MIBUZYO YABASIKUBALA

Sena cileelela ku Banakristo kuumpa mutunta wamuntu?

Magwalo taakwe ncaamba kukazya cilengwa cakuumpa mutunta wamuntu.

Kuli zibalo zyamu Bbaibbele izitondezya kuti mibili naa mafwuwa aabafwu akaumpwa. (Jos. 7:25; 2 Mak. 34:4, 5) Eeci zimwi ziindi cakali kutondezya kuti bantu bafwide ibakali kuumpwa tiibakali kweelela kuzikkwa bweelede. Nokuba boobo, tabali boonse bantu ibakali kuumpwa ibatakali kweelela kuzikkwa kabotu.

Tulakonzya kukabona kaambo aaka kwiinda mukubona lufwu lwa Mwami Saulo alimwi abana bakwe basankwa botatwe. Aba boonse bone bakafwa ciindi nobakali kulwana abana Filisti. Mwana musankwa umwi akati kabo wakali Jonatani, mulongwe mubotu alimwi mugwasyi uusyomeka wa Davida. Ciindi bana Israyeli basintanze ibakali kukkala mu Jabezi-gileadi nobakamvwa cakacitika, bakabweza mitumba yoonse yone, akuyuumpa, mpoonya akuzikka mafwuwa. Nobakamana kucita boobo, Davida wakabalumbaizya bana Israyeli aabo akaambo kantaamu njobakabweza.—1 Sam. 31:2, 8-13; 2 Sam. 2:4-6.

Bulangizi bwamu Magwalo ibujatikizya bafwide, mbubuke—nkokuti, Leza kupilusya muntu uufwide kuba muumi. Tacikwe makani naa muntu waumpwa buya naa pe, Jehova ulijisi nguzu zyakupilusya muntu uufwide kubuumi kajisi mubili mupya. Bana Hebrayo botatwe ibakali kulangilwa kuumpwa mumulilo uuvwilima kweelana amulawo wa Mwami Nebukadinezara tiibakeelede kuyoowa akuyeeya kuti Leza tanaakali kukonzya kubabusya ikuti nobakapya mumulilo. (Dan. 3:16-18) Oobo mbocakabede akubabelesi ba Jehova basyomeka ibakajaigwa akuumpwa munkambi zyaba Nazi. Babelesi ba Leza banji basyomeka bakajaigwa aamabbomba naa nzila zimwi mwalo mocakali kukatazya kujana mitumba yabo. Nokuba boobo, bulangizi bwabubuke bwabo bulisinizyidwe.—Ciy. 20:13.

Jehova tayandiki kuti mane buya wajatanya zibeela zyamubili wamuntu wakafwa kutegwa amubusye pe. Eeci cilisalazyidwe kwiinda mukubona Leza mbwabusya bananike Banakristo kubuumi bwakujulu. Mbubwenya mbuli Jesu, ‘iwakabusyigwa amubili wamuuya,’ Banakristo bananike balabusyigwa kabali mbamunya pele kabajisi mibili yamuuya. Taakwe cibeela camubili wabo wabuntu cuunka kujulu pe.—1 Pe. 3:18; 1 Ko. 15:42-53; 1 Jo. 3:2.

Bulangizi bwesu mububuke tabuyeeme anzila mboucitwa mutunta wamuntu uufwide, pele buyeeme alusyomo lwesu munguzu zyajisi Leza mukuyanda kuzuzikizya zisyomezyo zyakwe. (Mil. 24:15) Masimpe, tatukonzyi kumvwisya Leza mbwaakali kucita maleele aakubusya bantu bafwide mumazuba aamusyule naa mbwayakucita kumbele. Nokuba boobo, tulamusyoma Jehova. Wapa “cisinizyo” kwiinda mukubusya Jesu.—Mil. 17:31; Lk. 24:2, 3.

Banakristo inga bacita kabotu kuti batobela zilengwa, zintu nzyobacita bantu bamubusena mobakkala, alimwi akutobela malailile aamfwulumende kujatikizya mboweelede kuzikkwa mutunta. (2 Ko. 6:3, 4) Aboobo, muntu umwi aumwi naa banamukwasyi mbabeelede kusala naa mutunta wamuntu uufwide uumpwe naa pe.