“Zipego Kubantu” Cakulisungula Zileembela Butanga bwa Leza
1 Elo nkubota bubambe oobu Jehova mbwaacita kwiinda mu Mwanaakwe ibwakupa “zipego kubantu”! (Baefe. 4:11, 12, Ci) Balijisi mikuli minji kubikkilizya akweembela mbelele zya Leza cakulisungula. (1 Pet. 5:2, 3) Toonse tulagwasyigwa kububambe oobu buyandika. Kufwumbwa naa bantu bamwi balijisi mapenzi, mbapya mumbungano, balikompeme naa bali leyede, aaba bantu balabikkila maano kumuntu amuntu caboola kumakani aazintu zyakumuuya.—Flp. 2:4; 1 Tes. 5:12-14.
2 Ikuti manyongwe aamunyika apa kuti kube kukopana mukuyeeya, aaba beembezi balaba mbuli “macijilo aakulivuna kumuuwo aciyubilo cakucijila ciindi cakuwidwa imvula yamuyoba.” Iciindi notuyandika luumbulizyo akaambo kakukopana kwesu mumizeezo balatulemununa mumbazu eeyi, bali “mbuli tulongalonga twamaanzi munkanda injumu” naa “mbuli cenzule [naa icimvwiide] campangala impati munyika iikataazya.”—Is. 32:2.
3 Ikukulwaizya Ibatacisungweede: Ibaalu balabamba bubambe bwaalubazu bwakusoleka kuyumya-yumya baabo batacisungweede akuti bajokele mbuli mbobakali kaindi kwiinda mukutola lubazu mumilimo yoonse yambungano. Bweembezi oobu bubotu bwabagwasya banji ikutalika kujanika lyoonse kumiswaangano alimwi bayakwa munzila yakumuuya cakunga batalika kutola lubazu mumulimo wamumuunda alimwi. Kusoleka koonse ooku nkobacita baalu kutondezya luyando lwa Jehova alimwi abusilutwe bwa Jesu Kristo uubeleka canguzu. Wakabikka cikonzyanyo cibotu cakubikkila maano kumbelele zyakwe iili zyoonse zyazimina naa kusoweka.—Mt. 18:12-14; Joh. 10:16, 27-29.
4 Ibeembezi balalanga zitondezyo zitondezya kuti muntu ooyu taceendi munzila yakumuuya. Kufwumbwa uuboneka kutyompwa, uutacijaniki-janiki kumiswaangano naa uutacitoli lubazu mumulimo, ooyo uyandika lugwasyo lwakumuuya. Baalu balilibambide kugwasya muntu watalika kutondezya micito yanyika mbuli yakutasama kabotu akulibamba naa kutalika kukazya mbungano. Kwiinda muluyando lwabo, balangizi balisungula kwiinda mukubikkila maano, ‘balaaba buumi bwabo’ mukusoleka kugwasya baabo kutegwa babusye luyando muli Jehova.—1 Batesalonika 2:8, BT.
5 Mazuba aayinda, Banakristo babbapatizyidwe bakacileka kuyanzana ambungano alimwi bakaya ansi munzila yakumuuya akaambo kakuti bakatalika kuciswa-ciswa, kubula mali naa mapenzi aamumukwasyi. Kakunyina akwaamba zyabunjaka, ibaalu bakabakulwaizya kusinizya kuti Jehova ulazilanganya mbelele zyakwe zyoonse akuti uyakubagwasya muziindi zikatazya. (Int. 55:22; 1 Pet. 5:7) Beembezi bambelele bapakamenyi balakonzya kubagwasya ikuti naa ‘baswena kuli-Leza, eelyo alakwe ulakonzya kuswena kulimbabo,’ aboobo eeci cilakonzya kubakatalusya.—Jak. 4:8; Int. 23:3, 4.
6 Eezyi “zipego kubantu” balizyi nzyobayandika banyina munzila yakumuuya ikapati muciindi ecino camwaka—iciindi ca Ciibalusyo. Elo kaka nciindi cibotu kubaalu kuti babambe bubambe bwaalubazu bwakusoleka kugwasya baabo bakopenyi kutegwa babe alukkomano alimwi akuliiba mumizeezo ikuboola kwiinda mukuyanzana ambungano! Inzya, tulakkomana ciindi notubabona aaba “baciinga calusyomo” kabajanika kumiswaangano yambungano alimwi amumuunda, akukubulusya lusyomo lwabo mucinunuzyo.—Gal. 6:10; Lk. 15:4-7; Joh. 10:11, 14.