Kuyungizya Luzyibo Lwesu Mumulimo Wakukambauka—Kutondezya Mbocicitwa Ciiyo ca Bbaibbele Kwiinda Mukubelesya Bbuku lya Bbaibbele Ncoliyiisya

Ikaambo Ncociyandika: Bantu banji tabakonzyi kumvwisya ncotwaamba ciindi notubaambila kuti tulilibambilide kwiiya abantu ciiyo ca Bbaibbele caaŋanda citabbadelelwi. Balakonzya kuyeeya kuti beelede kunjila mukabunga kakwiiya naa kucita kkoosi imwi. Muciindi cakubalomba buyo kwiiya ambabo, mbuti kuti twabatondezya mbocicitwa ciiyo? Mumaminiti masyoonto buyo, ambweni amulyango mpamunya, mulakonzya kumutondezya muntu mbocili cuuba-uba alimwi ambocikonzya kukkomanisya kwiiya Bbaibbele.

Mbotukonzya kucita oobo:

Mwamana kulipandulula, amumubuzye mukamwini ŋanda ikuti naa ulalibilika kujatikizya buumi bwakumbele.
Amumwaambile kuti bantu banji abalo balalibilika mbubwenya oobo, alimwi amumutondezye mitwe yazibalo izili mubbuku lya Bbaibbele Ncoliyiisya. Amupandulule kuti bbuku eeli lijisi ziiyo zitakatazyi kumvwa zyalo izitondezya ncoliyiisya Bbaibbele kujatikizya zyakumbele alimwi amakani aambi buyo, alimwi amumulombe kuti asale cibalo camukkomanisya.
Amumupe bbuku alimwi akumulomba kuti ajalule cibalo ncaasala. Amupandulule kuti mibuzyo iili kumatalikilo aacibalo ilaingulwa mumincali iitobela.
Amumulombe mukamwini ŋanda kuti abale muncali wakusaanguna kuti naa kaangulukide kucita oobo. Mpoonya amubale mubuzyo wamuncali ooyo alimwi akulanga-langa bwiinguzi antoomwe. Amwaalange alimwi akwaapandulula magwalo aali mumuncali aasinizya kaambo. Amumutondezye bwiinguzi mbomwakeenga mubbuku lyanu.
Amulange-lange muncali uutobela, pele lino amumulombe mukamwini ŋanda kusola kwiingula mubuzyo mumajwi aakwe.
Amumulumbaizye akupangana kuti mukapilukile kuzoomanizya cibalo.
Ikuti kacikonzyeka, amumutondezye kavidiyo a jw.org kajisi mutwe wakuti Ino Ciiyo ca Bbaibbele Cicitwa Buti?

Amusoleke Kucita Eeci Mumwezi Uuno:

Amupaile kuli Jehova kuti amugwasye kutalisya ciiyo ca Bbaibbele cipya.—Flp. 2:13.
Amusole kutondezya mbocicitwa ciiyo ca Bbaibbele kwiinda mukubelesya bbuku lya Bbaibbele Ncoliyiisya naa kutondezya kavidiyo kakuti Ino Ciiyo ca Bbaibbele Cicitwa Buti? andiza ciindi comwe buyo nomuli mumulimo wakukambauka.