AMUBAYIISYE BANA BANU
Petro a Hananiya Bakabeja ino Ncinzi Ncotukonzya Kwiiya?
Mbubwenya mbomuzyi kale, kubeja nkwaamba makani ngomuzyi kuti taali aamasimpe. Sena kuli nomwakaambide makani aakubeja?—a Nobaba bantu bapati bamwi bamuyanda Leza bakabeja. Ambweni kuli muntu wamu Bbaibbele ngomuzyi kuti wakabeja. Izyina lyakwe ngu Petro, umwi wabaapostolo ba Jesu bali 12. Atuswiilile makani aajatikizya cakamupa kubeja.
Jesu naakaangwa, wakatolwa kuŋanda yamupaizi mupati. Ciindi cakaliindide kale akati kamasiku. Petro wakanjila mulubuwa lwaŋanda yamupaizi kakunyina muntu wakamuzyiba. Akaambo kamumuni wamulilo, mubelesi musimbi wamupaizi mupati iwakanjizya Petro mulubuwa wakamuzyiba. Wakaamba kuti: “Ayebo mwakali limwi a Jesu.” Akaambo kakuyoowa, Petro wakakazya.
Bbaibbele lyaamba kuti nokwakainda ciindi “aumwi musimbi wakamuzyiba.” Wakaamba kuti: “Muntu ooyu wakali limwi a Jesu.” Alimwi Petro wakakazya. Nikwakainda kaindi kaniini, bamwi bakaunka kuli Petro akwaamba kuti: “Masimpe ayebo uli umwi wabo.”
Petro wakayoowa. Aboobo kwaciindi catatu wakabeja akwaamba kuti: “Tandimuzyi pe muntu ooyo.” Mukombwe wakalila. Jesu wakamulanga Petro, eelyo Petro wakayeeya ikuti mawoola buyo masyoonto aakaindide, Jesu wakamwaambilide kuti: “Mukombwe katanalila, ulandikaka ziindi zyotatwe.” Mpoonya Petro wakalila akuusa kapati!
Sena cintu cili boobu inga camucitikila?— Mulakonzya kuti kamuli kucikolo, mpoonya mwamvwa basicikolo kababandika kujatikizya Bakamboni ba Jehova. Umwi waamba kuti, “Tabasalyuti ndembela.” Umwi wayungizya kuti, “Tabalwanini cisi cabo.” Mpoonya umwi alimwi waamba kuti, “Tabali Banakristo bakasimpe nkaambo tabasekeleli Kkilisimasi.” Mpoonya umwi wamubuzya kuti, “Sena nduwe Kamboni wa Jehova?” Ino inga mwaamba kuti nzi?—
Mweelede kulibambilila limwi kupa bwiinguzi bubotu kacitanacitika cintu cili boobu. Petro tanaakalibambilide. Naakafundilizyigwa, wakabeja! Pele wakausa kujatikizya ncaakacita, aboobo Leza wakamulekelela.
Hananiya, sikwiiya wa Jesu uumwi wakusaanguna, awalo wakabeja. Pele Leza tanaakamulekelela antoomwe amukaintu wakwe, Safira. Bakapangana amulumaakwe kuti babeje. Atubone kaambo Leza ncaatakabalekelela ba Hananiya a Safira.
Nikwakainda mazuba aali kkumi kuzwa ciindi Jesu naakasiya baapostolo bakwe kujokela kujulu kuli Leza, bantu bali 3,000 bakabbapatizyigwa ku Jerusalemu. Bunji bwabo bakazwa kumasena aakule kuti bazoosekelele Pobwe lya Pentekoste, alimwi nibakaba basikwiiya ba Jesu bakayanda kuti bakkale kutegwa baiye zinji kujatikizya lusyomo lwabo lupya. Aboobo basikwiiya ba Jesu bamwi bakabelesya mali aabo kubalanganya.
Hananiya amukaintu wakwe bakasambala zyintu kutegwa bajane mali aakugwasya bantu bakabbapatizyigwa. Hananiya naakaaleta mali kubaapostolo, wakaamba kuti ngamali oonse ngobakasambala zyintu. Pele wakabeja! Mali aamwi wakaayobola kutegwa aabelesye. Leza wakazyibya Petro makani aaya, aboobo Petro wakaambila Hananiya kuti: “Tiiwacenga bantu pe, pele wabeja kuli Leza.” Mpoonya aawo, Hananiya wakawida ansi akufwa! Nikwakainda mawoola otatwe, mukaintu wakwe wakaboola. Katazyi cacitikila balumi bakwe, awalo wakabeja mpoonya wakawida ansi akufwa.
Eelo kaka ciiyo eeci ncipati: Kwaamba masimpe cilayandika kapati! Inzya toonse tweelede kwiiya ciiyo eeci! Pele toonse tulalubizya, kwaambisya notucili bana. Sena tamukkomene kuti Jehova ulamuyanda akuti uyoomulekelela mbuli mbwaakacita kuli Petro?— Pele kamuyeeya kuti tweelede kwaamba masimpe. Alimwi kuti twabeja, tweelede kumulomba, inzya, kumukombelezya Leza kuti atulekelele. Kweelede kuti eeci ncaakacita Petro aboobo wakalekelelwa. Ikuti twasolekesya kutabeja alimwi, Leza uyootulekelela aswebo!
Amubale mu Bbaibbele Lyanu
Milimo 2:38-42; 4:32-37; 5:1-11
[Bupanduluzi buyungizidwe]
a Ikuti kamubala amwana, keengo kamuyeezya kuti mweelede kwiima asyoonto akukulwaizya mwanaanu kuti aambe mbwalimvwa.