Mbomukonzya Kuyiisya Bapya Kukambauka
1. Ino mwakalimvwa buti buzuba bwakusaanguna nomwakaunka mumulimo wakukambauka?
1 Sena muliyeeyede buzuba bwakusaanguna nomwakaunka mumulimo wakukambauka kuŋanda aŋanda? Cakutadooneka, mwakalilibilikide kapati. Ikuti naa mwakali kubeleka amukwesu naa mucizyi wakali kumuyiisya Bbaibbele naa sikumwaya umwi, cakutadooneka mwakakkomana kugwasyigwa anguwe. Mbwaanga lino mwaba aluzyibo, andinywe mulakonzya kugwasya bapya kwiiya mulimo wakukambauka.
2. Ino ncinzi ncobeelede kwiiya basikumwaya bapya?
2 Basikumwaya bapya beelede kwiiya mboitalikwa mibandi, mbolibelesyegwa Bbaibbele, mbozicitwa nyendo zyakupilukila, mbozitalikwa alimwi ambozisololelwa ziiyo zya Bbaibbele. Alimwi beelede kwiiya ambazu zimwi zyamulimo wakukambauka, mbuli bukambausi bwamumugwagwa alimwi akukambaukila mumasena aamakwebo. Mulakonzya kubagwasya kuzwidilila mumbazu eezyi kwiinda mucitondezyo canu alimwi amizeezo njomubapa.
3. Ino inga twabagwasya buti bamwi kwiinda mucikozyanyo cesu?
3 Amubayiisye Kwiinda Mukubapa Citondezyo: Jesu wakabatondezya basikwiiya bakwe mbobakeelede kukambauka. (Lk. 8:1; 1 Pet. 2:21) Ikuti kamujisi bubambe bwakubeleka asikumwaya mupya, amulibambile nzila nguba-uba yakutalisya mubandi yalo sikumwaya njakonzya kwiiya, ambweni kwiinda mukubelesya nzila zijanwa mumabbuku eesu. Mwamana amusaangune kutalisya mubandi kumuntu wakusaanguna ambweni awabili kutegwa sikumwaya amvwe mbomuti ambe. Nomutanasika aŋanda imwi, mulakonzya kumubuzya sikumwaya kuti aambe naa nzila njomwabelesya ilagwasya. Eeci inga camugwasya kubona mbociyandika kubeleka abamwi mumulimo wakukambauka alimwi inga mwapa kuti cimuubile kuzumina mizeezo njomukonzya kumupa amana kupa bumboni.
4. Ino mbuti mbotukonzya kumugwasya sikumwaya mupya twamana kuswiilila mbwakambauka?
4 Amupe Mizeezo: Jesu wakabapa malailile basikwiiya bakwe kujatikizya mbobakeelede kukambauka. (Mt. 10:5-14) Mulakonzya kumugwasya sikumwaya mupya munzila njiyona eeyi. Kuti casika ciindi cakuti awalo akambauke, amuswiililisye. Mpoonya mwazwa waawo, amumulumbaizye kuzwa ansi aamoyo, nokuba kuti mwabona kuti kuli mpayandika kubelekela. Kamutana kumupa muzeezo, mulakonzya kumulangilila akubona kuti naa ulalubizya alimwi amulyango uutobela. Andiza inga kwali kuyoowa buyo. Alimwi amuzyibe kuti basikumwaya baliindene alimwi kuli nzila zinji ziluzi zyakucita cintu cimwi.—1 Kor. 12:4-7.
5. Ncinzi ncotukonzya kwaamba notubweza ntaamu yakupa mizeezo yesu?
5 Zimwi ziindi sikumwaya mupya ulakonzya kumubuzya ncayelede kucita. Pele ikuti tanaamubuzya, amubweze ntaamu yakumugwasya. Ino mbuti mbotukonzya kucita boobo munzila yabupampu? Basikumwaya bamwi bacibwene babuzya buyo kuti, “Sena mulayanda ndimupe muzeezo?” naa kuti “Ino mwaubona buti mubandi ngotwajisi?” Inzila imwi mbomukonzya kwaamba mboobu, “Nindakacili sikumwaya mupya, cakali kundikatazya ku . . . , pele ndakabona kuti cilagwasya ku . . .” Zimwi ziindi cilagwasya kubalila antoomwe twaambo tulembedwe mumabbuku eesu. Kutegwa atakopani, amumupe buyo muzeezo omwe kujatikizya mbwaakambauka.
6. Kujatikizya mulimo wakukambauka, ino mbuti ‘lubulo mbolunona [naa kukwenga] lubulonyina’?
6 Lubulo Lukwenga Lubulonyina: Timoteo, mukambausi wakajisi luzyibo, wakakulwaizyigwa a Paulo kuti azumanane kusungwaala kuyiisya akuya ambele. (1 Tim. 4:13, 15) Nokuba kuti kwainda myaka minji kuzwa nimwakatalika kukambauka, tamweelede kucileka kuzumanana kuyaambele mukuyiisya kwenu. Amwiiye kuzwa kuli basikumwaya bamwi, nobaba baabo batako luzyibo kapati mumulimo, alimwi calubomba amube aluyandisisyo lwakugwasya bamwi, kwaambisya bapya kutegwa babe babelesi bamakani mabotu bacibwene kumutwe.—Tus. 27:17.