Mbotukonzya Kutalisya Ziiyo zya Bbaibbele Kubantu Mbotwakasiila Mamagazini
1. Ino nimbaakani nzi njotujisi notwaabila mamagazini?
1 Kanji-kanji mu Mujibelo notuli mumulimo twaabila mamagazini aa Ngazi Yamulindizi a Awake! Nokuba boobo, eeyi njenzila yakusaanguna yakusika ambaakani yesu yakuyiisya kasimpe kubantu babombe myoyo. Ansi aawa kuli nzila zyapegwa zitondezya mbotukonzya kwaabila bbuku lya Bbaibbele Ncoliyiisya notupilukila akutalisya ciiyo ca Bbaibbele. Nzila eezi zilakonzya kucinca kweelana acilawo canu alimwi mulakonzya kwaamba mumajwi aanu. Amwaanguluke kubelesya nzila imbi ikuti kaimugwasya.
2. Mbuti mbotukonzya kubelesya mapeeji aakusaanguna aabbuku lya Bbaibbele Ncoliyiisya kutalisya ciiyo ca Bbaibbele?
2 Amubelesye Mapeeji Aakusaanguna: Nomupilukila mulakonzya kwaamba kuti: “Magazini njondakamusiila igamika mizeezo yesu a Bbaibbele. Amubone ikubala Bbaibbele ncokuyandika.” Amubale Isaya 48:17, 18; John 17:3; naa lugwalo lumbi lweelela. Mpoonya, mwamana kumutondezya mwiniŋanda bbuku lya Bbaibbele Ncoliyiisya akumupa bbuku, mulakonzya kuzumanana akwaamba kuti:
◼ “Ibbaibbele lilatupa bulangizi bwini-bwini bwakumbele.” Amumutondezye mwiniŋanda mapeeji 4-5 akumubuzya kuti, “Ncisyomezyo cili akati kazeezi ncomuyanda kuti cikazuzikizyigwe? Amumutondezye cibalo cibandika cisyomezyo camu Magwalo ncaasala alimwi mubufwaafwi amulange-lange muncali omwe naa yobilo ikuti ciindi kaciciliko.
◼ Naa mulakonzya kwaamba kuti, “Ibbaibbele lilapa bwiinguzi kumibuzyo iiyandika kapati mubuumi.” Amumutondezye apeeji 6 akumubuzya ikuti naa kuli naakali libuzyide mibuzyo imwi yayeeyi iili aansi aapeeji eeli. Amujalule acibalo cipa bwiinguzi alimwi mubufwaafwi amubandike muncali omwe naa yobilo.
◼ Ambweni mulakonzya kwaamba mitwe imwi iili mukati akumubuzya ikuti naa kuli imwi yamitwe yamukkomanisya. Amujalule cibalo eeco alimwi mubufwaafwi amumutondezye mbokucitwa ciiyo ca Bbaibbele.
3. Mbuti mbotukonzya kutalisya ciiyo ca Bbaibbele twamana kwaabila mamagazini aamba (a) kubija kwabukkale munyika? (b) mukwasyi? (c) kusyomeka kwa Bbaibbele?
3 Amumubuzye Mubuzyo Mulweendo Lwakusaanguna: Nzila aimwi njakupa kuti mwiniŋanda alibambile mukuswaya kumbi. Mwiniŋanda aazumina mamagazini, amumubuzye mubuzyo akumusyomezya kuti muyoowingula mwaakumuswaya alimwi. Amusole kubikka bumbambe bwakupilukila alimwi akubona kuti ncobeni mwakupiluka kweelana ambomwakasyomezya. (Mt. 5:37) Nomwapilukila, amumuyeezye mwiniŋanda mubuzyo ngomwakabuzyide alimwi mubufwaafwi amubale akubandika bwiinguzi bujanwa mubbuku lya Bbaibbele Ncoliyiisya. Amumupe bbuku alakwe kutegwa katobelezya. Nzyeezi zikozyanyo zisyoonto:
◼ Ikuti magazini njomwakamusiila yaamba kubija kwabukkale munyika, mulakonzya kwaamba kuti, “Lweendo lutobela tuyoobandika bwiinguzi bwamu Bbaibbele kumubuzyo ooyu, Nkucinca kuli buti Leza nkwayoocita anyika?” Amumutondezye mapeeji 4-5 mwaakupilukila. Naa mulakonzya kubuzya mubuzyo ooyu, “Sena mapenzi oonse aaya aacitika nkuyanda kwa Leza?” Mwaakupilukila amukamutondezye mwiniŋanda mincali 7-8 mucibalo 1.
◼ Ikuti magazini njomwakamusiila yakali kwaamba makani aamumukwasyi, kamutanaunka inga mwamubuzya mubuzyo ooyu, “Ino ncinzi aumwi wamumukwasyi ncanga wacita kutegwa buumi bwamumukwasyi kabukkomanisya?” Mwaakupilukila amukalange-lange muncali 4 mucibalo 14.
◼ Ikuti magazini njomwakamusiila yakali kwaamba kusyomeka kwa Bbaibbele, mulakonzya kumubuzya mubuzyo ooyu kutegwa mukaubandike lweendo luccilila, “Sena Bbaibbele lili luzi nolyaamba makani asayansi?” Mwaakupilukila amukabandike muncali 8 mucibalo 2.
4. Ino ncinzi ncotukonzya kucita ikuti mwiniŋanda taliyandi bbuku lya Bbaibbele Ncoliyiisya?
4 Kumamanino aamubandi aumwi, amubuzye mubuzyo aumwi ngomuyooyingula mwaakumuswaya alimwi. Mbocatalikila buyo ciiyo calyoonse, amuliyiiye bbuku cakusitikila kuzwa kumatalikilo kusikila kumamanino. Ino mbuti kuti mwiniŋanda taliyandi bbuku lya Bbaibbele Ncoliyiisya? Mulakonzya kuzumanana kumutolela mamagazini akuba amibandi iizwa mu Magwalo. Nomumugwasya kuti abe aluyandisisyo, mukuya kwaciindi ulakonzya kuzumina kuba aciiyo ca Bbaibbele.
5. Nkaambo nzi ncotweelede kusolekesya kucita zinji muciindi cakusiya buyo mamagazini kubantu?
5 Magazini ya Ngazi Yamulindizi a Awake! ilakonzya kukulwaizya muntu kuyanda kwiiya cini Bbaibbele ncoliyiisya. Aboobo, amubikke bubambe bulibedelede bwakutalisya ziiyo zya Bbaibbele abantu aabo bakaazumina mamagazini. Munzila eeyi, tuyootobela malailile aa Jesu ‘aakuyiisya bantu.’—Mt. 28:19, 20.