Atube Basungu Kuzintu Zibotu!
1 Mbotwanjila muciindi ca Ciibalusyo camu 2003, tulijisi twaambo tunji ncotweelede ‘kusungwaalila zintu zibotu.’ (1 Pet. 3:13) Ikaambo kapati akati katwaambo toonse ootu nkacinunuzyo cacipaizyo ca Jesu Kristo. (Mt. 20:28; Joh. 3:16) Kujatikizya makani aaya, imwaapostolo Petro wakati: “Teensi zintu zikulumpala, mbuli insiliva niiba ingolida, nzimwakanunuzigwa kukweenda kwanu kwabuyo. . . . Mwakanunuzigwa abulowa buyandisi mbuli bwamwanambelele uutajisi akampenda nanka kabala, nkokuti bulowa bwa-Kristo.” (1 Pet. 1:18, 19) Ikulumba akaambo kaluyando oolu lulibedelede kutukulwaizya kujata bubi mukucita milimo mibotu, akuzyiba kuti Jesu “wakalyaaba kuti atununune kububi boonse akutusalazya kuti tube bantu bakwe bankutwe mukucita milimo yoonse mibotu.”—Taita. 2:14, Ci; 2 Kor. 5:14, 15.
2 Ciindi notucita zintu zimubotela Leza, tulaba balongwe bakwe babotu alimwi ulatulanganya caluyando. Petro wakayaambele akwaamba kuti: “Uuyandisya kubona buumi, akulijanina mazuba mabotu, . . . aleye kububi, acite kabotu. Ayandaule luumuno akulutobela. Nkaambo meso aa-Jehova ali kubaluleme, amatwi aakwe alijukide kukukomba kwabo.” (1 Pet. 3:10-12) Mumazubaano aazwide mapenzi, masimpe ncilongezyo kuzyiba kuti Jehova ulatukwabilila alimwi ulilibambilide kutugwasya, ‘ikuti atubambe mbuli imboni yaliso.’—Dt. 32:10; 2 Mak. 16:9.
3 Nokuba kuti bakali mumapenzi, Banakristo bakusaanguna mbaakalembela mwaapostolo Petro bakalijisi busungu bwatakali kukonzya kumanizyigwa, alimwi bakaambilizya makani mabotu kusikila mpobagolela. (1 Pet. 1:6; 4:12) Ncimwi buyo abantu ba Leza sunu. Nokuba kuti tukkede ‘muziindi zikatazya,’ ikulumba bubotu bwa Jehova kutupa kuti tusungwaale kucita milimo ya Leza. (2 Tim. 3:1; Int. 145:7) Atulange-lange imwi milimo mibotu njotweelede kucita cabusungu muciindi eeci ca Ciibalusyo.
4 Amubatambe Bantu ku Ciibalusyo: Inzila imwi njotukonzya kutondezya kulumba kucipego cilibedelede cacinunuzyo, nkwiinda mukujanika mukwiibaluka lufwu lwa Jesu kucitwa mwaka amwaka. Ciibalusyo camwaka uuno ciyoocitwa muli Bwatatu mu April 16 lyaakubbila buyo zuba. (Lk. 22:19, 20) Mwaka wamana, kweelana ambungano zili 94,600 zyakapa lipooti munyika yoonse, boonse bakajanika bakali 15,597,746! Bantu bali 220,000 bakayungizyigwa kwiinda aali baabo ibakajanika mumwaka wa 2001.
5 Ino mbangaye bantu ibayoojanika mwaka uuno? Eeci ciya kuyaama kapati abusungu bwesu mukukulwaizya bantu kuti bakabungane antoomwe andiswe. Amutalike kwiinda mukulemba mulongo wabantu boonse mbomuyanda kuti mukatambe. Kumatalikilo kwamulongo, mweelede kulemba bamumukwasyi wanu. Ikuti kamukwetene amuntu uutasyomi, amumwaambile mbomuyandisisya kuti akajanike antoomwe andinywe. Mulumi umwi uutasyomi wakaamba kuti wakajanika mwaka wamana ku Ciibalusyo akaambo kakuti wakabona mbuli mukaintu wakwe mbwaakali kuyandisya kuti awalo ajanike. Ibeelede kutobela mumulongo wanu mbasazinyoko, basimukubonyoko, mbomubeleka limwi naa mbomwiiya limwi. Amubone kuti mwabatamba bantu mbomwiiya limwi Bbaibbele.
6 Mwamana kulemba mulongo wanu, amusale ciindi cakutamba umwi aumwi uuli mumulongo. Amubapandulwide kabotu buzuba alimwi abusena nkociya kucitilwa Ciibalusyo. Mbobuyaabuswena buzuba bwa April 16, amubayeezye boonse ibali mumulongo wanu, kwiinda mukubaswaya naa mukubaumina luwaile. Atubagwasye bantu banji kuti bakajanike kucilengwa eeci cisetekene kapati.
7 Amubagwasye Aabo Ibajanika ku Ciibalusyo: Mangolezya aabuzuba bwa Ciibalusyo lyoonse mabotu kapati. Tulijisi coolwe cakubatambula bantu ibatajaniki-janiki kumiswaangano yesu. Amulibambile kuyoofwambaana kusika kubusena ooko alimwi akumuka kuunka kuŋanda ikuti kacikonzyeka. Amukanze kuyoobazyiba bapya ibayoojanika. Amube bantu basangaalizya alimwi akusamausya.—Rom. 12:13.
8 Sena tamukonzyi kubagwasya aabo ibajanika ku Ciibalusyo kuti bayaambele kumuuya kwiinda muciiyo ca Bbaibbele caaŋanda? Amulembe mazina alimwi amakkeyala aabeenzu aabo ibatajisi bantu ibabaswaya kutegwa muzumanane kubagwasya. Kwiinda mukubagwasya caluyando, bamwi balakonzya kuyaambele akweelela kubeleka kabali basikumwaya batana bbapatizyigwa kacitanasika Ciibalusyo camwaka uuboola. Ciindi nomupilukila kuli baabo bakajanika ku Ciibalusyo, amubatambe kutegwa bakaswiilile makani aalubazu ayoopegwa mu April 27.
9 Sena Mulakonzya Kucita Bupainiya Bwakugwasilizya Ciindi Eeci ca Ciibalusyo? Mwaka amwaka, ibusungu mbotujisi kuli Jehova butukulwaizya kubeleka canguzu mumulimo mumyezi yaalubazu. Imulimo uucitwa calukamantano ambungano yoonse wakukambauka makani mabotu cabusungu ciindi ca Ciibalusyo, ulakonzya kuleta mpindu.
10 Imbungano imwi iijisi basikumwaya ibali 107 alimwi abapainiya baciindi coonse ibali 9, yakapa lipooti iitondezya kuti bakaba “amwezi uulibedelede” wa April mwaka wamana, kwiinda mukuba abapainiya bakugwasilizya ibali 53 kubikkilizya abaalu boonse alimwi abakutausi. Ino mbuti baalu mbobakacikonzya kukulwaizya bantu kucita bupainiya bwakugwasilizya mumwezi ooyo? Bakatalika kukucili ciindi kukulwaizya basikumwaya kuti balilembye. Miswaangano yamulimo wamumuunda yakali kucitwa muziindi zisiyene-siyene mubuzuba kutegwa boonse mumbungano bacikonzye kujanika. Bakabakulwaizya kapati basikumwaya kucita bukambausi bwaaluwaile, ikapati aabo bakompeme.
11 Mucizyi umwi uujisi myaka iili 86, uutakonzyi kweenda akaambo kakuciswa-ciswa, wakalilembya kucita bupainiya bwakugwasilizya. Ikutalikila mafwumofwumo, wakali kubeleka maola obile kucita bukambausi bwaaluwaile kakkede atafwule lili muncikini, amane wapumuna kwamawoola masyoonto akutalika alimwi bukambausi bwaaluwaile. Umwi muntu ngwaakaumina luwaile wakafwidwa mulumi abana basankwa bobile myaka yobile yainda, aboobo cakamuyumina kuteelela ikaambo Leza ncazumizya zintu zibyaabi zili boobo kuti kazicitika. Mukaintu ooyu wakapanduludwa cakulomya, alimwi ciiyo ca Bbaibbele cakatalisyigwa. Kucita bukambausi bwaaluwaile ciindi cakumangolezya alimwi aaziindi zimwi ninzila mbotu kapati yakukanana abantu bakkala mumaanda naa mumasena aakatazya kusika. Alimwi eeci cigwasya basikumwaya kukanana abantu batajaniki amaanda ciindi mafwumofwumo kusikila kumazuba.
12 Baalu bakamanizya lipooti yabo kwiinda mukwaamba kuti: “Twakajisi ciindi cibotu alimwi tulalumba kapati azyoolwe alimwi azilongezyo Jehova nzyaakapa kuli umwi aumwi wandiswe.” Kwiinda mukulibambila kabotu, mbungano yanu ayalo ilakonzya kujana zilongezyo zili boobo.
13 Amulibambile Kutola Lubazu Lyoonse Mumulimo: Luyando ndotujisi kuli Leza akuli basimukoboma lutupa kuti katujana ciindi mwezi amwezi cakukambaukila bantu makani mabotu. (Mt. 22:37-39) Balangizi ba Ziiyo Zyabbuku Zyambungano abasikubagwasilizya beelede kubagwasya aabo ibali mukakamu kabo kutegwa batole lubazu mumulimo mwezi amwezi. Inzila mbotu mbobakonzya kucita boobo nkwiinda mukulibambila kakucili ciindi kuyoobeleka abantu bamwi cakubagama buya mukakamu. Muciindi cakulindila kusikila kumamanino amwezi kuti mucite boobo, amutalike nokucili ciindi. Eeci ciya kumupa zyoolwe zinji zyakupa lugwasyo munzila yaluyando.
14 Sena kuli basikumwaya baciswa-ciswa mukakamu kanu kaciiyo cabbuku ibajisi penzi kapati kutola lubazu mumulimo? Ikuti naa bamwi kabali mumaanza aambunga iilela bantu naa kabatabukilwi bulo, masimpe tabakonzyi kujana ciindi cinji cakukambauka. Pele kwiinda mukucibelesya kabotu ciindi cisyoonto ncobajana kutegwa bamunike mumuni wabo, balakonzya kukulwaizya baabo ibabona milimo yabo mibotu kutegwa bakayande kasimpe. (Mt. 5:16) Balangizi baziiyo zyabbuku beelede kubona kuti babazyibya bantu aaba kuti balakonzya kupa lipooti yamumulimo wamumuunda babeleka maminiti aali 15. Alimwi cilagwasya kubona kuti lipooti yamulimo wabantu ba Leza munyika yoonse ililuzi.
15 Bakubusi Ibajisi Bubi Kucita Milimo Mibotu! Elo kaka cilakatalusya kubona bakubusi Banakristo kababelesya nguzu zyabo mumulimo wa Jehova! (Tus. 20:29) Ikuti koli mukubusi, ino mbuti mbonga watondezya busungu bwako kuli Jehova mumyezi eeyi iilibedelede yamulimo?
16 Ikuti kotanaba sikumwaya uubbapatizyidwe mumbungano, sena ulayanda kweelela kubeleka mulimo ooyo uulibedelede? Ulibuzye mibuzyo eeyi: ‘Sena ndilijisi luzibo lwantalisyo lwakasimpe kamu Bbaibbele? Sena ndilayanda kutola lubazu mumulimo wa Bwami? Sena ndilijisi mpuwo mbotu yakulilemeka? Sena ndilakonzya kutondezya lusyomo lwangu kubantu bamwi kwiinda mukubaambila makani mabotu? Sena ndilakulwaizyigwa kucita boobo?’ Ikuti naa bwiinguzi bwanu mbwakuti, inzya kumibuzyo eeyi, amubandike abazyali banu kujatikizya luyando lwanu lwakuba sikumwaya. Ibazyali banu balakonzya kukanana aumwi wabaalu ibali mukkomitii yamulimo.
17 Ikuti naa wakaba kale sikumwaya wamakani mabotu, sena inga mwacibelesya ciindi ncotaunki kucikolo kutola lubazu mumulimo? Kwiinda mukuba amulongo mubotu, kugwasyigwa abazyali alimwi abantu bamwi mumbungano, banji bakubusi babbapatizyidwe bacikonzya kucita bupainiya bwakugwasilizya. Ikuti naa tacikonzyeki kucita boobo, amukanze kuyungizya ciindi ncomutola lubazu mumulimo wamumuunda. Amulibikkile mbaakani. Kunze aakulibikkila mbaakani yamawoola, amulibikkile mbaakani iimbi yakuubeleka kabotu mulimo wanu. Mulakonzya kusoleka kubala noluba lugwalo lomwe kumuntu umwi aumwi ngomwaswaangana, kusungwaala kucita nyendo zyakupilukila, kutalisya ciiyo ca Bbaibbele, naa kuyaambele mumulimo wanu kwiinda mukubikkilizya bukambausi bwaaluwaile alimwi azibeela zimwi zyamulimo. Ino mbuti kujatikizya mbaakani yakutamba simukobonyoko, sicikolonyoko naa musazinyoko kuti amusangane ku Ciibalusyo mwaka uuno? Ikubeleka cabunkutwe mumilimo eeyi yeendelezyegwa a Leza kuyoopa kuti mujane zilongezyo alimwi muyookulwaizya bambi mumbungano.—1 Tes. 5:11.
18 Amubagwasye Bapya Kuti Bayaambele: Mumwaka wamulimo wainda, mweelwe waakati-kati waziiyo zya Bbaibbele izili 164,613 zyakasololelwa amwezi mu Zambia. Mukuya kwaciindi, ibunji bwabasikwiiya aaba bayooyaambele kusikila bakalyaabe akubbapatizyigwa. Nokuba boobo, kabatanasika aambaakani eeyo, tweelede kubagwasya kutegwa beelele kubeleka kabali basikumwaya bamakani mabotu. Eeyi nintaamu iiyandika kapati mukuyiisya bapya kuti babe basikutobela Jesu Kristo. (Mt. 9:9; Lk. 6:40) Sena kuli muntu ngomwiiya limwi Bbaibbele uulibambilide kubweza ntaamu eeyi?
19 Ikuti naa cilamwaalila kuzyiba kabotu mbwali mukuyaambele muntu ngomwiiya limwi, amulombe lugwasyo kumulangizi waciiyo canu cabbuku naa mulangizi wamulimo. Ambweni mulakonzya kumulomba kuti ajanike ciindi nomweendelezya ciiyo. Bakwesu aaba balijisi luzibo lunji ilukonzya kubelesyegwa mukulanga-langa mbwali mukuyaambele kumuuya sikwiiya. Balakonzya kupa nzila zikonzya kumugwasya sikwiiya kuti ayaambele kumuuya.
20 Ikuti naa muntu ngomwiiya limwi uyanda kuba sikumwaya uutana bbapatizyigwa alimwi mwabona kuti uleelela, amukanane amulangizi weendelezya. Uyoocita bubambe bwakuti baalu bobile bakamubone antoomwe amuntu ngomwiiya limwi ikutegwa babone naa uleelela, kwiinda mukubelesya twaambo tuli apeeji 98-9 mubbuku lya Mulimo Wesu. (Amubone Ngazi Yamulindizi yamu Cingisi ya November 15, 1988 apeeji 17.) Ikuti naa baalu bazuminizya kuti sikwiiya uleelela kubeleka kali sikumwaya, mweelede kutalika kumuyiisya mpoonya-mpoonya. Aakupa buyo lipooti yakwe yamulimo wamumuunda, imbungano iyoozyibisyigwa kuti sikwiiya ooyo waba sikumwaya uutana kubbapatizyigwa. Tulaalusyomo kuti basikumwaya banji bapya, ibana abapati boonse, balakonzya kuyaambele akusika aambaakani eeyi iiyandika kapati yakumuuya mumyezi eeyi iilibedelede yamulimo.
21 Kulibambila Kulagwasya Kutegwa Mujane Mpindu Zinji: Ikulibambila kakucili ciindi kuyoopa kuti tuzwidilile mumilimo yesu muciindi eeci Ciibalusyo. (Tus. 21:5) Kuli makani manji baalu ngobeelede kulanganya.
22 Ikutegwa bagwasyigwe banji mumbungano kuti bajane mpindu zinji mumulimo wamumuunda, baalu beelede kucita bubambe bubeleka kabotu bwakuba amiswaangano yamulimo wamumuunda munsondo yoonse. Mulangizi wamulimo nguweelede kusololela mukucita bubambe oobu. Sena cilakonzyeka kubikka miswaangano iimbi mafwumofwumo, kumazuba naa mangolezya? Bantu mumbungano beelede kuzyibisyigwa kujatikizya bubambe oobu. Cilakonzya kugwasya kapati ikuti naa mulongo wabikkwa abboodi lyamakani.
23 Baalu beelede kubona kuti bubambe bwa Ciibalusyo bwabambwa kakucili ciindi kabutanasika buzuba bwa April 16. Eeci cibikkilizya kubelekela antoomwe ambungano zimbi ziyooswaanganina mu Ŋanda ya Bwami njomuyoobelesya, kusalazya Ŋanda ya Bwami, kusala basikugwasilizya abasikwiinzya zikozyanyo zyamulalilo alimwi akujana zikozyanyo. Bantu mumbungano beelede kuzibisyigwa ciindi abusena nkociya kucitilwa Ciibalusyo alimwi akucinca koonse kuyoocitwa kumulongo wamiswaangano munsondo eeyo. Ikusungwaala mukulanganya zintu eezi kuyoopa kuti Ciibalusyo ‘cicitwe kabotu akucililana.’—1 Kor. 14:40.
24 Basilutwe bamikwasyi balakonzya kubelesya cibeela caciiyo cabo camukwasyi kuti babandike mbuli mukwasyi mbounga watola lubazu mumulimo uuyungizyidwe uyoocitwa ciindi ca Ciibalusyo. Sena mukwasyi wanu woonse ulakonzya kubeleka mulimo wabupainiya bwakugwasilizya? Antela, sena banamukwasyi balakonzya kugwasya umwi naa kwiinda aawo ikucita boobo? Ikuti naa kacitakonzyeki kucita boobo, amulibikkile mbaakani zigaminide mumukwasyi zyakubeleka ciindi cinji mumulimo. Sena kuli mwana mumukwasyi uukonzya kweelela kubeleka kali sikumwaya uutana bbapatizyigwa ikuti naa wakulwaizyigwa akugwasyigwa? Ino mbangaye bantu mukwasyi wanu mboukonzya kutamba ku Ciibalusyo mwaka uuno? Ikulibambila kabotu kuyooleta zilongezyo zitalivwulili alimwi alukkomano kumukwasyi wanu.
25 Amucibelesye Kabotu Ciindi Cacaala: Naakali kulembela Banakristo bamumwaanda wamyaka wakusaanguna, imwaapostolo Petro wakabayeezya kuti tiibakeelede kubona kuti kwakacili ciindi cinji nkaambo mamanino aabweende bwazintu bwaci Juda akali afwaafwi. (1 Pet. 4:7) Sunu bumboni boonse butondezya kuti mamanino aabweende bwazintu oobo boonse ali afwaafwi. Abuzuba, bukkale bwesu bweelede kutondezya mbotusinizyide mumakani aayo. Mbotuli babelesi basungu ba Jehova, tweelede kuubikkila maano kapati mulimo uuyandika wakukambauka makani mabotu.—Tit. 2:13, 14.
26 Cino nceciindi cakuba basungu akuzuzikizya mulimo. Amuzinzibale kuyeeya zintu nzyaakamucitila Jehova, mumukwasyi wanu alimwi amumbungano. Nokuba kuti tatukonzyi kumubbadala kuzintu zinji nzyaakatucitila, tulakonzya kumukomba Jehova camoyo woonse. (Int. 116:12-14) Imulimo wesu ngotubeleka canguzu uyoolongezyegwa kuli Jehova. (Tus. 10:22) Toonse atube ‘basungu kuzintu zibotu’ muciindi eeci cilibedelede camulimo uuyungizyidwe, “kuti kumakani oonse Leza akalemekwe muli-Jesu Kristo.”—1 Pet. 3:13; 4:11.
Kabbokesi kali apeeji 3]
Bakajanika ku Ciibalusyo Nyika Yoonse
1999 14,088,751
2000 14,872,086
2001 15,374,986
2002 15,597,746
Kabbokesi kali apeeji 4]
Ino Mbaani Mbomuya Kutamba ku Ciibalusyo?
□ Banamukwasyi alimwi abasazinyoko
□ Basimukobonyoko alimwi abantu mbomuzyi
□ Babelesinyoko alimwi abasicikolonyoko
□ Bantu mbomuswaya munyendo zyakupilukila ambomwiiya limwi Bbaibbele
Kabbokesi kali apeeji 5]
Amubagwasye Aabo Bajanika ku Ciibalusyo
□ Amubatambule camaanza obile
□ Amubaswaye
□ Amubalombe kuti batalike kwiiya Bbaibbele
□ Amubatambe kumakani aabuleya aalubazu
Kabbokesi kali apeeji 6]
Ino Mujisi Mbaakani nzi Muciindi ca Ciibalusyo?
□ Kuti umwi wabantu mbomwakatamba akajanike ku Ciibalusyo
□ Kweelela kuba sikumwaya wamakani mabotu
□ Kubeleka mweelwe wamawoola wiinda ali yaayo ngomucita lyoonse
□ Ikucibeleka kabotu cibeela cimwi camulimo
□ Ikubeleka kamuli bapainiya bakugwasilizya