Ciindi Nomwafwidwa Muyandwa Wanu

Ba Bebe bakali kumvwana kapati abausyi. Iwakabaambila majwi aaya wakali mulongwe wakajisi makanze mabotu, pele majwi aaya akabacisa kapati ba Bebe muciindi cakubaumbulizya. Ba Bebe cakwiinduluka-induluka bakali kulyaambauzya kuti: “Kunyina cibotu kujatikizya lufwu lwabataata.” Nokwakainda myaka iili mbwiibede, ba Bebe bakaalemba makani aaya mubbuku, calo citondezya kuti bakacili kulila.

Mbubwenya mbotwabona mubukkale bwaba Bebe, kulila kulakonzya kutola ciindi cilamfwu, kwaambisya ikuti twali kumvwana kapati ayooyo wafwa. Ibbaibbele, lipandulula lufwu kuti ‘ngusinkondo wamamanino.’ (1 Bakorinto 15:26) Lufwu kuti lwacitika, buumi bwesu bulanyongana alimwi kunyina cikonzya kululesya kucitika, kanji-kanji lulacitika ciindi notutalibambilide, lulatunyanga bantu mbotuyanda. Toonse buyo tulakonzya kusikilwa amapenzi aaboola akaambo kalufwu. Aboobo, tacigambyi pe ikuti naa twaalilwa kweendelezya mbotulimvwa ciindi camalila alimwi amazuba aatobela.

Ambweni kuli nomwakalibuzyide kale kuti: ‘Ino citola ciindi cilamfwu buti kutegwa buumba bumane? Mbuti muntu mbwakonzya kulwana penzi lyabuumba? Ino mbuti mbondikonzya kubaumbulizya aabo bafwidwa? Sena kuli bulangizi kujatikizya bayandwa besu bafwide?’