Filimu ya “Eureka Drama” Yakagwasya Bantu Banji Kujana Kasimpe Kamu Bbaibbele

IBBALA lyakuti “Eureka” lyaamba kuti “ndajana!” Mumwaanda wamyaka wa 19, ngolida yakali kuyandika kapati mu California mucisi ca U.S.A., babelesi bamumaini yangolida bakali kuvwula kwaamba kuti “ndajana” ciindi nobajana ngolida. Nokuba boobo, Charles Taze Russell alimwi abeenzinyina Basikwiiya Bbaibbele, bakajana cintu cimwi cijisi mpindu yiinda kubota—kasimpe kamu Bbaibbele. Alimwi bakalilisungwide kwaabila bamwi.

Kuzikusika mucilimo camu 1914, mamiliyoni aabantu mumadolopo mapati bakayoboloka kuyakweebelela filimu ya “Photo Drama of Creation,” yalo iyakali kutola mawoola aali lusele, iyakapangwa akabunga kabasikwiiya Bbaibbele kategwa International Bible Students Association (I.B.S.A.). Kaijisi zifwanikiso zibotu zipentedwe aatumagilazi, akweendelanya majwi aasikuluula atunyimbo itwakali kulila ansaansi, filimu eeyi yakajisi makani aamu Bbaibbele aakali kutondezya basikweebelela kujatikizya kulengwa kwazintu kusikila kumamanino aa Bulelo bwa Jesu Kristo bwa Myaka Iili Cuulu.—Ciy. 20:4.a

Pele mbuti kujatikizya baabo ibakali kukkala mumadolopo masyoonto amuminzi? Kutegwa kutabi bantu bafwide nzala yakumuuya balaaindwe, mu August 1914 kabunga ka I.B.S.A. kakamwaya filimu ya “Eureka Drama”—yalo iyakali filimu ya “Photo Drama” iyakali kunyamunika, pele iyatakajisi zifwanikiso zyeendeenda. Kwakali misyobo yotatwe, imwi aimwi yakali kujanika mumyaambo iili mbwiibede: Kwakali “Eureka X” yalo iyakajisi makani aakalekkoodwa alimwi anyimbo. “Eureka Y” yakajisi makani aakalekkoodwa oonse alimwi azifwanikiso zibotu izyakapentedwe aatumagilazi. Alimwi kwakali “Eureka Family Drama,” yalo iyakabambilidwe kuti kaibelesyegwa aŋanda, yakalijisi makani aakalekkoodwa aali mbwaabede alimwi anyimbo. Mincini iibelesya malekkoodi alimwi amapulojekita aataduli kapati akali kuulwa akubelesyegwa.

Kakunyina kubelesya pulojekita alimwi acipekupeku cipati kapati, Basikwiiya Bbaibbele bakali kukonzya kutola mulumbe wa Bwami mumasena manji aamuminzi alimwi amuzilawo zipya. Filimu ya “Eureka X” iyakajisi buyo majwi, yakali kukonzya kulizyigwa masyikati naa masiku. Filimu ya “Eureka Y” yalo iyakajisi zifwanikiso, yakali kukonzya kutondezyegwa kakunyina kubelesya magesi, pele kwiinda mukubelesya lambe. Lipooti imwi mu Ngazi Yamulindizi yamuci Finnish yakaamba kuti: “Tulakonzya kutondezya zifwanikiso eezyi kuli koonse.” Eelo kaka majwi aaya akali aamasimpe!

Muciindi cakubbadela maanda mapati akweebeleda, Basikwiiya Bbaibbele basongo bakali kukonzya kujana masena aatabbadelelwi, mbuli muzikolo, masena mapati aankuta, muzitisyini zyacitima, alimwi amuzilawo zipati zimwi zyamaanda. Bunji bwaziindi yakali kweebelelwa anze kwiinda mukubikka mulembo mupati uutuba kaulengelela kumbali lyalambe ilyakali kubelesyegwa. Ba Anthony Hambuch bakalemba kuti: “Balimi bakali kupanga busena bwakweebeleda mumyuunda yabo, kwiinda mukubikka zisamu zinji kutegwa bantu bakkale akweebelela pulogilamu.” Kakamu kabasikutondezya “Eureka” kakali kubelesya cikkocci citegwa “Drama wagon” mwalo mobakali kubikka zibelesyo zyabo.

Basikweebelela filimu ya “Eureka” zimwi ziindi bakali basyoonto pele zimwi ziindi bakali kuvwula kapati. Mucisi ca United States, basikweebelela ibali 400 bakabungana muŋanda imwi yacikolo mudolopo lyakajisi bantu ibali 150. Mumasena amwi, bantu bakali kweenda misinzo iilampa makkilomita aali lusele kuyakukweebelela filimu ya “Eureka Drama.” Mucisi ca Sweden, basimukobonyina baba Charlotte Ahlberg ibakabungene muŋanda isyoonto “bakakkomana kapati kumvwa” makani aakalekkoodwa. Bantu babalilwa ku 1,500 bakabungana mudolopo limwi ilyakali kulamfwu mucisi ca Australia kuti beebelele. Ngazi Yamulindizi yakaamba kuti, muzikolo zipati, “bamayi alimwi abasicikolo balakkomana kubona zifwanikiso alimwi amalekkoodi eesu aaboneka kabotu.” Filimu ya “Eureka Drama” yakaduma kapati nomuba mumaanda mobakali kweebeleda mafilimu.

KULIMINA MBUTO YAKASIMPE

Filimu ya “Eureka Drama” yakaba cibelesyo cigwasya ncobeni mumulimo wakuyiisya iwatakali kucitilwa mumbungano mwalo mbungano mozyakali kutuma baambi kuti bakatalisye tubunga twakwiiya Bbaibbele tupya. Tatukonzyi kuzyiba naa bali bongaye bakayeebelela filimu ya “Eureka Drama.” Tubunga tunji twakali kubeleka cakutaleka kutondezya filimu eeyi. Nokuba boobo, mu 1915 mwalo, akati katubunga tuli 86 tubunga tuli 14 buyo ntontuto twakali kutuma lipooti cakusitikila. Nokuba kuti ooyu tiiwakali ngomweelwe uuzulide, lipooti yakumamanino aamwaka ooyo yakatondezya kuti bantu bainda ku 1 miliyoni bakayeebelela filimu ya “Drama.” Bantu babalilwa ku 30,000 bakalomba mabbuku aapandulula Bbaibbele.

Kweelede kuti filimu ya “Eureka Drama” kunyina noyakali kuyeeyegwa kapati, nokuba boobo kuzwa ku Australia kusika ku Argentina, kuzwa ku South Africa kusika kunsumbu zyaku Britain, India, alimwi ansumbu zyaku America, bantu bakkala mumo kweelede kuti bakayeebelela filimu eeyi iilibedelede. Bantu banji akati kabo bakakajana kasimpe—cintu ciyandisi kwiinda ngolida—alimwi bakali kukonzya koompolola kuti “Eureka!”