Bwami bwa Leza—Ncobuyandika Kapati Kuli Jesu

Mbubonya mbotwabona mucibalo cainda, Jesu wakabikkila kapati maano ‘kukambauka akwaambilizya makani mabotu aa Bwami bwa Leza.’ (Luka 8:1) Wakalitakata kweenda misinzo milamfwu munyika yabana Israyeli kutegwa abakambaukile bantu kujatikizya Bwami bwa Leza. Mulimo ngwaakacita Jesu ulilembedwe mumabbuku one aamakani mabotu, mwalo Bwami mobwiindulukwa-indulukwa kwaambwa ziindi ziinda ku 100. Bunji bwamakani aaya alajanika mumajwi ngaakaamba Jesu, pele nokuba boobo, aamba buyo makani masyoonto tweezyanisya amakani oonse ngaakaamba kujatikizya Bwami bwa Leza.—Johane 21:25.

Nkaambo nzi Bwami ncobwakali kuyandika kapati kuli Jesu ciindi naakali anyika? Kaambo kamwi nkakuti, Jesu wakalizyi kuti Leza wakamusala kuti abe Mweendelezi wa Bwami oobu. (Isaya 9:6; Luka 22:28-30) Pele Jesu tanaakabikkila maano kukupegwa Bwami naa kulijanina bulemu. (Matayo 11:29; Maako 10:17, 18) Tanaakasumpula Bwami akaambo kakuyanda kulijanina mpindu pe. Pele wakabikkila maano alimwi ucibikkila maano ku Bwami bwa Lezaa akaambo kabubotu mbobuyoocitila baabo mbayanda, ncobuyoocitila bausyi bakujulu alimwi ancobuyoocitila basikwiiya bakwe basyomeka.

BWAMI NCOBUYOOBACITILA BAUSYI JESU

Jesu ulabayanda kapati Bausyi bakujulu. (Tusimpi 8:30; Johane 14:31) Ulabukkomanina kapati bube bubotu bwa Bausyi mbuli luyando lwakwe, lweetelelo lwakwe alimwi abululami bwakwe. (Deuteronomo 32:4; Isaya 49:15; 1 Johane 4:8) Cakutadooneka, kweelede kuti cilamucisa Jesu kumvwa makani aakubeja aamwaigwa kujatikizya Bausyi, imakani aakubeja mbuli aakuti Leza tabikkili maano kumapenzi aabantu alimwi akuti Leza nguuyanda kuti katupenga. Aaka nkakaambo kamwi kakapa kuti Jesu akambauke cabusungu “makani mabotu aa Bwami” akaambo kakuti wakalizyi kuti mukuya kwaciindi Bwami buyoolisalazya zina lya Bausyi. (Matayo 4:23; 6:9, 10) Ino mbuti mbobuyoocita oobo?

Kwiinda mubwami bwakwe, Jehova uyoobweza ntaamu iiyandika kapati iiyoopa kuti bantu bagwasyigwe. “Uyoosindula misozi yoonse kumeso” aabantu basyomeka. Jehova uyoozigwisya zintu zipa kuti bantu kabalila akuba masimpe kuti “lufwu talukooyoobako limbi, akwalo koomoka, kulila nokuba kucisa takukooyoobako limbi. Zyintu zyakaindi zyamana.” (Ciyubunuzyo 21:3, 4) Kwiinda mu Bwami, Leza uyakwaagwisya mapenzi oonse aabantu.b

Tacigambyi kuti Jesu wakali musungu kwaambila bantu kujatikizya Bwami! Wakalizyi kuti kucita boobo cakali kuyooyubununa Bausyi mbobali basinguzu alimwi ambobali basilweetelelo. (Jakobo 5:11) Alimwi Jesu wakalizyi kuti Bwami bwakali kuyoobagwasya aabo mbayanda, nkokuti bantu basyomeka.

BWAMI NCOBUYOOBACITILA BANTU BASYOMEKA

Katanaboola anyika, Jesu wakakkala kujulu a Bausyi kwaciindi cilamfwu. Bausyi bakamubelesya kulenga zintu zyoonse mbuli majulu aagambya kubikkilizya anyenyeezi zinji zitakonzyi kubalwa amilalabungu alimwi anyika mbotu yeebeka abanyama ibakkala mulinjiyo. (Bakolose 1:15, 16) Akati kazintu zyoonse eezyi, Jesu wakali “kuyandisya bana ba-Adamu.”—Tusimpi 8:31.

Mulimo ngwaakali kucita Jesu wakatondezya luyando ndwajisi kubantu. Kuzwa kumatalikilo kwini, wakacisalazya kuti wakaboola aano anyika kutegwa ‘aambilizye makani mabotu’ kubantu bapengede. (Luka 4:18) Pele Jesu wakacita azimwi, ikutali buyo kwiile kwaamba kujatikizya kugwasya bantu. Lyoonse wakali kucita zintu zitondezya kuti ulabayanda bantu. Mucikozyanyo, ciindi nkamu mpati yabantu noyakabungana kuti iswiilile nzyaakali kwaamba, Jesu “wakabeetelela akuponya balwazi babo.” (Matayo 14:14) Ciindi mwaalumi iwakajisi bulwazi bucisa kapati naakatondezya lusyomo muli Jesu lwakuti ulakonzya kumuponya ikuti naa wakali kuyanda, Jesu wakakulwaizyigwa aluyando. Wakamuponya mwaalumi, mpoonya calweetelelo wakamwaambila kuti: “Ndilayanda. Kosalazyigwa.” (Luka 5:12, 13) Jesu naakabona mweenzinyina Mariya kalila akaambo kalufwu lwa mwanookwabo Lazaro, Jesu “wakanyongana kapati mumoyo,” “wakapenga,” alimwi “yakamweenda misozi.” (Johane 11:32-36) Mpoonya wakacita cintu cimwi cigambya—Jesu wakamubusya Lazaro nokuba kuti wakalifwide kwamazuba one!—Johane 11:38-44.

Jesu wakalizyi kuti luumbulizyo ndwaakapa kuciindi eeco lwakali buyo lwakaindi kasyoonto. Wakalizyi kuti talikoolampa boonse mbaakaponya bakali kuyoociswa alimwi, abaabo boonse mbaakabusya bakali kuyoofwa alimwi. Nokuba boobo, Jesu wakalizyi kuti Bwami bwa Leza bwakali kuyakwaamanizyila limwi mapenzi oonse aaya. Nkakaambo kaako Jesu tanaakacita buyo maleele; pele alimwi wakakambauka “makani mabotu aa Bwami” cabusungu. (Matayo 9:35) Maleele aakwe akatondezya buyo asyoonto kujatikizya Bwami bwa Leza ncobuyoocita ino-ino nyika yoonse. Amubone Bbaibbele ncolisyomezya kujatikizya ciindi eeco.

• 

  Takukabi limbi kuciswa.

  “Lino meso aaboofu ayoobononona, amatwi aabasinke ayoosinkuka. Cilema unooya busotauka mbuli insya, alulimi lwasyataambi luyooimbisya.” Kuyungizya waawo, “takukooyooba naba omwe akati kabantu banyika uuamba kuti, Ndaciswa.” —Isaya 33:24; 35:5, 6.

• 

  Takukabi limbi lufwu.

  “Balulami bayookona nyika, Bayookala alinjiyo lyoonse.”—Intembauzyo. 37:29.

  “Lufu walumenenena mane kukabe kutamani. Mwami Jehova uyoosindula misozi kumasyu oonse.”—Isaya 25:8.

• Aabo bakafwa bayoopona alimwi.

  ‘Boonse ibali muzyuumbwe bayoomvwa ijwi lyakwe akuzwa mulinzizyo.’—Johane 5:28, 29.

  “Kuyooba bubuke.”—Milimo 24:15.

• 

  Takukabi limbi penzi lyakubula maanda naa milimo.

  “Bayooyaka maanda akukala mulingao, bayoobyala myuunda yamisaansa akulya micelo yayo. Maanda ngebayaka taakooyookalwa umbi, amicelo njibabyala tiikooyooligwa umbi pe, . . . bantu mbensalide bayoongozya milimo yamaanza aabo.”—Isaya 65:21, 22.



• Takukabi limbi nkondo.

  “Ulalesya inkondo mane kusikila kumamanino aanyika.”—Intembauzyo 46:9.

  “Cisi tacikooyoobweza ipanga lyakulwisya cisinyina. Tabakooyooiya inkondo limbi pe.”—Isaya 2:4.

• 

  Takukabi limbi nzala.

  “Nyika yapa micelo yayo; Leza, Leza wesu, watulongezya.”—Intembauzyo 67:6.

  “Maila avule ansi, atala lyazilundu. Ayoome mbuli lusaka.”—Intembauzyo 72:16.

• Takukabi limbi bucete.

  “Bacete tabakooyoolubwa lyoonse.”—Intembauzyo 9:18.

  “Ulavuna bacete nibakwiila, abalo bapengede abaabo babula mugwasyi. Bacete abatengwana ulabafwida luzyalo; Buumi bwabacete ulabufutula.”—Intembauzyo 72:12, 13.

Mwayeeya zisyomezyo eezyi zijatikizya Bwami bwa Leza, sena mwakabona kaambo Bwami ncobuyandika kapati kuli Jesu? Ciindi naakali anyika, Jesu wakali musungu kubandika kujatikizya Bwami bwa Leza kuli woonse iwakali kuyanda kuswiilila, nkaambo wakalizyi kuti Bwami bwakali kuyakwaamanizya mapenzi oonse aakatazya bantu ngotubona mazuba aano.

Sena zilamukkomanisya zisyomezyo zyamu Bbaibbele izijatikizya Bwami? Ikuti naa mboobo, mbuti mbomukonzya kwiiya zinji kujatikizya Bwami oobo? Ino inga mwacita buti kutegwa mukazijane zilongezyo zya Bwami oobo? Cibalo camamanino muzibalo eezyi zitobelene, cilayiingula mibuzyo eeyi.