“Atucitile Bantu Boonse Milimo Mibotu”
1 ‘Lungulula Makani Oonse aa Leza’ alimwi ‘Amube Bavwubi Mukucita Milimo Mibotu’ eeyi yakali njemitwe yakabelesyegwa mumapepa aamukati aa Mulimo Wesu Wabwami mu February alimwi amu March 2002. (Kol. 1:25; 1 Tim. 6:18) Muzibeela eezyi, twakakulwaizyigwa kubeleka canguzu ikugwasya baabo batondezya luyandisisyo kutegwa bakajanike ku Ciibalusyo akugwasya batacisungweede kutegwa batalike alimwi kutola lubazu mumbungano alimwi akugwasya bana besu ikuti basike azyeelelo ziyandika akuba basikwiiya Bbaibbele akutalika kukambauka makani mabotu. Tacidoonekwi buya kuti twakazwidilila akaambo kakubeleka canguzu. Lino “nitujisi ciindi cibotu, [atuzumanane kucitila] bantu boonse milimo mibotu.”—Gal. 6:10.
2 Amubatambe Kuti Alimwi Bakajanike: Mucilawo ceendelezyegwa amutabi wamu Zambia, ibantu bainda ku 300,000 ibatali basikumwaya bamakani mabotu, balajanika ku Ciibalusyo amwaka. Mbwaanga balajanika, eeci citondezya kuti balijisi luyandisisyo, ino mbuti mbotunga twacita kutegwa tubagwasye aabo “basalidwe buumi butamani” akuti babe ‘basyomi’? (Inc. 13:48) Amubakulwaizye cakufwambaana kuti kababoola kumiswaangano yambungano.
3 Ino ma mulekela nzi kubatamba aabo batondezya luyandisisyo ku Ciiyo Cabbuku Cambungano kutegwa bakalimvwide ciiyo cibotu cabbuku? Ikuti naa kamuli bamukowa naa balongwe bamuntu ooyo uujisi luyandisisyo, alimwi akuti naa mulaamakani buzuba bumwi Mucikolo Camulimo Wateokrasi, mulakonzya kumutamba kutegwa akaswiilile mbomuya kwaakanana makani aanu. Amumwaambile mitwe yamakani aabuleya iyakukananwa musondo zyitobela. (Pepa lyamulongo lijisi makani lyeelede kubikkwa abboodi lyamakani.) Amujane ciindi cibotu cakukanana anguwe kutegwa luyando lwakwe lwakukomba Jehova mulubusye alimwi. Alimwi ikuti naa katanatalika kwiiya Bbaibbele amuntu umwi mumbungano, mulakonzya kutalika kwiiya anguwe.
4 Kamuzumanana Kubayumya-yumya Batacisungweede: Bunji bwabaabo bajanika ku Ciibalusyo bakalyaaba kale kuli Jehova. Nokuba boobo, nokwakainda ciindi, bakacileka kukambauka makani mabotu. Aboobo, Paulo wakatukulwaizya kuti, “[atucite] milimo mibotu . . . kwaambisya kulibaabo baciinga calusyomo.” (Gal. 6:10) Pele aabo batacisungweede mbotweelede kubikkila maano kapati.
5 Kulibonya kuti bamwi bakazumina kale akaambo kakukulwaizyigwa abaalu alimwi abamwi akutalika kuya mumulimo alimwi. Ikuti naa baalu bamupa kuti mugwasye basikumwaya bakulwaizyigwa kutola lubazu mumulimo, amuzyibe kuti luyando lwanu kuli Jehova alimwi akumulimo wamumuunda, luya kumupa kuyumayuma sikumwaya ooyo. Amumutondezye mbuli mbomucikonzya kutola lubazu mumbazu ziindenyi-indenyi zyamulimo kutegwa awalo abe alukkomano akuzumanana mumulimo wakukambauka akubona bulumbu Jehova mbwapa.
6 Amubatalisye Kabotu Basikumwaya Bapya: Iciindi mukaintu mupya wakajisi luyandisisyo naakabona kuti waijana mbunga ya Leza yakasimpe, wakali kuyanda kutalika mpoonya-mpoonya kukambauka. Naakamana kuyiisyigwa zyaakali kuyandika, wakati: “Ndiyanda kuti nditalike mpoona aawa.” Ikuti muntu ngomwakali kwiiya limwi Bbaibbele wazumizyigwa kutola lubazu mumulimo, amumugwasye kuti “atalike mpoonya aawo kakunyina kusowa ciindi,” eelyo amumutalisye kabotu sikumwaya mupya. Amumugwasye kuba acilengwa cibotu cakulibambila alimwi akutola lubazu mumulimo wamumuunda ansondo.
7 Ikuti kali mwana wanu waba sikumwaya uutana bbapatizyigwa, amubeleke anguwe kutegwa aye ampela kweelena aciimo cakwe alimwi anguzu zyakwe. Kwiinda mulugwasyo lwanu lusyoonto buyo, cilakonzya kumulamya kubona mbuli mbwakonzya kutalika kubandika amuntu, kumubalila Bbaibbele alimwi akumwaabila bbuku. Iciindi naajana muntu uujisi luyandisisyo mumuunda, amumuyiisye mbokucitwa nyendo yakupilukila akumubona muntu ooyo.
8 Amuyungizye Ciindi Ncomutola Mumulimo Wanu: Sena inga mwacikonzya kuyungizya ciindi cakutola lubazu mumulimo wakukambauka mumyezi iiboola cainda Ciibalusyo? Sena inga tamukonzyi kuyungizya woola lyomwe naa obilo ansondo kumawoola aayo ngomutola mumulimo? Sena mulalanga akkalenda akubona ciindi nomuya kucita bupainiya bwakugwasyilizya alimwi? Antela sena mulakonzya kubulanga-langa bukkale bwanu kutegwa mukonzye kunjila mulimo waciindi coonse? Elo kaka ooko kusoleka nkotucita mumulimo kulakonzya kumugwasya muntu kutambula kasimpe! (Inc. 8:26-39) Mbotulangila mazuba aazya kumpela, tweelede “[ku]yandaula kucita kabotu, naaba akati kanu nobeni nikuba kubantu boonse.”—1 Tes. 5:15.
[Kabbokesi kali apeeji 3]
Kamuzumanana Kubagwasya:
□✔ Bajanika ku Ciibalusyo
□✔ Basikumwaya Bakakulwaizyigwa Kutola Lubazu Mumulimo Alimwi
□✔ Basikumwaya Bapya Batabbapatizyidwe