Bubuke bwa Jesu Bwakapa Kuti Bantu Bakabe Abuumi Butamani!
BUBUKE bwa Jesu tacili buyo cintu cakacitika kaindi citakwe mpindu kulindiswe mazuba aano. Mwaapostolo Paulo wakaamba bubuke bwa Jesu mbocili cintu ciyandika kapati ciindi naakalemba kuti: “Kilisito wakabusyigwa kubafwu, walo uuli ngomicelo mitaanzi yabaabo bakoona mulufwu. Nkaambo mbwaanga lufwu lwakaboola kwiinda mumuntu omwe, abwalo bubuke bwabafwu bulaboola kwiinda mumuntu omwe. Nkaambo mbubonya muli Adamu boonse balafwa, mbubonya buyo muli Kilisito boonse bayoopegwa buumi.”—1 Bakolinto 15:20-22.
Jesu wakabusyigwa mu Nisani 16, 33 C.E., buzuba mbubwenya ba Juda nibakali kutuula micelo mitaanzi yazisyango zyabo kuli Jehova Leza mucipaililo catempele ku Jerusalemu. Kwiinda mukwaamba kuti Jesu micelo mitaanzi, Paulo wakali kupandulula kuti kuli bantu bamwi bayoobusyigwa kuzwa kubafwu.
Majwi aa Paulo aatobela alapandulula icakakonzyeka kwiinda mububuke bwa Jesu. Paulo wakaamba kuti: “Mbwaanga lufwu lwakaboola kwiinda mumuntu omwe, abwalo bubuke bwabafwu bulaboola kwiinda mumuntu omwe.” Akaambo kacibi alimwi akutalondoka nkotwakakona kuli Adamu, toonse tulafwa. Nokuba boobo, kwiinda mukwaaba buumi bwakwe bulondokede kacili cinunuzyo, Jesu wakapa kuti bantu baangununwe kuzwa kubuzike bwacibi alufwu kwiinda mububuke. Mubufwaafwi, Paulo wakalemba boobu mulugwalo lwa Baloma 6:23: “Cakuvwola ncocipa cibi ndufwu, pele cipego ncapa Leza mbuumi butamani kwiinda muli Kilisito Jesu Mwami wesu.”
Jesu lwakwe wakapandulula ncolwaamba kulindiswe lufwu alimwi abubuke. Kalyaamba lwakwe, Jesu wakati: “Mwana wamuntu weelede kusumpulwa, kutegwa muntu uuli woonse uumusyoma akabe abuumi butamani. Nkaambo Leza wakaiyanda kapati nyika cakuti wakapa Mwanaakwe simuzyalwaalikke, kutegwa muntu uuli woonse uumusyoma atakanyonyoonwi pele akabe abuumi butamani.”—Johane 3:14-16.
Amuyeeye buyo—kuba abuumi butamani ibunyina zicisa, kupenga, alimwi akuusa! (Ciyubunuzyo 21:3, 4) Elo kaka mbulangizi bukkomanisya oobo! Syaabupampu umwi wakaamba boobu: “Nokuba kuti kunamaumbwe kulakonzya kuyeezya muntu mbobuli bufwaafwi buumi, bubuke butusyomezya kuti lufwu ndwaciindi buyo cisyoonto.” Masimpe, bubuke bwa Jesu bwaamba buumi!
[Cifwanikiso icili apeeji 7]