MAKANI AAYEEME AMUTWE UULI ACIVWUMBYO | BWAMI BWA LEZA—INO NCINZI NCOBUKONZYA KUMUCITILA?

**Bwami bwa Leza—Ino Buyoomugwasya Buti?**

Cakutadooneka mwaiya zinji muzibalo zyainda kujatikizya kaambo ncobuyandika kapati Bwami bwa Leza kuli Bakamboni ba Jehova. Ambweni mwabotelwa kapati kujatikizya zilongezyo zyakumbele zimwi zyabandikwa zijatikizya Bwami bwa Leza. Nokuba boobo, andiza inga mwadooneka naa zisyomezyo eezyo ziyoozuzikizigwa ncobeni.

Ncamaano kusaanguna kusinizya kamutana zisyoma zyoonse nzyomwamvwa. (Tusimpi 14:15) Munzila imwi, ambweni inga mwacita ncobakacita bana Bereya bansiku.a Nobakamvwa makani mabotu aa Bwami ciindi cakusaanguna, bana Bereya bakaatambula makani ngobakamvwa, pele tiibakaazumina buyo kuti ngamasimpe. Muciindi caboobo, bakavwuntauzya cakulomya mumagwalo “kutegwa babone naa zyintu eezyi mbozibede.” (Milimo 17:11) Munzila imwi, bana Bereya bakeezyanisya makani mabotu ngobakasaanguna kumvwa, mpoonya bakalanga ancaamba Magwalo. Mukuya kwaciindi, bakasinizya kuti makani mabotu ncobeni akayeeme a Jwi lya Leza.

Bakamboni ba Jehova balamulomba kuti andinywe mucite mbubonya mbobakacita bana Bereya. Kwiinda mububambe bwaciiyo ca Bbaibbele ncotucita, twamulomba kuti mweezyanisye ncobasyoma Bakamboni ba Jehova kujatikizya Bwami bwa Leza, mpoonya mulange aceeco ncoliyiisya Bbaibbele.

Kuyungizya aluzyibo ndomwaiya kujatikizya Bwami bwa Leza, kwiiya Bbaibbele inga kwamugwasya kujana bwiinguzi kumibuzyo imwi iiyandika kapati mbuli yakuti:

Kuyungizya waawo, kwiiya Bbaibbele kuyoomugwasya ‘kuswena kuli Leza.’ (Jakobo 4:8) Mpoonya mbomuyaabuswena kuli Leza, muyoobona kuti kuli zintu zibotu zinji nzyobukonzya kumucitila Bwami bwa Leza—kutali buyo lino pele kukabe kutamani. Mboobu Jesu mbwaakapaila kuli bausyi: “Eeci caamba buumi butamani, ikuti bakuzyiba yebo O Leza mwini-mwini ooli olikke, ayooyo ngookatuma, Jesu Kilisito.”—Johane 17:3.

Bakamboni ba Jehova balakonzya kubelesya bbuku eeli kwiiya Bbaibbele andinywe.

Kutegwa mube aciiyo ca Bbaibbele cimugeme, amulombe umwi wa Bakamboni ba Jehova naa kulemba foomu iili a www.jw.org. (Amubone cibeela cakuti AMULOMBE CIIYO CA BBAIBBELE kutegwa mujalule peeji lyamatalikilo)

a Bereya wakali munzi mu Makedoniya yansiku.

Ncobuyandika Bwami bwa Leza Kumukubusi Ooyu

Caino-ino musimbi uulaamyaka iili 10 wazina lya Folake wakaambilwa kulemba mulaso kucikolo wakajisi mutwe wakuti, “Ncondiyandisya Kapati Munyika.” Folake wakasala kulemba mulaso iwaamba kaambo ncayandisya kwaambila bamwi makani aajatikizya Bwami bwa Leza.

Folake wakapandulula kuti: “Bwami bwa Leza nimfwulumende iini-ini iitalibonyi, tamukonzyi kwiibona—nokuba kuti mwasama magilazi!”

Kumane Folake wakalemba kujatikizya zilongezyo zya Bwami eezyo nzyayandisya kuyoobona. Kaamba mapenzi aamwi aayoomanizyigwa a Bwami, wakalemba kuti, “Ndilausa nondibona bantu batakwe maanda kabaingaila mumigwagwa kubikkilizya “abana bafwa akaambo kanzala mumasi aaindene-indene munyika.” Wakayungizya kwaamba kuti, “Ndilakkomana nondibala Isaya 65:21.” Kujatikizya bantu ibayoopona mubweendelezi bwa Bwami bwa Leza, kapango aaka kasyomezya kuti: “Bayooyaka maanda akukala mulingao, bayoobyala myuunda yamisaansa akulya micelo yayo.”

Kuyungizya waawo, Folake wakaamba kuti ulangila ciindi Leza nayoogwisya malwazi oonse kwiinda mu Bwami bwakwe. Mumulaso wakwe, wakazubulula lugwalo lwa Ciyubunuzyo 21:4, ilwaamba kuti Leza “uyoosindula misozi yoonse kumeso aabo, alimwi lufwu talukooyoobako limbi, akwalo koomoka, kulila nokuba kucisa takukooyoobako limbi.” Wakamanizya kwiinda mukwiinduluka kwaamba kuti, ikwaambila bamwi kujatikizya Jehova alimwi a Bwami bwakwe ncecintu ncayandisya kapati munyika. Cakutadooneka, Bwami bwa Leza ncintu caalubazu mubuumi bwamusimbi ooyu.