Kuyungizya Luzyibo Lwesu Mumulimo Wakukambauka—Kuyiisya Bapya

Ikaambo Ncociyandika: Basikwiiya ba Jesu bapya beelede kwiiya kutobela “zintu zyoonse” nzyaakalailila, calo icibikkilizya akuyiisya bamwi kasimpe. (Mt. 28:19, 20) Basikwiiya banji bapya baleelela kulilembya mu Cikolo Camulimo Weendelezyegwa a Leza alimwi ambweni bakapa kale bumboni bwamukwiizya kubanamukwasyi naa balongwe babo. Nokuba boobo, mbobayaabuzimvwisya zintu nzyobaiya alimwi akuzyiba kuti Jehova uyanda kuti bantu boonse baamvwe makani mabotu, balakonzya kwaamba kuti bayanda kutalika kutola lubazu mumulimo wakukambauka. (Rom. 10:13, 14) Ciindi bapya nobazumizyigwa kuti lino beelela kuba basikumwaya batanabbapatizyigwa, kubayiisya kabotu kuyoobagwasya kuba basicamba nobabweza ntaamu eeyi iiyandika kapati yakuyaambele kumuuya.—Lk. 6:40.