Nkaambo nzi Ncomweelede Kubukkomanina Bwami bwa Leza?

Mamiliyoni aabantu nyika yoonse basyoma kuti Bwami Bwa Leza mbobulangizi mbobajisi kumapenzi aabo. Batobela cikozyanyo ca Jesu, ooyo iwakayiisya basikumutobela kupaila kuti: “Abuze Bwami bwako, Alucitwe luyando lwako, Ansi ano.”—Matayo 6:10. The Bible in Tonga 1963.

Cigambya ncakuti, nokuba kuti bantu banji balabukkomanina Bwami bwa Leza, kuboneka kuti zikombelo zinji tazibubikkili maano pe. Kaamba kujatikizya makani aaya, sikwiiya zyakaindi H.  G.  Wells wakatondezya kuti Jesu “wakabikkila kapati maano kunjiisyo njaakaita kuti Bwami bwa Kujulu” nokuba kuti kuyiisya ooku “kuliimpene kapati twakweezyanisya anjiisyo zijanika muzikombelo zinji zya Bunakristo.”

Mukwiimpana azikombelo eezyo, Bakamboni ba Jehova balabubikkila kapati maano Bwami bwa Leza. Mucikozyanyo: Magazini yesu iibelesyegwa kapati eeyi njomubala lino, ilamwaigwa mumyaambo iili 220. Kulasimbwa makkopi aatandila ku 46 miliyoni aangazi imwi aimwi, eeci cipa kuti ibe nje magazini iimwaigwa kapati munyika yoonse. Ino mulumbe nzi mupati uuli mumagazini eeyi? Amubone mutwe woonse wanjiyo: Ngazi Yamulindizi Yaambilizya Bwami Bwa Jehova.a

Ino nkaambo nzi Bakamboni ba Jehova ncobabikkila kapati maano kwaambilizya Bwami bwa Leza? Kaambo kamwi nkakuti, tusyoma kuti Bwami bwa Leza ngomulumbe mupati uujanika mubbuku liyandika kapati munyika—Ibbaibbele. Kuyungizya waawo, tulisinizyide kuti Bwami bwa Leza mbobulangizi bulikke mbobajisi bantu kumapenzi aabo.

Ciindi nobagamika bantu ku Bwami bwa Leza, Bakamboni ba Jehova basoleka kutobela cikozyanyo ca Jesu. Naakali anyika, wakabikkila kapati maano ku Bwami bwa Leza mubuumi bwakwe alimwi amumulimo wakwe. (Luka 4:43) Nkaambo nzi Jesu ncaakabikkila kapati maano ku Bwami? Alimwi ino inga bwamugwasya buti nywebo kumugama? Twamulomba kuti mulange-lange bwiinguzi bwamu Bbaibbele kweelana ambokutiibandikwe muzibalo zitobela.