Kuyungizya Luzyibo Lwesu Mumulimo Wakukambauka—Kuba Sikugwasyilizya Mubotu

Ikaambo Ncociyandika: Jesu wakalizyi mbociyandika kuba amuntu wakubeleka limwi mubukambausi. Aboobo, ciindi naakatuma basikwiiya bakwe bali 70 kumbele lyakwe mumulimo wakukambauka, wakabatuma bobilo-bobilo. (Lk. 10:1) Sikumwaya ulakonzya kumugwasya ngwabeleka limwi ikuti wajana bukkale bukatazya naa ikuti tazyi bwini mbwakonzya kumwiingula mukamwini ŋanda. (Muk. 4:9, 10) Ulakonzya kumwaambila mbwacita walo alimwi zimwi ziindi akumwaambila nzila zikonzya kumugwasya ooyo ngwabeleka limwi kutegwa ayungizye luzyibo lwakwe mukukambauka. (Tus. 27:17) Alimwi ulakonzya kumukulwaizya kwiinda mukuba amibandi iiyaka ciindi nobeenda kuya kuŋanda iimbi.—Flp. 4:8.