Basikuyandaula Kasimpe Botatwe Bamumwaanda Wamyaka wa 16—Ino Ncinzi Ncobakajana?

“INO kasimpe . . . ninzi?” Ooyu ngomubuzyo Jesu ngwaakabuzyigwa ciindi naakali kubetekwa kumbelele lya mweendelezi muna Roma waku Judaya Ponto Pilato, wamumwaanda wamyaka wakusaanguna. (Johane 18:38) Masimpe ngakuti aawa Pilato tanaakali kuyanda kuzyiba kasimpe. Muciindi caboobo, mubuzyo ngwaakabuzya wakatondezya kuti wakali kufwubaazya buya alimwi akuti tanaakali kusyoma. Tacidoonekwi kuti Pilato wakali kubona kasimpe kuba cintu cili coonse muntu ncasala naa ncaakayiisyigwa kuti kasyoma: ncobeni tiikwakali nzila yakuzyiba kasimpe kuti ninzi. Bantu banji mazuba aano mbobalimvwa mbubwenya oobo.

Basizikombelo mumwaanda wamyaka wa 16 mu Europe bakali aapenzi lyakuyanda kuzyiba ncobakeelede kusyoma kuti nkakasimpe. Mbwaanga kuzwa kubwana bakali kusyoma munguzu zyakweendelezya zya paapa alimwi amunjiisyo zimwi zyacikombelo, bakazooba abuyumuyumu kujatikizya njiisyo zipya zyakabunga ka Reformation kakadumide kapati mu Europe aciindi eeco. Ino bakeelede kusyoma nzi? Ino mbuti mbobakali kuyooziba kuti aaka nkakasimpe?

Aciindi eeco, akati kabaalumi bamwi banji, kwakali baalumi botatwe ibakali kuyandisya kuti bakazyibe kasimpe.a Ino bakali kucita buti kutegwa bazyibe kasimpe alimwi akuzyiba njiisyo zyakubeja. Alimwi ino ncinzi ncobakajana? Atwaalange-lange makani aaya.

“AMULEKE BBAIBBELE KUTI . . . KALITUSOLOLELA LYOONSE”

Ba Wolfgang Capito, wakali mukubusi wakajisi lusyomo lupati mubukombi. Bakali basikwiiya zyabusilisi, mulawo alimwi amakani aabukombi, alimwi ba Capito bakaba bafundisi mu 1512 mpoonya bakaba baiminizi baba bishopo bapati baku Mainz.

Kumatalikilo,ba Capito bakasolekesya kucesya busungu mbobakajisi bamukabunga ka Reformation ibakali kukambauka mulumbe iwatakali kweendelana anjiisyo zyaci Katolika. Pele kalitanalampa, ba Capito bakatalika kucinca zintu. Ino ncinzi ncobakacita? Basyaazibwene mumakani aakaindi, ba James M. Kittelson bakaamba kuti ciindi nokwakali kuba njiisyo ziindene-indene, ba Capito bakali kusyoma kuti “nzila mbotu kwiinda yakuzyiba naa bukambausi bwabo bwakali kabotu naa pe, yakali yakubelesya Bbaibbele, nkaambo lyalo lilasyomeka.” Aboobo ba Capito bakazyiba kuti njiisyo yacikombelo yakuti mukamu awaini zilacinca kuba mubili abulowa bwini ciindi nokucitwa Misa, alimwi ayakulemeka basaante tiiyakali yamumagwalo. (Amubone kabbokesi kakuti ‘Amubone Naa Zyintu Eezyi Mbozibede.’) Ciindi ba Capito nobakaleka kuba baiminizi baba bishopo bapati mu mwaka wa 1523, bakalongela kudolopo lipati lya Strasbourg, kwalo ikwakadumide kapati makani aakuyanda kucinca zintu mubukombi.

Ŋanda yaba Capito mu Strasbourg nkobakali kuswaanganina basikukazya njiisyo zimwi zyabukombi alimwi tacidoonekwi kuti bakali kubandika makani manji aabukombi aindene-indene alimwi anjiisyo zyamu Bbaibbele. Nokuba kuti bamukabunga ka Reformation bakacili kukulwaizya njiisyo ya Butatu, nzyobakalemba ba Capito, kweelana abbuku litegwa The Radical Reformation, zitondezya kuti “taakwe ncolyaamba kujatikizya njiisyo ya Butatu.” Ino nkaambo nzi? Nkaambo kakuti ba Capito bakabotelwa kapati kubona syaazibwene mumakani aabukombi waku Spain, ba Michael Servetus mbobakabelesya Bbaibbele kukazya njiisyo ya Butatu.b

Kukazya njiisyo yabutatu cakali kuyoosya kapati, aboobo ba Capito bakaacenjelela makani akwaamba mbobakali kulimvwa caantangalala. Nokuba boobo, nzyobakalemba zitondezya kuti bakali kwiizumbauzya njiisyo ya Butatu kabatanazyibana aba Servetus. Mufwundisi waci Katolika wakazoolemba kuti ba Capito alimwi abeenzinyina “bakayaambele kubandika kumbali makani aakali kukatazya kumvwisya aajatikizya bukombi kakunyina kubuzya alimwi akukaka Butatu Busalala.” Mumwaanda wamyaka wakatobela, ba Capito mbebakali bakusaanguna kulembwa akati kabalembi bakali kukazya njiisyo ya Butatu.

Ba Capito bakali kusyoma kuti Bbaibbele ndelyakali kasensa kakasimpe. Bakalemba kuti: “Amulekele Bbaibbele alimwi amulawo wa Kristo kuti lyoonse kazitusololela mulwiiyo lujatikizya bukombi.” Basyaazibwene mubusongo bwabantu, ba Kittelson, bakaamba kuti ba Capito “bakali kukankaizya kuti icipa basikwiiya zyabukombi kwaalilwa, nkaambo kakuti tababikkili maano ncaamba Magwalo.”

Ba Martin Cellarius ( alimwi ibaitwa kuti Martin Borrhaus) ibakali kukkala kuŋanda yaba Capito mu 1526, abalo bakali aaluyandisisyo lwakwiiya kasimpe kazwa mu Jwi lya Leza.

“LUZIBO LWA LEZA MWINI-MWINI”

Ba Cellarius, ibakazyalwa mu 1499, bakali basikwiiya zyabukombi bankutwe. Bakazizumina njiisyo zyakalembedwe acikwankwani mu Wittenberg, Germany. Mbwaanga mu Wittenberg mumwakadumide makani aakucinca njiisyo zyabukombi, kalitanalampa ba Cellarius bakazyibana aba Martin Luther alimwi abamwi ibakali kuyanda kucinca njiisyo zimwi zyacikombelo. Ino mbuti ba Cellarius mbobakali kuyakwiindanya kasimpe kamu Magwalo alimwi amizeezo yabantu?

Kweelana abbuku litegwa Teaching the Reformation, ba Cellarius bakali kusyoma kuti kumvwisya ncobeni kwakayeeme “akuba bankutwe mukubala Magwalo, kweezyanisya magwalo cakwiinduluka-induluka alimwi akupaila kubikkilizya akweempwa.” Ino ncinzi ba Cellarius ncobakajana mukulingaula Bbaibbele?

Mu July 1527, ba Cellarius bakamwaya makani ngobakajana mubbuku litegwa On the Works of God (Kujatikizya Milimo ya Leza). Bakalemba kuti zilengwa zyabukombi mbuli cakuti mukamu awaini zilacinca kuba mubili abulowa bwini ciindi nokucitwa Misa zyakali kubelesyegwa munzila buyo yacikonzyanyo. Kweelana anzyaakaamba syaazibwene uutegwa Robin Barnes, bbuku lyaba Cellarius “lyakapandulula businsimi bwamumagwalo bujatikizya ciindi nokuyooba makatazyo amapenzi kumbele alimwi akuti ayootobelwa akubambululwa kwanyika yoonse alimwi akuzuzikizyigwa.”—2 Petulo 3:10-13.

Acimwi ncotubona muzintu nzyobakaamba ba Cellarius mbupanduluzi bwabo bufwaafwi kujatikizya mbwabede Jesu Kristo. Nokuba kuti kunyina nobakakazya njiisyo ya Butatu cacigaminina, ba Cellarius bakatondezya kwiindana kuliko akati ka “Taata Wakujulu” alimwi a “Mwanaakwe Jesu Kristo” alimwi bakalemba kuti Jesu uli akati kabaleza alimwi abana banji ba Leza singuzuzyoonse.—Johane 10:34, 35.

Mubbuku lyabo litegwa Antitrinitarian Biography (1850), ba Robert Wallace bakabona kuti nzyobakalemba ba Cellarius tiibakazilemba kweelana aanjiisyo ya Butatu iyakadumide kapati mumwaanda wamyaka wa 16.c Basikwiiya banji bakabona kuti kweelede kuti ba Cellarius bakaikaka njiisyo ya Butatu. Bapandululwa kuti ngumwi wabaabo Leza mbabelesya “mukupa luzyibo lwa Leza mwini-mwini alimwi a Kristo.”

BULANGIZI BWABUBUKE

Mumyaka yakuma 1527, syaazibwene mulwiiyo lwabukombi ba Johannes Campanus umwi wabasikwiiya iwakadumide kapati aciindi eeco awalo wakatalika kukkala ku Wittenberg. Nokuba kuti makani aakucinca zintu akalidumide kapati, ba Campanus tiizyakabasika amoyo njiisyo zyaba Martin Luther. Ino nkaambo nzi?

Ba Campanus bakazizumbauzya njiisyo zyakuti mukamu awaini zilacinca kuba mubili abulowa bwini ciindi nokucitwa Misa, ayakuti mukamu alimwi abulowa ziba antoomwe amubili wa Jesu, ciindi ca Mulalilo wa Mwami. Kweelana anzyobakaamba balembi ba André Séguenny, ba Campanus bakali kusyoma kuti “Mukamu taucinci pe, unooli mukamu lyoonse, pele lyamulalilo, mukamu wiiminina mubili wa Kristo.” Lyamuswaangano uutegwa Marburg Colloquy wamu 1529, iwakabambwa kutegwa babandike kujatikizya mibuzyo eeyi, ba Campanus tiibakazumizyigwa kwaamba nzyobakaiya kuzwa mu Magwalo. Kuzwa waawo, balongwe babo bamukabunga ka Reformation bakabakaka mu Wittenberg.

Icakabanyemya kapati bantu bakali kusola kucinca zintu mumakani aabukombi, nzintu nzyobakali kusyoma ba Campanus kujatikizya Taata, Mwana alimwi amuuya uusalala. Mubbuku lyabo lyamu 1532 litegwa Restitution, ba Campanus bakalemba kuti Jesu alimwi a Usyi mbantu bobilo baindene. Bakapandulula kuti Taata alimwi a Mwana “mbantu bomwe,” mbubonya mbuli bantu bakwetene mbobaambwa kuti “mubili omwe” nkokuti balikamantene pele mbantu bobilo. (Johane 10:30; Matayo 19:5) Ba Campanus bakabona kuti Magwalo abelesya cikozyanyo nciconya kutondezya kuti Usyi ulaanguzu kwiinda mwana: “Mutwe wamwaalumi uuli woonse ngu Kilisito; awalo mutwe wamukaintu mwaalumi; mpoonya mutwe wa Kilisito ngu Leza.”—1 Bakolinto 11:3.

Ino mbuti kujatikizya muuya uusalala? Alimwi ba Campanus bakabelesya Bbaibbele, bakalemba kuti: “Taakwe lugwalo lwaamba kuti Muuya Uusalala muntu watatu . . . Muuya wa Leza ubonwa kuti ulabeleka mukuti ulabamba alimwi akucita zintu zyoonse kwiinda munguzu zyakwe zyakumuuya.”—Matalikilo 1:2.

Ba Luther bakaamba ba Campanus kuti mbaasikusampaula alimwi mbaasinkondo ba Mwana wa Leza. Aumwi wamukabunga ka Reformation wakaamba kuti ba Campanus bajaigwe. Nokuba boobo, ba Campanus tiibakayoowa pe. Bbuku litegwa The Radical Reformation lyaamba kuti: “Ba Campanus bakasyoma kuti kutamvwisya makani aamu bbaibbele aajatikizya Leza alimwi amuntu kweelana ambobakali kwaamvwisya baapostolo, ncecakapa cikombelo kwaalilwa.”

Tanaakali makanze aaba Campanus kutalisya kabunga kabukombi pe. Tiibakazwidilila mukuyandaula kasimpe “akati katubunga tuzandukide tujisi njiisyo bantu banji nzyobakali kuzumbauzya.” Aboobo wakajisi bulangizi bwakuti Cikombelo caba Katolika, kwiinda mukucinca zintu zyakalubide cakali kuyootalisya njiisyo zya Bunakristo zyakasimpe. Nokuba boobo, mukuya kwaciindi beendelezi baci Katolika bakabaanga ba Campanus, alimwi kweelede kuti bakakkala muntolongo myaka iinda ku 20. Basyaazibwene mumakani aakaindi basyoma kuti bakafwa cakuma 1575.

“AMUSINIZYE ZYINTU ZYOONSE”

Kusungwaala mukwiiya Bbaibbele kwakapa ba Cellarius, ba Campanus, alimwi abamwi kwiindanya kasimpe kumakani aakubeja. Nokuba kuti makani aamwi ngobakajana basikuyandaula kasimpe aaba taakali kweendelena ancolyaamba Bbaibbele munzila iizulide, cakulicesya baalumi aaba bakavwuntauzya mu Magwalo alimwi bakali kukayandisya kasimpe nkobakajana.

Paulo wakakulwaizya Banakristonyina kuti: “Amusinizye zyintu zyoonse; amukakatile kucintu cibotu.” (1 Batesalonika 5:21) Kutegwa mugwasyigwe kuyandaula kasimpe, Bakamboni ba Jehova bakamwaya bbuku lijisi mutwe iweelede wakuti Ino Ncinzi Cini Bbaibbele Ncoliisya?