Sena Mwezi wa April 2000 Tulakonzya Kuucita Kuba Mwezi Mubotu Kwiinda?
1 Mu April 19, muli Bwatatu mangolezya bunooli buzuba bupati mumwaka wesu wamulimo. Mubuzuba oobo, mbolitiikabbilile buyo zuba Bakamboni ba Jehova nyika yoonse mboizulwa, mbungano amutubunga tusyoonto-syoonto bayoobaa Ciibalusyo calufwu lwa Kristo. Kufwumbwa kulubazu lwanyika nkotubede, ikwiibaluka cipaizyo ca Jesu Kristo ciyooba cintu cipati mumwaka. Deeti ya Ciibalusyo ilitondezyedwe a 2000 Calendar of Jehovah’s Witnesses (Kkalenda ya Bakamboni ba Jehova yamu 2000) mumwezi wa April.
2 Mwezi wa April woonse utupa coolwe cibotu cakuti tutondezye cakulyaaba mbotulimvwa kujatikizya luzyalo lwa Jehova ndwaakatutondezya kwiinda mucipaizyo ca Mwanaakwe. Munzila nzi? Mwaapostolo Paulo wakalemba kuti: “Nkaambo kuyanda Kristo nkokutusinikizya, ikuti tulabeteka obo, kuti omwe wakafwida boonse, aboobo boonse bakafwa. Nkabela wakabafwida boonse kuti abo bapona bataciliponene beni pele baponene oyo iwakabafwida akubuka.” (2 Kor. 5:14, 15) Inzya, mumwezi wa April tulakonzya kutondezya kuti tatuciliponeni pe, pele kuti tuponena yooyo iwakatufwida kwiinda mukucita mwezi oyu kuba mubotu kwiinda mumilimo yesu katuli babelesi ba Bwami!
3 Amulilembye Kuyoocita Bupainiya Bwakugwasilizya mu April: Mwaapostolo Paulo wakatusiila cikozyanyo cikulwaizya kapati naakati: “Nsilikataazyi neciba comwe azeezi zintu, nsiyeeyi kuti buumi bwangu ncintu pe, ndiyandisisya buyo kuti ndimanizye lweendo lwangu, amulimo oyo ngwendakapegwa ku-Mwami Jesu, kuti ndilungulule Makani Mabotu aaluzyalo lwa-Leza.” (Inc. 20:24) Icoolwe eco cakulungulula makani aa Jehova Leza ncotujisi aswebo. Aboobo, imbaakani yesu njakucita mwezi wa April kuba mwezi mubotu kwiinda yoonse mumulimo wabupainiya bwakugwasilizya!
4 Mwezi wa April 2000 uyooba mwezi mubotu kapati kubanji bayanda kuyoocita bupainiya akaambo kakuti unooli ansondo zili musanu. Mumwezi wa May 1997 notwakalaa mweelwe ngotutanasikide wabapainiya bakugwasilizya, aabo ibakatola lubazu ibasika ku 7,695 bakasika ku 8 pasenti wamweelwe woonse wabasikumwaya. Nokwakainda myaka yobilo, mweelwe wabasikumwaya ibakapa malipooti mu May 1999 wakayungizigwa amweelwe wiinda ku 5 pasenti. Eci caamba kuti tulakonzya kuwiinda mweelwe waatala wabapainiya bakugwasilizya wamusyule. Kunze lyaboobo, mawoola aayandika akacesyegwa eci calo icipa kuti ibanji mumbungano batalike kucita mulimo ooyu. Sikumwaya umwi aumwi weelede kuyeeyesya akucibikka mumupailo kubona naa inga ulakonzya kucita bupainiya bwakugwasilizya mu April.
5 Kwiinda mukubelesya mwezi wa April a Kkalenda yamu 2000, amulibambilile limwi kujatikizya mbomuyoocita zintu mumwezi uboola. Amulibambile mazuba ngomuyeeyela kuyootola lubazu mumulimo wamumuunda mpoonya akwaasanganya antoomwe mawoola oonse ngomuyeeyela kuyoobelesya mumulimo wakukambauka mumwezi ooyu. Mubikkilizye aciindi ncomuyeeyela kuyoobandika abamwi mubumboni bwalyoonse alimwi abwamukwiizya. Sena mawoola kwaasanganya antoomwe alasika kumawoola ali 50 ngobabikkilidwe bapainiya bagwasilizya? Ikuti kamutasiki amweelwe wamawoola aayandika, sena kuli kucinca kumbi nkomukonzya kucita mubukkale bwanu kutegwa mujane ciindi cakucita bupainiya bwakugwasilizya? Muyandika kubeleka buyo woola lyomwe amaminiti aali 40 buzuba abuzuba kutegwa musisye mawoola 50 amwezi.
6 Mbwaanga mawoola aayandika kubapainiya baciindi coonse akacesyegwa aalo, sena kuli nomulombozya kucita mulimo waciindi coonse? Nkaambo nzi ncomulindila kuti mane cikabe cilimo? Akaambo kakuti mainza akainda, April mmwezi mubotu wakutalika mulimo oyu! Ikuti kamudooneka naa muyoocikonzya kusisya mawoola aali 70 aayandika kubapainiya baciindi coonse, ino nkaambo nzi ncomutacitili bupainiya bwakugwasilizya mu April akulibikkila mbaakani yakusisya mawoola aali 70? Mwabona kuti mulakonzya kucicita, ambweni inga mwayanda kuti munjile mulimo wabupainiya bwaciindi coonse cakufwambaana.—Amubone bbuku lya Mulimo Wesu amapeeji 113-14.
7 Amube Basikumwaya ba Makani Mabotu Ibatola Lubazu Cakumaninina: Toonse tobasikumwaya kubikkilizya abapainiya, luyando lwini-lwini ndotujisi kuli Leza akuli basimukoboma lulatukulwaizya kuti katutola lubazu camoyo woonse kusikila mpotukonzya mumulimo wa Jehova kweelanaa bukkale bwesu. (Lk. 10:27) Aboobo, tutondezya kuti ‘toonda mulimo akuulwanina, nkaambo myoyo yesu ilalangila Leza Muumi, Mufwutuli wabantu boonse, kwiindilila wabaabo bazumina.’ (1 Tim. 4:10) Nkakaambo kaako tulangila kubona basikumwaya boonse kuyootola lubazu mu April, umwi aumwi katola lubazu cakumaninina mumulimo wa Bwami.
8 Tutalubi malailile aa Jesu aakuti: “Kutebula kwavula, batebuzi bacea. Nkaambo kaako amukumbile mwami uuli amuunda kuti atume batebuzi kukutebula kwakwe.” Mbwaakamanina buyo kwaamba boobu, Jesu wakaita baapastolo bakwe bali 12 akubatuma kuti bakakambauke. (Mt. 9:37, 38; 10:1, 5, 7) Kakwiindide mwaka omwe kuzwa leelyo aabo ibali 12 kabayiisidwe kabotu mumulimo wakukambauka, Jesu “wakabika bamwi abali makumi aali musanu mwaabili, wakabatuma” akubapa malailile ngoonya aakuti: “Kutebula nceo . . . nkaako amukombelele Mwami wakutebula, kuti atume basimilimo mukutebula kwakwe.” (Lk. 10:1, 2) Ibbaibbele mubbuku lya Incito lilatwaambila mbwaakaingula mipailo eyo Jehova. Kuzikusika lya Pentekoste 33 C.E., mweelwe wabasikwiiya wakaliyungizidwe kusika ku 120. Mpoonya mweelwe waatala wa 3,000 alimwi awa 5,000 wabasikwiiya wakatobelana. (Inc. 1:15; 2:41; 4:4) Kuzwawaawo, “basikwiiya bakavulisya” ciindi aciindi. (Inc. 6:7) Ncimwi buyo asunu tweelede kumukombelezya Mwami kuti atupe basikumwaya ba Bwami bambi ibanji! Kweelana amipailo yesu, sikumwaya umwi aumwi mumbungano weelede kusolekesya kubona kuti wabikka bubambe buli kabotu bwakuti katola lubazu mumulimo lyoonse mwezi amwezi.
9 Amuulange alimwi Mwezi wa April a Kkalenda yamu 2000. Mbwaanga mazuba obilo aakusaanguna mumwezi ooyu ayooba mu Mujibelo amu Nsondo, sena inga mwafwambaana kutalikila limwi kucita bubambe bwakuyootola lubazu mumulimo mazuba aayo? Sena inga mwatola lubazu mu “Buzuba Bwakumwaya Mamagazini” bumwi abumwi mukati kamwezi antoomwe abamukabunga kanu ka Ciiyo Cabbuku Cambungano? Sena inga tamubeleki kwawoola lyomwe naa kwiindaawo mumulimo mubuzuba bwamu Nsondo lyoonse? Sena inga mwacita bubambe bwakuti kamucita bumboni imangolezya? Alimwi mutalubi mbazu zyoonse nomukonzya kucita bumboni bwamukwiizya kuncito, kucikolo antela eelyo nomukutauka milimo yanu imbi yabuzuba abuzuba. Amwaalembe mazuba nomukonzya kutola lubazu mumulimo mpoonya kamubelesya kkalenda ikulemba ciindi ncomunoobeleka mumwezi ooyu.
10 Mwezi wa April uyooba mwezi mubotu kapati kuli baabo ibeelela alimwi ibakazumizigwa abaalu ikutalika kukambauka kabali basikumwaya batabbapatizidwe. Ikuti kamucitya ciiyo ca Bbaibbele kumuntu umwi, sena muntu ooyo wayaambele kusikila antaamu yakwaambila mweendelezi weendelezya kutegwa bamuzuminizye kuti atalike awalo kukambauka makani mabotu? Ikuti kamujisi bana batabbapatizidwe, sena kuli nomwakabandika abaalu kujatikizya kuyaambele nkobacita munzila yakumuuya? Sena eci tacikonzyi kuba ciindi cibotu cakuti batalike kumwaya makani?—Amubone bbuku lya Mulimo Wesu, amapeeji 97-100.
11 Mukusoleka kwesu kwakucita mwezi wa April 2000 kuba mwezi mubotu kwiinda kulindiswe, toonse tweelede kutola lubazu mumulimo mpoonya akuleta malipooti esu kumamanino aamwezi. (Amweezyanisye Marko 6:30.) Basikumwaya bapya ibatola lubazu mumulimo wamumuunda kwaciindi cakusaanguna, beelede kubakulwaizya ikutola lipooti yabo cakufwambaana kumamanino aamwezi. Kwiinda mukuzuzikizya mbazu zyesu, tuyoobaa lubazu lupati mukutembaula Jehova kwiinda mumulimo ngotucita alimwi amulipooti ya April.
12 Mukaletelezye Abamwi ku Ciibalusyo: Sena tacikatukondi ikubona mweelwe waatala mupya wabaabo bayoojanika ku Ciibalusyo calufwu lwa Kristo mu 2000? Inzya ciyootukonda! Kuyooba bantu banji kapati ibayooswaangana kutondezya kulumba kwabo akaambo kaluyando Jehova Leza a Jesu Kristo ndobakatutondezya! (Joh. 3:16; 15:13) Amulibambilile limwi kubona kuti taakwe ciyoomunyonganya kujanika ku Ciibalusyo nywebo abamumukwasyi wanu.
13 Alimwi ecino nceciindi ncotweelede kutalika kutamba bamwi ku Ciibalusyo. Amubalembe mazina boonse aabo mbomuyanda kuti bakajanike. Mubikkilizye abaabo bakali kwiiya Bbaibbele andinywe kaindi alimwi abaabo mbomucitya ciiyo lino antoomwe abaabo mbomwakaswaya munyendo zyakupilukila. Akapepa kanu kamazina amubikkilizye ambomubeleka limwi, abeenzinyoko bakucikolo alimwi abasimukobonyoko abaabo mbomucita limwi makwebo. Mutalubi kubikkilizya abambi buyo mbomuzyibene limwi alimwi abasazinyoko. Mwamana kulemba mazina, amumusikile umwi aumwi wabantu aabo mbomwalemba akumutamba. Amubaambile kabotu ciindi cini abuzuba alimwi abusena nkociyoobeda Ciibalusyo. Mbobuyaabuswena afwaafwi buzuba bwa April 19, amubayeezye aabo mbomwakalemba mazina kwiinda mukubaswaya naa mukubatumina luwaile. Amubaambile kuti muyakweendelaamwi kuya ku Ciibalusyo.
14 Kweelanaa malailile aamusule aakazwa ku Sosaiti, kabunga kabaalu kayoocita bubambe bwakuyookulwaizya basikumwaya batacisungweede boonse bali mucilawo kutegwa abalo bakajanike ku Ciibalusyo. (Mt. 18:12-14) Ibaalu beelede kululanga-langa lugwalo lwakazwa ku Sosaiti lwamu February 2, 1999. Mulembi wambungano uyoolemba mazina oonse abasikumwaya batacisungweede, mpoonya mulangizi wamulimo uyoopa baalu mukuli wakubeendela akubatamba ku Ciibalusyo. Ambweni kuti baswaigwa cakufwambaana mulweendo lwabweembezi, aabo batacisungweede balakonzya kugwasigwa kusungwaala alimwi mumulimo wamumuunda nomuba mumwezi wa April. Ciyoobayumya-yumya ikubatamba kweendelaamwi asikumwaya uulaa luzibo mumulimo wamumuunda.
15 Amubakulwaizye Kutola Lubazu mu April! Ikutegwa mwezi wa April 2000 ukabe mwezi mubotu kapati kwiinda yoonse, baalu abakutausi alimwi abasilutwe bamikwasyi boonse beelede kumvwana kabotu akati kabo beni. Ibaalu bayooba kumbele mukuzibamba kabotu zintu zyoonse alimwi amukusololela. (Heb. 13:7) Mweelede kubikka bubambe buli kabotu bwamiswaangano yamulimo wamumuunda mukati kansondo alimwi akumamanino ansondo kubikkilizya amazubaa kulyookezya. Mulakonzya kucita abubambe bumbi bwakubeleka kumazuba alimwi amangolezya. Mulongo wazintu zyoonse ziyoocitwa mumwezi wa April weelede kubikkwa abboodi lyamakani. Mweelede kusala muntu unooyendelezya muswaangano wamulimo wamumuunda umwi aumwi uubikkidwe. Kabunga kamwi akamwi keelede kwaabilwa cilawo kutegwa boonse kabajisi mwakubelekela.
16 Mumwezi wa April tuyoomwaya mamagazini aa Ngazi Yamulindizi alimwi a Awake! Ikutegwa tukatalisye ziiyo zya Bbaibbele zyaaŋanda, tweelede kwaabila abroshuwa lya Ncayanda kuli baabo boonse bayootondezya luyandisisyo. Aboobo, mweelede kubona kuti mulijisi mamagazini amabroshuwa manji.
17 Kumamanino amwezi, mweendelezi waciiyo cabbuku umwi aumwi antoomwe abagwasilizi babo beelede kukulwaizya umwi aumwi uuli mukabunga kabo ikuleta lipooti yamumuunda cakufwambaana kumamanino amwezi. Eci cilakonzya kucitwa mu Nsondo mu April 30. Mpoonya mulembi uyooabikka antoomwe malipooti, ikuti naa wabona kuti kuli basikumwaya bamwi batakaleta malipooti abo, inga wabayeezya caluyando kuti balete malipooti aabo kabutanasika buzuba bwa May 6 eelyo nayelede kutuma lipooti yambungano ku Sosaiti. Ulakonzya kulomba beendelezi baciiyo cabbuku kuti bamugwasye kubwezelela malipooti amumuunda kwiinda mukusikila sikumwaya umwi aumwi.
18 Iciindi ca Ciibalusyo nceciindi cipati kapati mumwaka kubantu ba Leza. Toonse tweelede kujata bubi mumulimo wa Jehova aciindi eci. Ciyooba ciindi cakujata bubi ikuti naa toonse tukatole lubazu cakumaninina katuli basikumwaya makani mabotu. Alimwi kuti aabo bakonzya kubeleka mulimo wabupainiya bwakugwasilizya bacita oobo akuti naa twalisungula kutamba bamwi akubaletelezya ku Ciibalusyo calufwu lwa Kristo. Atupailile lulongezyo lwa Jehova mukusola nkotusola kucita mwezi wa April 2000 kuba mwezi mubotu kwiinda yoonse, mukutembaula akulemya zina lya Leza!—Heb. 13:15.
Kabbokesi kali apeeji 3]
Bapainiya Bakugwasilizya
Mweelwe ngotutanasikide: 7,695
(May 1997)
Kabbokesi kali apeeji 4]
Mweelwe Wabasikumwaya
Mweelwe ngotutanasikide: 107,233
(August 1999)
Kabbokesi kali apeeji 5]
Ibakajanika ku Ciibalusyo
Mweelwe ngotutanasikide: 428,697
(1997)