Lugwalo Luzwa Ku Kabunga Keendelezya
Mbotwatalika myaka mitaanzi yamumwaanda wamyaka wa 21, tulikkomenyi kaka kumulembela nyoonse “[no]babunyina” nyika yoonse mboizulwa alimwi tulakulumba kubeleka kwanu canguzu nkomucita. (1 Pet. 2:17) Kwamyaka iitandila ku 2000 yainda, Jesu wakabuzya kuti: “Mwati Mwanaa Muntu uzoojana basyomeka aakuboola?” (Lk. 18:8, Ci) Kubeleka kwanu cabusungu nkomwaacita mumwaka wamulimo waamana, ulawiingula mubuzyo wa Jesu ajwi limvwika kapati lyakuti, inzya! Nobamwi mwali kusampaulwa alimwi akufwubaazyigwa akaambo kalusyomo lwanu. Mumasena manji, mwaliyumya mumapenzi manji mbuli aankondo, kusinyikilwa zintu, malwazi naa nzala. (Lk. 21:10, 11) Twamulumba kapati kumulimo ngomubeleka cabusungu, eelyo Jesu ulakonzya kujana ‘bantu basyomeka.’ Masimpe, kuli kutangala kujulu akaambo kaceeci!
Tulizyi kuti ikuliyumya tacili cintu cuuba-uba pe. Amubone buyo masukusyo akabasikila bakwesu kucisi cimwi ca Asia nkwiili kumbo. Kulwana Bakamboni ba Jehova caile kuba cizyo buya mucisi eeco. Ino-ino aawa, bamapulisa bakanyonganya bantu batandila ku 700 bakali amuswaangano. Bantu bali 1,300 tiibakajanika kumuswaangano akaambo kakuti bakasinkilwa abantu babona zyabweende bwamyootokala. Inkamu yabantu bakasamide bahaamankwamu bamwi buya bakali bapulisa, bakanjila mubusena buswaanganinwa, bakabauma basimuswaangano alimwi akubuumpa busena. Alimwi muziindi zimbi, bazikombelo babyaabi bakabauma bakwesu ceetezya azyipulanga zijisi mipikili.
Kupenzyegwa kuli boobu kulatyompya, pele takulamyi. Imwaapostolo Paulo wakalailwa kulemba kuti: “Boonse abo bayanda kupona cakululama muli-Kristo Jesu mbobayoopenzegwa.” (2 Tim. 3:12) Mumwaanda wamyaka wakusaanguna, Banakristo bakaliyumya kukufwubaazyigwa alimwi akukuumwa cakunga bamwi bakali kujaigwa. (Inc. 5:40; 12:2; 16:22-24; 19:9) Ncimwi buyo amumwaanda wamyaka wa 20, alimwi cakutadooneka cinakuzumanana amumwaanda wamyaka wa 21. Nokuba boobo, Jehova waamba kuti: “Taakwe cilwanyo cakapangilwa kuti cizookulwane cizoozwidilila.” (Izaya 54:17, BT) Elo kaka takuliboteli kusyomenzyegwa ooku! Inzya, elo kaka tuli babotu kuli Jehova kweelana ambuli mbwaakaamba kumusinsimi Zekariya kuti: “Uumuguma ulaguma imboni yaliso lyakwe.” (Zek. 2:8) Basinkondo babakombi ba Jehova tabakazwidilili pe. Pele bukombi busetekene buya kuzwidilila!
Mucikonzyanyo, mucisi caambwa kumatalikilo, Bakamboni ba Jehova bakakkomana nobakamvwa kuyungizyigwa kwamyeelwe wabasikumwaya kwaziindi yobile mumwaka wamilimo wa 2001. Ee, bakwesu bazumanana mucisi eeco nokuba kuti kuli buyumuyumu mbubwenya bamwi mbobaujisi kumasena aamwi. Mumwaka wamilimo wamana wanyika yoonse mboizulwa, ansondo kwakali bantu basika ku 5,066 ibakali kutondezya kulyaaba kwabo kuli Jehova kwiinda mukubbapatizyigwa. Lino aaba bapya atoomwe andiswe tulikanzide “[kwiima] nji mbuli balondokede akulamwa mbuzibede zintu zyoonse nzyayanda Leza.”—Kol. 4:12.
Alimwi amubone cakacitika ino-ino kucisi ca Greece. Nokuba kuti kwainda myaka minji yakukazyigwa abacikombelo ca Greek Orthodox Church, Bakamboni ba Jehova lino bazyibwa amfwulumende kuti “ncikombelo cizyibidwe.” Cipepa cakalembwa akuzumizya kuti ncikombelo cizyibidwe, cakayungizya kwaamba kuti, Beteli yaku Greece “ilisetekene alimwi mbusena bwaabidwe kukomba Leza.” Alimwi tulikkomenyi kumuzyibya kuti mwaka wamulimo wamana, nkuta zyazumizya mulimo ooyu mumasi oomo mwali penzi lyakukomba kwesu, mbuli ku Bulgaria, ku Canada, ku Germany, ku Japan, ku Romania, ku Russia alimwi aku United States. Elo kaka tulamulumba Jehova akaambo kakujalula mulyango wakukambauka muzisi eezyi!
Notubona Jehova mbwaagwasya bantu bakwe mumazubaano aakumamanino, twabona kuti taku uumbi Mulongwe mubotu kwiinda nguwe. Tulikkomenyi kucilongwe ncotujisi anguwe kwiinda mukuzyiba kuti ulatuyanda, ulatuyiisya alimwi akutunyona. Inzya, masukusyo kulusyomo lwesu alazumanana. Pele kuti katujisi lusyomo lutazungaani muli Jehova uyakutugwasya. Jakobo wakalemba kuti: “Bakwesu, amuyeeye kuti ncoolwe cipati na mwasikilwa masukusyo aamisyobo misyobo, nkaambo mulizi kuti kusukusigwa kwalusyomo lwanu nkokuleta lukakatilo.” (Jak. 1:2, 3) Aboobo, kuliyumya kwesu kutondezya kuti tulamuyanda Jehova alimwi eeci cituletela lukkomano! Nobakwesu, amuzyibe kwaamba kuti Jehova uyakumugwasya imuntu amuntu. Ikuti twazumanana kusyomeka, ziyume zitete uyakutugwasya kuti tunjile munyika mpya. Uyanda kuti tuzwidilile.
Aboobo, nobakwesu abacizyi, bana alimwi abapati, tumukulwaizya kuti lyoonse kamuyeeya zilongezyo zitaliboteli zili kumpela lyesu. Eelyo atube mbuli bwakali mwaapostolo Paulo wakalemba kuti: “Nkaambo ndayeeya kuti mapenzi aaciindi ecino taakwe makani kumeso aabulemu mbutuzooyubunwidwa.” (Rom. 8:18) Cilayandika kuyaama kuli Jehova ciindi notusikilwa masukusyo. Amuliyumye, mutaleki pe. Masimpe, tamukatyompwi. Ijwi lya Leza litusyomezya kuti: “Muntu uululeme kwiinda mulusyomo lwakwe uyakuzumanana kupona.”—Hab. 2:4, NW.
Tobanyoko,
Kabunga Keendelezya ka Bakamboni ba Jehova