Amuzumanane Kwaamba Bubotu Bwamilimo ya Jehova Iigambya

1. Ino mmilimo nzi imwi ya Jehova iigambya iimukkomanisya kapati?

¹ Kunyina muntu uukonzya kukozyanisyigwa a Leza wesu mupati, Jehova! Davida wakalemba kuti: “Nzinji loko nzowakacita, O Jehova Leza wangu, nkokuti malele aako amakanze aako kulindiswe; taakwe uukonzya kukozyanizigwa ayebo.” (Int. 40:5) Imilimo ya Jehova iigambya ilabikkilizya akulenga julu alimwi anyika, Ibwami bwabu Mesiya, imilimo yaluzyalo kubantu bakwe alimwi akukambauka makani mabotu munyika yoonse. (Int. 17:7, 8; 139:14; Dan. 2:44; Mt. 24:14) Iluyando ndotujisi kuli Jehova alimwi akulumba kuzintu zyoonse nzyaatucitila, kutukulwaizya kwaambila bamwi kujatikizya nguwe. (Int. 145:5-7) Mumyezi ya March, April alimwi a May, tuyooba acoolwe cakutola lubazu kapati.

2. Ino mbuti mbotugwasyigwa kwiinda mukucita bupainiya bwakugwasilizya?

² Kamuli Mupainiya Wakugwasilizya: Sena inga mwacita bubambe kutegwa mukatole lubazu kwamawoola aali 50 mumulimo kwamwezi omwe naa kwiinda waawo mumyezi eeyi? Camasimpe, kufwumba kucinca nkomuyoocita, kuyoomuletela mpindu. (Ef. 5:16) Ibanji bazyiba kuti ikucita bupainiya bwakugwasilizya kulagwasya ikuubeleka kabotu mulimo wabo. Baba bantu baangulukide nobakanana abantu alimwi balalibelesya kapati Bbaibbele. Ikutola ciindi cilamfwu mumulimo kupa kuti cuube-ube ikubatobela aabo batondezya luyandisisyo mbobajana. Alimwi ibamwi ibatakajisi ciiyo ca Bbaibbele musyule baba aciiyo comwe kwiinda mukucita bupainiya bwakugwasilizya. Akaambo kakuti ikucita bupainiya bwakugwasilizya kubikkilizya ikugwasya bantu cabusungu, mmulimo uuletela lukkomano.—Inc. 20:35.

3. Ino mbuti bamwi mbobacikonzya kucita bupainiya bwakugwasilizya nokuba kuti bukkale bwabo mbuyumu?

³ Mutafwambaani ikwaamba kuti tamukonzyi kucikonzya kucita bupainiya bwakugwasilizya akaambo kakuti ibukkale bwanu tabumuzumizyi kutola lubazu. Imwaalu umwi walo wakacita bupainiya mwakali uli abana bobile alimwi ulabeleka mulimo wakumubili. Ino mbuti mukwesu ooyu uujisi bubi mbwaakacikonzya? Mbwaanga ulabeleka kutalikila mu Muhulo kusikila mu Cisanu, wakacita bubambe bwakubeleka mumulimo buzuba boonse kumamanino aamvwiki, ikutalika abukambausi bwamumugwagwa aciindi ca 7:00 hrs mu Mujibelo. Ibanji bakajisi bukkale buli boobo bakacita bupainiya bwakugwasilizya, eelyo bakagwasyanya alimwi akukulwaizyanya. Mumbungano imwi, imucizyi ulaamyaka iili 99 wakayeeya kuti acite bupainiya mu May mwanaakwe musimbi naakamulomba kuti amusangane. Ibambi mumbungano bakamugwasya imucizyi ooyu uucembeede ikuunka kumulyango amulyango alimwi akuziiyo zya Bbaibbele kwiinda mukumukuba acuuno camavwili. Alimwi wakacita bukambausi bwaaluwaile, bwamumugwagwa alimwi abukambausi kwiinda mukulemba magwalo. Ulisinizyide kuti mulimo ooyu wakacitwa ikutali munguzu zyakwe pe, pele buyo munguzu zya Jehova.—Is. 40:29-31.

4. Ino nzintu nzi nzyotweelede kulanga-langa notubamba mulongo wazintu zyakucita notuyanda kucita bupainiya bwakugwasilizya?

⁴ Amusole kulemba mulongo wazintu zyakucita ooyo uunga weelela kweelana abukkale bwanu. Izikozyanyo zyamilongo yakucita zibikkilizyidwe inga zyagwasya. Sena mulabeleka mulimo wakumubili naa mucili kucikolo? Ambweni mulongo wakubeleka buyo kumamanino aamvwiki nguunga wamugwasya kapati. Ikuti buumi bwanu kabutali kabotu alimwi kamutajisi nguzu cakuti tamukonzyi kubeleka kwaciindi cilamfwu mumulimo, imulongo uukonzya kumuzumizya buyo kutola ciindi cisyoonto abuzuba inga wagwasya. Amwaambile bamwi kujatikizya mbomuyandisya kucita bupainiya bwakugwasilizya. Ambweni abalo ngamakanze ngobajisi.

5. Ino nimbaakani nzi bakubusi nzyobanga bacita mu March, April alimwi a May?

⁵ Mbobanga Batola Lubazu Bakubusi: Jehova ulakkomana ibana nobaambilizya milimo yakwe iigambya. (Int. 71:17; Mt. 21:16) Ikuti kamuli bana alimwi kamubbapatizyidwe, ambweni mulakonzya kucita bupainiya bwakugwasilizya mumwezi ooyo nozijalidwe zikolo. Ikuti kamutakonzyi kucita bupainiya bwakugwasilizya, sena tamukonzyi kuba ambaakani iigaminide kwiinda mukuyaambele mukutola lubazu mumulimo mumyezi eeyi? Ikuti kamuli mwakali kutola lubazu abazyali banu mumulimo, pele tamunaba basikumwaya babbapatizyidwe, ecino nceciindi cibotu cakuti mweelele. Tamweelede kulimvwa kuti muyandika kuti kamujisi luzibo lunji lwakwiingula mibuzyo yamu Bbaibbele naa kuzyiba mbubonya mbobazyi aabo bapati babbapatizyidwe. Sena mulaziteelela njiisyo zya Bbaibbele zyantalisyo? Sena mulazitobela zyeelelo zya Bbaibbele zyakulilemeka? Sena mulayanda kuzyibwa kuti muli umwi wa Bakamboni ba Jehova? Amubaambile bazyali banu kujatikizya makani aaya. Inga bacita bubambe bwakuti babone baalu andinywe kamuliko ikubona naa muleelela.—Amubone bbuku lya Mulimo Wesu amapeeji 98-9.

6. Ino mbuti mbotukonzya kugwasya basikwiiya Bbaibbele kuti babe basikumwaya bamakani mabotu?

⁶ Ikugwasya Bamwi Ikukambauka: Basikwiiya Bbaibbele bayaambele balakonzya kweelela kuunka andiswe kabali basikumwaya mumyezi iiboola lyamilimo iilibedelede. Ikuti kamujisi sikwiiya Bbaibbele uuyaambele kabotu, amujane lugwasyo kuzwa kumulangizi weendelezya ciiyo cabbuku naa mulangizi wamulimo. Umwi wabaaba inga mwaunka limwi kuciiyo ikutegwa akabone sicikolo mbwayaambele. Ikuti sicikolo keelela alimwi kayanda kuba sikumwaya, mulangizi weendelezya ulakonzya kucita bubambe bwakuti baalu bobile bakamubone sicikolo andinywe kamuliko. (Amubone Ngazi Yamulindizi yamu Chichewa ya November 15, 1988, apeeji 17.) Mbwayoozumizyigwa sikwiiya, amutalike kumuyiisya mumulimo mpoonya-mpoonya.

7. Ino mbuti basikumwaya aabo basotauka-sotauka abaabo ibakacilekela limwi mumulimo mbobakonzya kugwasyigwa?

⁷ Ibalangizi baziiyo zyabbuku beelede kupa lugwasyo lulibedelede kuli baabo basotauka-sotauka alimwi abaabo bakacilekela limwi kuunka mumulimo bali mukakamu kakwe. Amubalombe kuti mukabeleke ambabo mumulimo. Ikuti basotauka-sotauka kwaciindi cilamfwu, icakusaanguna inga cabota kuti baalu bobile baambaule ambabo ikubona naa baceelela. (Amubone Kabbokesi Kamubuzyo mu Mulimo Wesu Wabwami wamu November 2000.) Ibusungu mumbungano mumyezi eeyi lyamilimo iilibedelede, buyoobakulwaizya kutola lubazu lyoonse alimwi mumulimo.

8, 9. Ino ncinzi baalu ncobeelede kucita ikutegwa babakulwaizye bantu kumulimo uulibedelede?

⁸ Amulibambile Lino Ikuyungizya Mulimo: Nobaalu, amutalike lino kukulwaizya mbungano kutegwa bakacite bupainiya bwakugwasilizya. Mulakonzya kucita kabotu kwiinda mukubakulwaizya nomukanana alimwi akuba cikozyanyo cibotu. (1 Pet. 5:3) Ino mweelwe waatala wabapainiya bakugwasilizya mumbungano musyule wakali buti? Sena mweelwe ooyo mulakonzya kuwiinda mwaka uuno? Balangizi baziiyo zyabbuku alimwi abaabo babagwasilizya, beelede kubona mbobanga babakulwaizya boonse bali mukakamu kabo kutegwa bayungizye mulimo wabo. Balangizi bamulimo balakonzya kucita bubambe abumbi bwamiswaangano yakuunka mumulimo wamumuunda. Amuyaambile mbungano kakucili ciindi kujatikizya bubambe bwacitwa. Amubone kwaamba kuti basikumwaya beelela mbabapegwa mukuli wakusololela akuti miswaangano yakuunka mumulimo kiitalika alimwi akumana muciindi. (Amubone Kabbokesi Kamubuzyo mu Mulimo Wesu Wabwami wamu September 2001.) Alimwi imulangizi wamulimo weelede kucita bubambe bwakuti kakuli cilawo cipati cakukambaukila, mamagazini alimwi amabbuku.

⁹ Mumbungano imwi mwakali, ibaalu bakatalika cabusungu alimwi kakucili ciindi kukulwaizya kucita bupainiya bwakugwasilizya, ibunji bwambabo bakalilembya. Bakacita bubambe abumbi bwakuunka mumulimo wamumuunda—bwakusaanguna aciindi ca 5:30 hrs ikucita bukambausi bwamumugwagwa, bwabili aciindi ca 15:00 hrs kuli baabo bazwa kucikolo, alimwi ibwatatu aciindi ca 18:00 hrs kuli baabo bakotoka kumilimo. Kunze lyaboobo, imiswaangano yotatwe yakuunka mumulimo wamumuunda yakali kucitwa mu Mujibelo. Ibantu bakalilembya mumbungano ikucita bupaniya bwakugwasilizya bakasika ku 66 mu April!

10. Ino mbuti mikwasyi mboinga yalibambila kuyungizya milimo yabo?

¹⁰ Ino nkaambo nzi ncomutabikki ciindi ambali nomuyoocita ciiyo camukwasyi citobela ikutegwa mukalibikkile mbaakani mumyezi iiboola? Ikwiinda mukubelekela antoomwe alimwi akulibambila, ibamwi naa boonse mumukwasyi balakonzya kucita bupainiya bwakugwasilizya. Ikuti eeco kacitakonzyeki, amube amakanze akutola ciindi cilamfwu mumulimo kwiinda mbumwali kucita musyule naa kwiinda mukuunka mubukambausi lyoonse. Amwaapailile makani aaya mumukwasyi. Mulakonzya kusyoma kuti Jehova uyookuleleka ikusoleka kwanu.—1 Joh. 3:22.

11. (a) Ino mmulimo nzi mupati icituuzyo ca Kristo ngocakazuzikizya? (b) Ino nciindi nzi mbungano yanu noiyoocita Ciibalusyo alimwi nkuukuli nkociyoocitilwa?

¹¹ Mulimo wa Leza Wiinda Kugambya: Icitondezyo ca Jehova caluyando ciinda zyoonse ncipego ca Mwanaakwe kali cinunuzyo cesu. (1 Joh. 4:9, 10) Icituuzyo cacinunuzyo nenzila yamumulawo yakufwutula bantu kucibi alufwu. (Rom. 3:23, 24) Ibulowa bwa Jesu bwakatilwa bwakasinizya cizuminano cipya, bwakapa kuti cikonzyeke kubantu batalondokede kuba bana ba Leza ibajisi bulangizi bwakuyoolela mu Bwami bwakujulu. (Jer. 31:31-34; Mk. 14:24) Ikaambo kapati nkakuti, inzila Jesu njaakamutobela cakulondola Jehova, yakasalazya zina lya Jehova. (Dt. 32:4; Tus. 27:11) Mu Nsondo mu April 4 lyaakubbila izuba, kuyoocitwa Ciibalusyo calufwu lwa Kristo nyika yoonse.

12. Ino mbuti kujanika ku Mulalilo wa Mwami mbokugwasya baabo bajisi luyandisisyo kukasimpe?

¹² Ikwiibaluka Mulalilo wa Mwami kusumpula milimo ya Jehova iigambya. Makani aabandikwa atupa kumvwisya akulumba ceeco Jehova ncaakacita kwiinda mukupa cinunuzyo. Aabo bajisi luyandisisyo banooliko, bayooyibona milimo ya Leza iimbi iigambya. Bayoobona lukamantano alimwi akusamausya kwaluyando lwa Jehova ndwayiisya bantu bakwe kuti balutondezye. (Ef. 4:16, 22-24; Jak. 3:17, 18) Ikujanika kumuswaangano ooyu uuyandika kapati kuli mbokwiijatikizya miyeeyo yamuntu. Aboobo tuyanda kuti bantu banji bakajanike.—2 Kor. 5:14, 15.

13, 14. Ino mbaani mbotweelede kutamba ku Ciibalusyo, alimwi tuyoobatamba buti?

¹³ Ikutamba Bambi Kuti Bakajanike: Amutalike ndilyonya lino kulibambila kwiinda mukulemba mulongo wamazina abaabo mbomuyootamba. Imulongo wanu ulakonzya kubikkilizya abamumukwasyi batali bakamboni, basimukobonyoko, mbomubeleka limwi kumilimo naa mbomwiiya limwi kucikolo, mbomwakali kuyiisya Bbaibbele musyule ambomuyiisya lino alimwi aboonse nkomwakapilukila. Balangizi baziiyo zyabbuku beelede kubikkilizya mumulongo wabo abaabo basikumwaya bakacilekela limwi kutola lubazu mumulimo.

¹⁴ Mukulwaizyigwa kuti mukatambe bantu banji mbuli mbomukonzya. Ibuzuba bwa April 4 mbobuyaabulondelela, amubayeekezye aabo bali amulongo kwiinda mukubaswaya antela kubaumina luwaile.

15. Ino mbuti mbotunga twabasamausya bantu imangolezya lya Mulalilo?

¹⁵ Ku Ciibalusyo: Imangolezya liyoocitwa Ciibalusyo, amukasoleke kusika kakucili ciindi. Amube bantu basamausya kwiinda mukubaanzya cakusangalizya aabo bapya. (Rom. 12:13) Mulijisi mukuli uulibedelede wakulanganya baabo mbomwatamba. Amubagwasye kutegwa balimvwe kuti batambulwa camaanza obile, amubazyibye kubantu abambi bamumbungano. Ambweni inga mwabagwasya kukkala munsi lyanu. Alimwi ikuti umwi katajisi Bbaibbele naa lwiimbo, amubale naa kwiimba antoomwe antela amulombe umwi wakuti bakkale limwi. Camana buyo ciibalusyo, amube ambabo kutegwa mwiingule mibuzyo njobakonzya kuba anjiyo. Ikuti bamwi kacili ciindi cakusaanguna, amubabuzye naa balayanda kwiiya zinji kujatikizya Jwi lya Leza alimwi amakanze aakwe. Amubaambile kuti inga mweendelezya ciiyo ca Bbaibbele caaŋanda kuli mbabo.

16. Ino ncinzi ceelede kucitwa ikutegwa tugwasye baabo bakajanika ku Mulalilo ikutegwa bayaambele kumuuya?

¹⁶ Amuzumanane Ikugwasya Baabo Bayoojanika: Mumvwiki ziyootobela waakumana Mulalilo, aabo bakajanika bayooyandika lugwasyo alumbi. Eeci cijatikizya baabo bakali kuswaangana lyoonse musyule, pele lino bataciswaangani lyoonse ambungano. Ibaalu beelede kupakamana ikubona kwaamba kuti bantu bali boobu tiibalekelezyegwa. Bayooyanda kuzyiba cakabapa kuti baleke kuyaambele kumuuya. Amubakulwaizye ikubona ciindi mbociyaabumana. (1 Pet. 4:7) Amubagwasye boonse babone bubotu bwakutobela kulailila kwa Magwalo kwakuswaangana lyoonse abantu ba Leza.—Heb. 10:24, 25.

17. Ino nkaambo nzi ncotweelede kuzumanana kwaambila bantu zyamilimo ya Jehova iigambya?

¹⁷ Imilimo ya Jehova tatukonzyi kwiimvwisya nokuba kuti twapona kukabe kutamani. (Job. 42:2, 3; Muk. 3:11) Aboobo, tatukabulilwi zintu zyakumutembauda Jehova. Muciindi eeci ca Ciibalusyo, tulakonzya kutondezya kulumba kwesu kuli Jehova akaambo kamilimo yakwe iigambya kwiinda mukuyungizya ciindi cakuunka mumulimo.

Ccaati iili apeeji 5]

Sena Inga Mwacita Bupainiya Bwakugwasilizya Kubelesya Mulongo Umwi Ali Yeeyi?

March Nso Muh* Bwab* Bwat* Bwan Bwas Muji Mwezi Oonse

Abuzuba 2 1 1 1 1 1 5 51

Mazuba Obile 0 5 0 5 0 0 0 50

Mujibelo amu

Nsondo Mwalikke 5 0 0 0 0 0 8 52

April Nso Muh Bwab Bwat Bwan* Bwas* Muji Mwezi Oonse

Abuzuba 2 1 1 1 1 1 5 50

Mazuba Obile 0 0 0 0 5 5 0 50

Mujibelo amu

Nsondo Mwalikke 5 0 0 0 0 0 8 52

May Nso* Muh* Bwab Bwat Bwan Bwas Muji* Mwezi Oonse

Abuzuba 2 1 1 1 1 1 4 51

Mazuba Obile 0 5 0 0 0 0 5 50

Mujibelo amu

Nsondo Mwalikke 3 0 0 0 0 0 7 50

* Osanwe amwezi