Awake! Yaalubazu Iiyooabilwa mu September
1 Bantu banji balakukkomanina kulila kwatuyuni alimwi akulanga mbolibbila zuba. Nokuba boobo, ibanji balakakilwa kuziba kuti Taata wakujulu siluyando nguwakalenga zintu eezi. Tuyooba aciindi cilibedelede cakupa bumboni kuti Jehova mmulengi kwiinda mukwaabila Awake! yaalubazu. (Is. 40:28; 43:10) Awake! ya September ibandika kapati kaambo kakuti “Sena Kuli Mulengi?”
2 Mucilawo: Ikuti kamukonzya, amubikke bubambe bwakutola lubazu antoomwe ambungano mumulimo wakuŋanda aŋanda mubuzuba bwamu Mujibelo buli boonse. Masimpe, mulakonzya kwaabila magazini yaalubazu imazuba aamwi mukati kansondo. Bamayi abamwi babeleka mucibeela calwiiyo bayooikkomanina kapati magazini eeyi. Aboobo, mulakonzya kubikka bubambe bwaalubazu bwakubaswaya bantu bamusyobo ooyu ibali mucilawo canu.
3 Ikuti muntu watondezya luyandisisyo, amumusiile mubuzyo ngomuyooyingula mukuswaya kutobela. Mucikozyanyo, mulakonzya kubuzya mubuzyo uujatikizya ikaambo Mulengi siluyando ncakonzya kulekela kupenga kunji boobu. Mpoonya, mwaakupilukila, mulakonzya kumutondezya cibalo 1 naa cibalo 11 cabbuku lya Bbaibbele Ncoliyiisya. Ambweni inga mwasala kubuzya mubuzyo uujatikizya makanze ngajisi Mulengi kujatikizya nyika, mpoonya akuyoolanga-langa cibalo 3 mwaakupilukila.
4 Kucikolo: Ikuti kamuli basicikolo, amukaabile Awake! yaalubazu kuba cipego kuli bamayi banu alimwi abasicikolonyoko. Kusiya magazini adesiki ndyomukkala kulakonzya kupa bamwi kubuzya mibuzyo kujatikizya nzyotusyoma. Muyooba aziindi zyakubelesya twaambo tuzwa mumagazini eeyi kujatikizya lusyomo lwanu mumubandi wamucikolo alimwi anomulibambila kulemba mulaso. Magazini eeyi ijisi cibeela cikonzya kumugwasya cakuti “Bakubusi Balabuzya” icijisi mutwe wakuti, “Ino Mbuti Mbondikonzya Kwiiminina Lusyomo Lwangu Lwakuti Zintu Zyakalengwa Buya?”
5 Jehova weelede kulemekwa akaambo kazintu nzyaakalenga. (Ciy. 4:11) Tulakonzya kumulemeka Mulengi wesu alimwi akugwasya bamwi kucita mbubonya oobo kwiinda mukwaabila Awake! yaalubazu ya September cabusungu.