‘Amube Bavwubi Mukucita Milimo Mibotu’
1Cabusungu mumulimo wakwe mumyaka yakwe yakumamanino, mwaapostolo Paulo wakali kubeleka a Timoteo alimwi a Tito. Boonse bobilo wakabalembela majwi aakonzyenyi aakubakulwaizya. Wakamwaambila Tito kuti “boonse abo basyomekede kuli-Leza” beelede “[kujatisya] milimo mibotu.” (Tit. 3:8) Wakamwaambila Timoteo kuti aabo basyoma muli Leza beelede kuti ‘kabavwubide kucita milimo mibotu.’ (1 Tim. 6:17, 18) Elo kaka oolu lulayo ndubotu kulindiswe toonse! Pele ino ncizi cikonzya kutukulwaizya kuti tucikonzye kubeleka milimo mibotu mubuumi bwesu? Ino milimo nzi kwiigama njotukonzya kubeleka mumazuba aazya?
2 Icikonzya kutuyumya-yumya mukucita milimo mibotu ndusyomo lwesu alimwi aluyando ndotujisi kuli Jehova alimwi abulangizi butaliboteli mbwatupede. (1 Tim. 6:19; Tit. 2:11) Ikapati kuciindi cino camwaka, tuli mukuyeekezyegwa kuti Jehova wakatuma Mwanaakwe Jesu ansi aano kutegwa azyosalazye izina lya Wisi alimwi akujalula nzila yabuumi kulibaabo boonse beelela. (Mt. 20:28; Joh. 3:16) Eeci ciya kusalazyigwa mubuzuba bwa Ciibalusyo calufwu lwa Kristo mu March 28. Kweelena abulangizi oobu mbotujisi bwakuba abuumi butamani, sena tacitukulwaizyi kubeleka mbuli mbotukonzya ‘katuvwubide kucita milimo mibotu’? Inzya, tulakonzya kucita oobo! Ino milimo nzi njotukonzya kubeleka ciindi cino?
3 Ikucita Milimo Mibotu mu March Alimwi Amazuba Aazya kumpela: Cakutadooneka, tuya kujanika ku Ciibalusyo—kucilengwa eeci ciyandika kapati camwaka kuli Bakamboni ba Jehova nyika yoonse mboizulwa. (Lk. 22:19) Pele tuyanda kuti abamwi bantu bakajanike ku Ciibalusyo eeci. Amulange kulipooti yamulimo mu Ngazi Yamulindizi yamu January 1, 2002, eelyo muya kubona mwaka wamana mumasena manji munyika yoonse mboizulwa ibakajanika ku Ciibalusyo bakali vwulide kwiinda basikumwaya ziindi zyotatwe, zyone naa zyosanwe. Masimpe, kwaba kubeleka canguzu kuli basikumwaya kumbungano zyoonse muzilawo zyabo kwiinda mukutamba bantu ku Ciibalusyo. Aboobo tuyanda kuti, ikutalikila sunu kusikila mu March 28, ciindi cinji tucibelesye ikutamba bantu ku Ciibalusyo akubagwasya kutegwa bazyibe bulangizi mbotujisi bwalufwutuko.
4 Waakutalika mwezi wa April, kuna kucikasaala alimwi kuna kuli kabotu. Ino mbuti mbotuya kucibelesya ciindi eeci kwiinda mukuba ‘bavwubi mukucita milimo mibotu’? Tulakonzya kucita oobo kwiinda mukuzumanana kukambauka makani mabotu canguzu alimwi akuba “bankutwe mukucita milimo yoonse mibotu.” (Taita. 2:14, Ci; Mt. 24:14) Ikuti naa tamukonzyi kucita bupainiya bwakugwasyilizya mu March, sena inga mwacita oobo mu April amu May? Ikuti naa mucita bupainiya mu March, sena inga mwakonzya kuzumanana?
5 Bamwi babeleka milimo yakumubili, bajana kwaamba kuti balakonzya kucita woola lyomwe naa kwiinda waawo nobaunka kumilimo, mubukambausi bwamumugwagwa naa kuswaya bantu babeleka mumasena aamakwebo mobafwambaana kujalula ciindi camafwumofwumo. Bamwi ciindi camasikati nobalyookezya nceciindi nobakambauka alimwi nibajana ciindi cakwiiya ciiyo ca Bbaibbele ababelesinyina. Bacizyi banji batalembedwe milimo yakumubili bacikonzya kujana ciindi cakuya mumulimo iciindi bana babo nibali kucikolo. Kwiinda mukufwuma kubuka mazuba aamwi cilabagwasya kubamba-bamba muŋanda akuba aciindi cinji masikati cakuya mumulimo wakukambauka alimwi akuyiisya.—Ef. 5:15, 16.
6 Kufwumbwa naa tamucikonzyi kucita bupainiya bwakugwasyilizya, mulakonzya kulibambila mulongo wazyeezyo nzyomuyanda kucita kutegwa kamucikonzya kutola lubazu mumulimo akucita mbuli mbomukonzya ‘mukucita milimo iiluzi, kuti mube bavwubi mukumana milimo mibotu, kuti kamufwambaana kupa akwaabilana abeenzinyoko’ kasimpe.—1 Tim. 6:18.
7 Amuyeeye Mulimo Mubotu Wakugwasya Bantu Kuba Basikwiiya: Amwaka kuli bantu batondezya luyandisisyo baboola ku Ciibalusyo. Sena inga cakonzyeka kuli bamwi mumbungano kubikkila maano kulibaabo bajanika pesi batanatalika kwiiya? Sena inga mwacita nyendo yakupilukila kulimbabo kumwi kamujisi makanze aakubagwasya kuyaampela Munzila yakumuuya? Mulajana kuti bamwi bajanika ku Ciibalusyo mikowa ya Bakamboni. Bamwi balakonzya kuba babaya bakali kwiiya kaindi balo bayandika buyo kukulwaizyigwa kutegwa bacikonzye kwiiya alimwi, akujanika kumiswaangano lyoonse. Elo kaka ciya kutukonda kubona kuti baba babelesi beni-beni ba Jehova babeleka andiswe!
8 Akaambo kakutola lubazu kweelede mumulimo mu March alimwi amazuba aazya kumpela, kulibonya kuti tuya kujana bantu banji baya kuyandika kuswaya. Amusoleke kubasiila mubuzyo. Amubasyomezye kuti muya kubaambila bwiinguzi lweendo luboola. Ciindi notwacita boobu, tulibambila kuyoojokelela. Cilagwasya kufwambaana kujokela. Ikuti naa tiitwaacikonzya kutalisya ciiyo mulweendo lwakutaanguna, tuyanda kuti tukatalisye ciiyo mukuswaya kuboola.
9 Iciindi notucita bukambausi bwamumugwagwa, tweelede kuti katulibambide kutalisya mubandi abantu. Ibanji basikumwaya bakaambilwa mazina, bapegwa makkeyala alimwi anamba yaluwaile kubantu batondezya luyandisisyo mbibakayaanya mumulimo wamumugwagwa. Ikuti muntu ngomwakayaanya katakkali mucilawo ncomubelekela, amubweze foomu ya (S-43) ku Ŋanda ya Bwami mulembe akumupa mulembi wambungano walo uyakupa mbungano iibelekela mwakkala muntu ooyo. Ikuti mulembi katacikonzyi kucita boobo, nkokuti uya kwiitumina kuofesi lyamutabi balo baya kwiitumina kukkala muntu ooyo. Ikucita boobu ciya kupa kuti luyando lwakwe lubuke alimwi.
10 Ikuti wamupa namba yaluwaile, kutali kkeyala, eelyo amupilukile kwiinda mukumuumina luwaile. Amulibambile ciindi kaciciliko kuli zyeezyo nzyomuyanda kuti mukabandike anguwe. Amube abbuku lya Kukambitsirana lyakuvwuntauzyizya. Bamwi bacikonzya kuba aziiyo kwiinda mukubelesya luwaile, kubikkilizya abaabo bakali kukatazya kujana aŋanda. Mucizyi umwi wakatalika kubabuzya manamba aluwaile aabo bamakaintu bakajisi luyandisisyo mbaakali kuyaanya ciindi naakali mubukambausi bwamulyango amulyango, eelyo cakaccilila wakakonzya kutalika ziiyo zya Bbaibbele zyobilo.
11 Amubelekele Antoomwe Abaalu Mukugwasya Batacisungweede: Baalu balababikkila maano kapati aaba. Bunji bwabaabo ibali boobo, kwiinda mukulesya busongo bwabo batalika kale kujanika kumiswaangano yambungano. Bakabona kaambo ncociyandika kusangana ambunga ya Jehova ikutegwa bakwabililwe munzila yakumuuya mbuli mbokwaambidwe ku Intembauzyo 91. Bamwi babaabo balilibambide kutola lubazu mumuunda alimwi. Ikuti abaabo batacisungweede bakajanike ku Ciibalusyo uuno mwezi, balakonzya kuzumina kuba aciiyo ca Bbaibbele cabo cibagemi. Ikuti kacili boobo, nkokuti baalu baya kubamba bubambe bwakujana muntu uukonzya kwiiya ambabo aabo bayandika lugwasyo. Ikuti naa ndinywe mwasalwa kugwasya munzila eeyi, kubelekela antoomwe kwanu kuya kulumbwa kapati.—Rom. 15:1, 2.
12 Lyoonse ‘Kamujatisya Milimo Mibotu’: Ibanji bakabeleka mulimo wabupainiya bwakugwasyilizya kwamwezi naa kwiinda waawo, bakajana kuti mumulimo wabo wakayungizyigwa mumyezi yakaccilila. Bakayaanya bantu bajisi luyandisisyo balo mbobakabona kuti baleelede kuswaya. Eeci cakabapa kusoleka kubeleka canguzu akuunka mumuunda ciindi aciindi ikutegwa bakababone alimwi aabo bakatondezya luyandisisyo. Bamwi bakatalika ziiyo, calo cakabapa kuti kabatola lubazu mumulimo ciindi aciindi.
13 Aboobo, bamwi baba akutangala kwiinda mukuyungizya ciindi cakukambauka, ikugwasya bantu kuba basikwiiya alimwi cakabapa kuti balange-lange zintu ziyandika kubikka mubusena butaanzi. Akaambo kaceeci, bamwi bakacileka milimo yakumubili akuzumanana mubupainiya bwakugwasyilizya. Bamwi bacikonzya kuba bapainiya baciindi coonse. Bakali kukonzya kuyaama kubulangizi bwa Leza ikutali kuzintu zyamunyika. Bacibona kuti “kwaabilana abeenzinyina” cakabaletela zilongezyo zinji zizwa kuli Jehova alimwi bwayumizyigwa bulangizi bwabo bwakutangala “[a]buumi bwinibwini.” (1 Tim. 6:18, 19) Inzya, ikuti banji bacita mulimo wabupainiya, mbungano yoonse iya kugwasyigwa. Bapainiya balayandisya kuluula zibacitikila mumuunda alimwi balatamba abamwi kutola lubazu mumulimo ambabo, eeci capa kuti mbungano iye kumpela munzila yakumuuya.
14 Toonse ‘atube bantu bavwubide mukucita milimo mibotu’ iciindi cino ca Ciibalusyo alimwi amazuba aazya kumpela kwiinda mukutola lubazu mumulimo wa Banakristo. Atupe kulumba kuli Jehova kubulangizi oobu bwakupona kukabe kutamani munyika mpya muli bululami.—2 Pet. 3:13.