndilombozya kuti nkacite alimwi bupainiya bwakugwasyilizya.” Kweelanaa mbotwamvwa mbwaakakkomana akaambo kakubeleka canguzu, bamwi balakonzya kukulwaizyigwa kubeleka mulimo wabupainiya bwakugwasyilizya nokuba kuti balaciswa-ciswa.

⁶ Sikumulemba mulimo wakapa kuti mukwesu umwi amaninwe mulimo aciindi citayeeyelwi, eeci cakaba nceciindi kumukwesu cakubeleka bupainiya bwakugwasyilizya. Mumwezi ngwaakacita mulimo ooyu, wakaba abusungu kapati mumulimo wabukambausi alimwi kusikila kumamanino amwezi wakatalisya ciiyo ca Bbaibbele cipya. Kayeeya kujatikizya cakuluula eeci, mboobu mbwakaamba: “Elo kaka ndakalongezyegwa mumwezi ooyu!” Elo wakakkomana akaambo kakuti Jehova wakamusololela! Inzya, Jehova wakamutilila zilongezyo zyakwe zitalivwulili akaambo kakuti mukwesu ooyu wakabeleka canguzu mumulimo, alimwi uyoomulongezya andinywe mbubonya.—Malk. 3:10.

⁷ Kuli basikumwaya banji, tacili cuuba-uba pe ikubeleka bupainiya bwakugwasyilizya. Pele nokuba kuti bamwi bajisi mikuli kumulimo, mumukwasyi alimwi abuyumuyumu bumwi bubageme, bakwesu banji alimwi abacizyi bacikonzya kubeleka. Ikanjikanji ikupa bumboni cakulomya kuyandika kwaaba ciindi cesu ciyandika alimwi anguzu, pele zilongezyo zijanika tazikonzyi kweelanisyigwa acintu cimwi.—Tus. 10:22.

⁸ Mwezi wa March alimwi a April ziindi zibotu zyakubeleka bupainiya bwakugwasyilizya. Mwezi wa March ulijisi nsondo zili musamu. Ikubelesya ciindi cakumamanino aansondo alimwi aziindi zyakumangolezya kulakonzya kubagwasya bamwi ibalembedwe milimo kuti bakonzye kubeleka bupainiya bwakugwasyilizya. Kunze lyaboobo, mulakonzya kwaabelesya mazuba aakulyookezya mumwezi wa April. Bamwi balakonzya kubelesya mazuba ngobapedwe aakutajanika kucikolo alimwi akumulimo wakumubili, alo ngobakonzya kubelesya kukkwanya mawoola aali 50 aayandika. Ikutegwa mube abubambe bwakukkwanya mawoola aali 50 mumulimo mumwezi wa March alimwi a April, sena inga mwabelesya umwi wamilongo yamawoola aabupainiya bwakugwasyilizya ibikkilizyidwe mucibalo eeci? Amubaambile mulongo wanu mbuubede ibamumukwasyi naa basikumwaya bamwi; cakutadooneka bamwi baya kuyanda kumusangana mumulimo. Ikuti kamutacikonzyi kucita bupainiya bwakugwasyilizya, amubikke mbaakani zigaminide mumyezi eeyi, alimwi akubeleka abaabo ibakonzya kucita bupainiya. Amutalikile limwi kucita bubambe kutegwa mukabe aciindi cinji cakukambauka mu March alimwi a April.

⁹ Amulumbe Kubaa Bubambe bwa Ciibalusyo: Mwaka amwaka ciindi ca Ciibalusyo, ikulumba nkutucita akaambo kacinunuzyo kupa bantu banji ‘ikujana ciindi’ cakubeleka bupainiya bwakugwasyilizya. (Ef. 5:15, 16) Mwaka wamana mu Zambia, kwakali bapainiya bakugwasyilizya mu March ibali 6,462 eelyo mu April bakali 7,551. Eeci caamba kuti mweelwe waakati-kati mumyezi eeyi yobile wakali 7,006. Ooyu mweelwe waatala kapati kwiinda mweelwe waakati wa 2,313 wabaabo babeleka bupainiya bwakugwasyilizya mumyezi eeyi iimwi yainda yamwaka wamulimo. Ciindi eeci ca Ciibalusyo nciindi cimbi citaliboteli cakulumba kwesu camoyo woonse akaambo kacipaizyo cacinunuzyo ca Kristo kwiinda mukuyungizya ciindi cesu mulimo wamumuunda.

¹⁰ Mbobuyaabuswena buzuba bwa April 16, amuzinzibale kuyeeya ncocaamba Ciibalusyo kulindinywe. Amuyeeye zintu zyakasololela kulufwu lwa Kristo azintu nzyaakabikkide kapati maano mumizeezo alimwi amumoyo. Alimwi amuyeeye lukkomano ndwaakali kulangila Jesu ambolwakamugwasya kutegwa aliyumye naakali kupenzyegwa. Amuyeeyesye mulimo ngwajisi lino mbwali Silutwe wambungano, iweendelezya mulimo wabukambausi alimwi akugwasya bantu kuba basikwiiya. (1 Kor. 11:3; Heb. 12:2; Ciy. 14:14-16) Mpoonya mulakonzya kulumba kuzintu zyoonse Kristo nzyaakacita kwiinda mukutola lubazu kusikila aagolela nguzu zyanu mumulimo wabukambausi kweelanaa bukkale bwanu.

¹¹ Amubakulwaizye Bamwi Kucita Bumboni Cakulomya: Kwiinda mukutola lubazu mumulimo wabupainiya bwakugwasyilizya, baalu alimwi abakutausi balijisi coolwe citaliboteli cakukulwaizya bamwi. Eelyo nobabeleka abasikumwaya mumulimo wamumuunda alimwi aciindi nobacita nyendo zyabweembezi, balijisi ciindi citaliboteli cakugwasya bamwi kuti batole lubazu kapati mumulimo ooyu uulibedelede. Toonse atucibikke mumupailo alimwi akukulwaizyanya mukupa bumboni cakulomya.

¹² Nokuba kuti baalu boonse alimwi abakutausi bayoobelekela antoomwe abubambe bwambungano mukubeleka canguzu mumwezi wa March alimwi a April, ikapati mulangizi wamulimo nguweelede kubikkila maano mukubamba bubambe buyandika bwamulimo wabukambausi. Weelede kubamba masena kwakucitila miswaangano yamumulimo wamumuunda, mazuba aakuswaangana, kubikka ciindi ceelede kuli basikumwaya banji kuti batole lubazu alimwi akubona kuti ziindi, masena alimwi amazuba zilaambilizyigwa lyoonse ilya Muswaangano Wamulimo. Bubambe bulakonzya kubambwa bwakuswaangana ziindi zisiyene-siyene mubuzuba kutegwa boonse mumbungano bajane coolwe cakutola lubazu muzibeela zisiyene-siyene zyabukambausi. Zibeela eezi zilakonzya kubikkilizya mumasena aamakwebo, bukambausi bwamumugwagwa, kuunka kuŋanda aŋanda, kucita nyendo zyakupilukila alimwi abukambausi bwaaluwaile. Kunze lyaboobo, weelede kubambila limwi mabbuku manji, mamagazini alimwi acilawo ceelede kwaakukambaukila mumyezi eeyo.

¹³ Ibbuku lyakumwaya mu March ndibbuku lya Luzibo, tweelede kuti katujisi mbaakani yakutalisya ziiyo zya Bbaibbele. Inzila zibotu zikonzya kubelesegwa kumwaya bbuku lya Luzibo zilajanika mupepa lyamukati lya Mulimo Wesu Wabwami wamu January 2002. Mu April kuyoomwaigwa mamagazini aa Ngazi Yamulindizi alimwi a Galamukani! Amusole kubelesya nzila zipedwe mukabeela kakuti, “Nzyomweelede Kwaamba Kujatikizya Mamagazini.” Boonse beelede kujana ciindi cakulibambila kabotu kutegwa bape bumboni cakulomya.

¹⁴ Elo tulilongezyedwe kapati kaka kubeleka mubusolozi bwa Silutwe wambungano Jesu Kristo alimwi akubaa coolwe cakwaambila bamwi makani mabotu! Mbotuyaabuswena afwaafwi kumwezi wa March alimwi a April, atubeleke canguzu kutegwa myezi eeyi tuzwidilile kwiinda yoonse mukutobela kulailila kwa Kristo kwakuti tukambauke alimwi akupa bumboni cakulomya.

Kabbokesi kali apeeji 4]

Milongo Iindene-indene ya Bupainiya Bwakugwasyilizya mu March Alimwi a April 2003

Buzuba Mawoola

Muhhulo 1 2 — — 2 —

Bwabili1 1 — 3 — — —

Bwatatu 1 2 — 5 — —

Bwane 1 — 3 — — —

Bwasanu 1 2 — — — —

Mujibelo 5 4 3 5 6 7

Nsondo 2 2 3 2 2 3

March 56 56 54 55 50 50

April 50 50 51 53 — —

Sena kuli mulongo umwi akati kayeeyi ngomukonzya kubelesya?