Sena Mwakabatondezya Mbotwiiya Bbaibbele Mukuswaya Kwakusaanguna?
Ikuti mwabaambila kuti mutalike kwiiya Bbaibbele, bamwi baamba kuti tabayandi naa kuti balaliiya Bbaibbele kucikombelo cabo. Akaambo kakuyeeya kuti tatwiindene azikombelo zimwi caboola kukuyiisya Bbaibbele, tabazyi kuti nzyotuyiisya zilakonzya kubagwasya akupa kuti bazyibe zinji. Aboobo, muciindi cakubaambila buyo kuti mulakonzya kubayiisya, amubatondezye kwaciindi cisyoonto mukuswaya kwakusaanguna mbotwiiya Bbaibbele. Mucikozyanyo: Mutabaambili buyo kuti mulicizyi kujika aboobo muya kuboola alimwi akubaletela nzyomuya kujika; amubape balabile mpoona aawo! Mboobu mbomukonzya kucita boobo muciindi cisyoonto kwiinda mukubelesya nzila iili mu Mulimo Wesu wa Bwami wa January 2006 apeeji 6.
“Sena muyeeya kuti kuli buzuba imajwi aaya naayoozuzikizyigwa? [Amubale Isaya 33:24, alimwi amulindile bwiinguzi.] Andimutondezye cintu cimwi cikkomanisya kujatikizya makani aaya.” Amupe mukamwini ŋanda ibbuku lya Bbaibbele Ncoliyiisya akumutondezya apeeji 36, muncali 22. Amumubalile mubuzyo uuli aansi aapeeji, alimwi amumwaambile kuti ajane bwiinguzi nabala muncali. Mpoonya amumubuzye mubuzyo alimwi akuswiilila bwiinguzi bwakwe. Amubalile antoomwe lugwalo alumbi. Amubabuzye mubuzyo ngomuya kwiingula mwaakujoka alimwi amumvwane buzuba mbomuya kubaswasya alimwi. Ooku nkokutalika ciiyo ca Bbaibbele.