Sena Inga Mwabusyoma Bukombi Mumakani Aajatikizya Kulilemeka?
“Ba Sylvia ibabeleka mulimo wakulanganya baceembede, bakaamba kuti: “Ndakaunka kukkoleji abantu banji ibakali kulyaamba kuti mbakombi. Pele, bakali kubelesya misamu iitazumizyidwe alimwi bakali kubeja ciindi nitwakali kulemba misunko. Bukombi kunyina nobwakali kubajatikizya mubuumi bwabo.”
Mwaalumi umwi uutegwa Lionel wakaamba kuti: “Babelesima balabeja alimwi akwaamba kuti baciswa kakuli kuti tabacisidwe ncobeni. Bukombi ncintu buyo ncobajisi pele ncobatabelesyi—cili mbuli zyuuno zyakaulilwa buyo kulibonesya.”
Bukombi kunyina nobubakulwaizya bantu banji kutobela zyeelelo zyakulilemeka mubuumi bwabo. Banji mazuba aano balibonya mbuli kuti “balilyaabide mubukombi” pele “nguzu zyambubo balazikazya.” (2 Timoteyo 3:5) Basololi babo bazikombelo tabapi cikozyanyo cibotu, nokuba kupa butanga bwabo lulayo lwamu Magwalo lweelede kutegwa kabapona kweelana azyeelelo zyakulilemeka. Tacidoonekwi kuti bantu banji bayeeya kuti Leza kunyina nabikkila maano kujatikizya buumi mbobapona.
INO NCINZI BBAIBBELE NCOLIYIISYA?
Ibbaibbele litondezya kuti Leza ulaambwalimvwa alimwi akuti micito yesu ilamujatikizya kapati. Ciindi bana Israyeli bansiku nobakamuzangila Leza, ‘bakamukalazya.’ (Intembauzyo 78:40) Nokuba boobo, kulaba ‘kukondwa kupati kujulu’ ciindi muntu naleka bukkale bwakwe bubi. (Luka 15:7) Ciindi muntu nazyiba bube bubotu bwa Taateesu wakujulu, luyando lwakwe kuli Leza lulakomena, akumukulwaizya kuyanda zyintu Leza nzyayanda alimwi akusulaika zyintu Leza nzyasulaika.—Amosi 5:15.
INO BAKAMBONI BA JEHOVA BACITA BUTI MUMAKANI AAYA?
Muteende umwi uutegwa The Deseret News waku Salt Lake City, Utah, U.S.A. wakaamba kuti: “Bakamboni ba Jehova bagwasya bantu kuti kabamvwana mumikwasyi, kabagwasya bamwi alimwi akuba balelwa basyomeka.” Muteende wakayungizya kwaamba kuti: “Bantu babo batobela njiisyo zisumpukide zyakulilemeka. Basyoma kuti kufweba, kuciindizya kunywa bukoko, kubelesya misamu iikola, kubbeja, kutalilemeka mukoonana alimwi akoonana kwabantu bajisi zizo zikozyenye micito iinyonganya kumuuya.”
Ino kwiiya bube bwa Leza kubagwasya buti Bakamboni? Ba Sylvia, ibaambwa kumatalikilo bakaamba kuti: “Bumpelenge bulidumide kapati mumakwebo aajatikizya busilisi. Ncuuba-uba kumuntu kutalika kucita micito yabumpelenge awalo. Pele kumvwisya mbwalimvwa Jehovaa kujatikizya bumpelenge cilandigwasya kucita ciluleme. Ndilikkomene alimwi ndili aluumuno lwamumizeezo. Ba Sylvia balisinizyide kuti kupona kweelana anjiisyo zyabukombi bwabo kwabagwasya kapati mubuumi.
[Bupanduluzi buyungizidwe]
a Jehova ndezyina lya Leza kweelana ambolyaamba Bbaibbele.
[Majwi aakwelelezya sikubala aali apeeji 6]
Sena basololi bazikombelo babagwasya bantu babo kubelesya zyeelelo zya Leza zyakulilemeka?