Amube Sikugwasyilizya Mubotu Nomukambauka Kuŋanda Aŋanda
1. Ino mbubotu nzi mbotukonzya kujana kwiinda mukubeleka aasikumwaya umwi mumulimo wakukambauka?
1 Ciindi cimwi, Jesu wakatuma basikwiiya bali 70 kuya kukambauka, alimwi “wakabatuma bobile bobile.” (Lk. 10:1) Cakutadooneka ibubambe oobu bwakapa kuti basikwiiya bakwe bagwasyanye akukulwaizyanya nobakali kuya bukambauka. Ino mbuti mbotukonzya kugwasya ciindi notubeleka asikumwaya umwi mumulimo wakukambauka?
2. Sikumwaya ngotubeleka limwi nakambauka, ino nkaambo nzi ncotweelede kubikkila maano alimwi ino mbuti mbotukonzya kucita boobo?
2 Kwiinda Mukuswiilila: amuswiilile amoyo woonse ciindi sikumwaya umwi nakambauka. (Jak. 1:19) Amutobelezye mu Bbaibbele lyenu ciindi lugwalo nolubalwa. Amulange muntu waambaula, abe sikumwaya naa mukamwini ŋanda. Ikuti kamubikkila maano kumubandi, muya kupa kuti mukamwini ŋanda acite mbubwenya awalo.
3. Ino ndilili sikumwaya ngotubeleka limwi nakonzya kuyanda kuti tunjile mumubandi?
3 Kwiinda Mukuba Abupampu Bwakuzyiba Notweelede Kwaambaula: Ciindi notuli asikumwaya uukambaukila muntu umwi, tumupa bulemu kwiinda mukumulekela kuti asololele mumubandi. (Rom. 12:10) Tatweelede kumunjila mukanwa. Ikuti naa sikumwaya wasweeka naa ikuti mukamwini ŋanda uyanda kukosokezya mubandi naa wabuzya mubuzyo alimwi sikumwaya ngotubeleka limwi watulomba kuti tumugwasye, tweelede kuzumanana amubandi ngwaajisi muciindi cakutalisya makani aambi. (Tus. 16:23; Muk. 3:1, 7) Notutola lubazu mukwaambaula, nzyotwaamba zyeelede kweendelana amulumbe uupegwa.—1 Kor. 14:8.
4. Ino ncinzi cikonzya kupa kuti tukkomane akuzwidilila mumulimo wakukambauka?
4 Basikwiiya bakali mutubunga tuli 35 nobakamanizya kukambauka, bakajokela “akubotelwa.” (Lk. 10:17) Andiswe tulakonzya kukkomana akuzwidilila mumulimo wakukambauka ikuti katujisi bupampu bwakuzyiba notweelede kwaambaula notubeleka asikumwaya umwi mumulimo wakuŋanda aŋanda.