Kuyungizya Luzyibo Lwesu Mumulimo Wakukambauka—Kwaabila Bbuku lya Bbaibbele Ncoliyiisya

Ikaambo Ncociyandika: Ibbuku lya Bbaibbele Ncoliyiisya ncibelesyo ciyandika kapati notuyiisya bantu. Nokuba boobo, katutanatalika kulibesya kwiiya amuntu umwi, tweelede kusaanguna kumwaabila ndilyo. Aboobo, toonse tweelede kusolekesya kuzyiba mbotukonzya kulyaabila kabotu bbuku lya Bbaibbele Ncoliyiisya mumulimo wakukambauka. (Tus. 22:29) Kuli nzila zinji zikonzya kubelesyegwa, aboobo basikumwaya beelede kubelesya nzila iibabelekela kabotu.

Mbotukonzya Kucita Oobo:

Amubuzye mubuzyo umwi uukonzya kupa kuti mukamwini ŋanda abe aluyandisisyo mucibalo cimwi cili mubbuku. Mulakonzya kusala nouba mubuzyo omwe akati kayeeyo iili kumatalikilo aacibalo cimwi acimwi. Mwamana kumvwa bwiinguzi bwamukamwini ŋanda, amubale lugwalo lweelela mpoonya akumutondezya muncali uubandika makani aayo, ambweni mulakonzya kuubandika antoomwe.
Nzila aimbi njakubelesya mapeeji aali kumatalikilo kutegwa mumupe kuba aluyandisisyo, mpoonya amumutondezye mukamwini ŋanda mpobujanika bwiinguzi bwamu Bbaibbele mubbuku. Mucikozyanyo, mulakonzya kwaamba ntenda yakacitika caino-ino iyakaambwa muli sikapepele mpoonya akupandulula kuti bantu banji balakatazyigwa kujatikizya bwiinguzi bwamibuzyo iili apeeji 3. Naa inga mwaamba kuti, muyaabuswaya basimukobonyoko kutegwa mubaambile zintu zibotu iziyoocitika kumbele. Mpoonya amumutondezye zifwanikiso izili apeeji 4-5 akumubuzya kuti, “Ino ncisyomezyo cili akati kazyeezi ncomunga mwayanda kuti mukacibone kacizuzikizyigwa?” Nzila iimbi njakwaamba kuti muyaabuswaya bantu kwakaindi kasyoonto kutegwa mubagwasye kujana bwiinguzi bwamibuzyo iikatazya kapati mubuumi. Mpoonya amumutondezye mukamwini ŋanda mibuzyo iili aansi aapeeji 6, akumubuzya kuti nguuli ngwayanda kapati akati kayeeyi.
Amubelesye nzila yacigaminina kutalisya ciiyo ca Bbaibbele. Mulakonzya kwaamba kuti: “Tuyabutondezya basimukoboma bbuku eeli ligwasya kwiiya Bbaibbele. Sena mwakalibona kale? [Amulindile bwiinguzi.] Ikuti kamujisi maminiti masyoonto buyo, inga ndamutondezya mbolikonzya kubelesyegwa kwiinda mukubelesya Bbaibbele lyanu.”

Amusole Kucita Eeci Mwezi Uuno:

Amusole kucita citondezyo nomucita kukomba kwanu kwamumukwasyi.
Ciindi nomuli mukukambauka, amubandike abasikumwaya bambi nzyomuyanda kuyakwaamba. (Tus. 27:17) Amwiicince ntalisyo yanu kuti kaitakonzyi kugwasya kapati.