Awake! Yaalubazu Iiyooabilwa mu November!
1 Bantu banji balijisi mibuzyo kujatikizya bubotu bwa Bbaibbele. Ikuti naa mbantu bakalilemba, mbuti mbolikonzya kwaambwa kuti ndi Jwi lya Leza? Nkaambo nzi ncondeelede kulisyoma kuti lilakonzya kusololela ntaamu zyangu? Ikuti ndakalibala akuliiya Bbaibbele, ino nzilongezyo nzi zikonzya kuboola akaambo kakucita boobo? Mbusanduluzi nzi bwa Bbaibbele mbondeelede kubelesya? Eeyi njemibuzyo imwi iiyooingulwa mu Awake! yaalubazu ya November iijisi mutwe wakuti “Sena Inga Mwalisyoma Bbaibbele?”
2 Tuyanda kuyooabila Awake! eeyi yaalubazu mucilawo cesu coonse. Ikuti kwayandika, amutole lubazu mumulimo wakuŋanda aŋanda antoomwe ambungano mubuzuba bwa Mujibelo abumwi mumwezi wa November. Amubatondezye Awake! eeyi bamukwasyi wanu, basimukobonyoko, mbomubeleka limwi, bamayi, mbomwiiya limwi anomucita nyendo zyakupilukila. Amwaanyamunizye nomuunka kumantoolo anomuunka kwaakuswaya. Ibakumutabi bakamutumina mamagazini aayindilila kuli ngomooda kutegwa bamumbungano bakabe amamagazini manji.
3 Amutalisye Ciiyo ca Bbaibbele: Ikuti mwasiya magazini, amwaambe kaambo nkomuyoobandika lweendo lutobela akusoleka kutalisya Ciiyo ca Bbaibbele kamutanamanizya mubandi wanu. Mucikozyanyo, mulakonzya kwaamba kuti, “Ndaakuboola, ndiyanda kuti nkamutondezye bwiinguzi bwamu Bbaibbele kumubuzyo ooyu, ‘Makanze nzi Leza ngajisi kunyika?’” Mwaakuunka alimwi, amukatoleezye bbuku lya Bbaibbele Ncoliyiisya akumutondezya mwiniŋanda mapeeji 4-5, naa mincali 1-3 mucibalo 3. Nzila imwi inga mwaamba kuti, “Ndaakuboola alimwi, ndiyanda kuti tukabandike businsimi bwamu Bbaibbele buzuzikizigwa lino.” Mwaakupilukila, amukamutondezye mwiniŋanda cibalo 9 cabbuku akubandika anguwe mincali 1-3. Ambweni mulakonzya kumwaambila mwiniŋanda kuti: “Bantu banji cilabayumina kumvwisya nzyobabala mu Bbaibbele. Ndaakuboola, ndiyanda kuti nkamutondezye mbomukonzya kulimvwisya kabotu Bbaibbele lyanu.” Mwaakupilukila, amukamutondezye bbuku lya Bbaibbele Ncoliyiisya akumutondezya mboliyiigwa.
4 Ndi Bbaibbele buyo lelikke lijisi “magwalo aasalala,” aakonzya ‘kutusongwaazya mukufwutulwa.’ (2 Tim. 3:15) Aboobo, toonse tuyanda kwaakutola lubazu cabusungu mukwaabila magazini eeyi yaalubazu ya Awake! kutegwa tukagwasye bantu kuba alusyomo mu Bbaibbele!