Ino Bbaibbele Lyaamba Nzi Kujatikizya Kuumpa Mutunta Wamuntu?
Bwiinguzi bwamu Bbaibbele
Bbaibbele talyaambi malailile aagaminide kujatikizya kuumpa mutunta wamuntu. Kunyina mulawo mu Bbaibbele waamba kuzikka naa kuumpa mutunta wamuntu.
Bbaibbele lilaamba makani aatondezya kuti babelesi ba Leza basyomeka bakali kuzikka mitunta yabayandwa babo. Mucikozyanyo, Abrahamu wakasolekesya kapati kujana busena bwakuzikkila mukaintu wakwe, Sara.—Matalikilo 23:2-20; 49:29-32.
Bbaibbele alimwi lilaamba bantu basyomeka ibakali kuumpa mitunta yabantu. Mucikozyanyo, ciindi Mwami Saulo wa Israyeli alimwi abana bakwe botatwe nobakajaigwa munkondo, mitunta yabo yakalisyeede mucilawo cabasinkondonyina alimwi tiibakaibikkila maano. Nobakaamvwa makani aaya basikalumamba bana Israyeli basyomeka bakaunka kuyoobweza mutunta wa Saulo ayabana bakwe, bayuumpa mpoonya mafwuwa bakaazikka nkukonya ooko. (1 Samuele 31:8-13) Bbaibbele litondezya kuti mafwuwa aabo akazikkwa munzila iili kabotu.—2 Samuele 2:4-6.
Makani aakubeja aavwula kwaambwa kujatikizya kuumpa mutunta wamuntu
Makani aakubeja: Kuumpa mutunta nkutalemeka mubili wamuntu.
Makani aamasimpe: Bbaibbele lyaamba kuti aabo bafwa balajokela kubulongo, eeci ncecicitika ciindi mubili nowabola. (Matalikilo 3:19) Kuti mutunta waumpwa ulafwambaana kuba bulongo nkaambo mulota.
Makani aakubeja: Kaindi, ilikke mitunta yabantu batakali kukkomanisya Leza njeyakali kuumpwa.
Makani aamasimpe: Mitunta yabantu batakali kusyomeka, mbuli Akani amukwasyi wakwe yakaumpwa. (Joshua 7:25) Nokuba boobo, tiiwakali mulawo buya pe. (Deuteronomo 21:22, 23) Mbubwenya mbotwabona kumatalikilo, noiba mitunta yabantu bakali kusyomeka mbuli Jonatani mwana wa Mwami Saulo yakaumpwa.
Makani aakubeja: Kuumpa mutunta wamuntu kupa kuti Leza atakamubusyi muntu ooyo.
Makani aamasimpe: Kubusya bafwide taali makani aakonzya kumwaalila Leza, tacikwe makani naa mutunta wakazikkwa buya, kuumpwa, kuloba mulwizi naa kuligwa abanyama. (Ciyubunuzyo 20:13) Masimpe, Leza Singuzuzyoonse ulakonzya kuulengulula mubili wamuntu wakafwide.—1 Bakorinto 15:35, 38.