Amube Sikugwasyilizya Mubotu Nomubeleka Abamwi
1. Mbuti mbotukonzya kwiiya cikozyanyo camwaapostolo Paulo ciindi notubeleka abamwi mumulimo wamumuunda?
1 Mwaapostolo Paulo wakali kucibona kuba coolwe ‘cakuyumizyanya’ ciindi naakali kuba antoomwe abasyominyina. (Lom. 1:12) Ciindi nomubeleka asikumwaya umwi mumulimo wakukambauka, sena mulacibelesya ciindi eeci kumuyumya-yumya alimwi akumugwasya? Muciindi cakuumuna buyo ciindi nomubeleka abamwi, mulakonzya kwaamba zyintu izimugwasya nywebo kuba sikumwaya uucibwene.
2. Ncinzi ncotukonzya kucita kutegwa tugwasye ngotubeleka limwi mumuunda kuba sicamba, alimwi nkaambo nzi ncociyandika kucita oobo?
2 Amubagwasye Kuba Basicamba: Basikumwaya banji cilabayumina kuba basicamba, eeci cilalibonya kwiinda mbobalibonya kubusyu naa mbobaambaula. Tulakonzya kubagwasya kuba basicamba kwiinda mukubalumbaizya camoyo woonse. Ino nzyintu nzi azimwi nzyotukonzya kucita kutegwa tubagwasye kuba basicamba? Mulangizi weendeenda umwi cakwaanguluka ulabaambila mbabeleka limwi kuti inga ulalibilika alimwi akuti ulapaila ciindi aciindi kutegwa akuzunde kulibilika. Mukwesu umwi wakaamba boobu kujatikizya cimugwasya kuba sicamba: “Ndisaanguna kumweta-mweta. Zimwi ziindi tuyandika kupaila kutegwa tucikonzye kumweta-mweta.” Sena kuli cimugwasya kuba basicamba nomuli mumulimo wamumuunda? Amumwaambile ngomubeleka limwi mumuunda.
3. Ncinzi ncotukonzya kumwaambila ngotubeleka limwi cikonzya kumugwasya kuzwidilila mumulimo wamumuunda?
3 Amwaambilane Nzila Nzyomubelesya: Sena mwakajana kuti cilagwasya kutalisya mubandi kwiinda mukwaamba majwi masyoonto buyo naa kubuzya mubuzyo, ambweni kujatikizya zicitika mucilawo? Sena mwakatalisya kale mubandi kwiinda mukwaamba majwi aanu kumwi kamubelesya citondezyo cacikozyanyo icizwidilila? Amumwaambile ngomubeleka limwi. (Tus. 27:17) Ciindi nomucita nyendo zyakupilukila, mulakonzya kwaamba ncomuyoobandika alimwi ambomuyoocita oobo. Camana ciiyo ca Bbaibbele, mulakonzya kwaamba capa kuti musale kaambo kamwi, lugwalo, naa nzila yakuyiisya kutegwa mugwasye muntu ngomuyiisya.
4. Nkaambo nzi ncotweelede kubikkila maano kugwasya bakambausima?
4 Bakambausi bamumwaanda wamyaka wakusaanguna tiibakali kugwasya buyo bantu batasyomi. Pele bakali kukulwaizyanya akuyumizyanya mulicabo. (Mil. 11:23; 15:32) Mwaapostolo Paulo wakamuyiisya Timoteo alimwi akumukulwaizya kwaambila bamwi nzyaakaiya. (2 Ti. 2:2) Ciindi notucitila Banakristoma zyintu zibotu notuli mumuunda, tatuyungizyi buyo lukkomano lwabo alimwi akubapa kuba aluzyibo mukuyiisya, pele alimwi tukkomanisya Taateesu wakujulu.—Heb. 13:15, 16.