Bangelo—Sena Kuli Mbobakonzya Kubujatikizya Buumi Bwanu?

Bumwi buzuba mu Nsondo masyikati, ba Kenneth aba Filomena balo ibakkala ku Curaçao, bakaunka kuyooswaya banabukwetene mbobakali kwiiya limwi Bbaibbele.

Ba Kenneth bakati: “Notwakasika, twakajana ŋanda ilijalidwe alimwi mootokala tiiwakaliko pe. Pele cintu cimwi cakandikulwaizya kuti ndibatumine fooni bakaintu babo.”

Bakaintu bakaingula fooni mpoonya bakaamba kuti, balumi babo bakali kumulimo. Pele mbobakazyibila buyo kuti mbaa Kenneth aba Filomena ibakali anze, mpoonya-mpoonya bakajalula mulyango akubanjizya muŋanda.

Mbobakababonena buyo, bakazyiba kuti bakaintu aaba bakali kulila. Ciindi ba Kenneth nobakatalika ciiyo amupailo, bakaintu aaba bakatalika kulila alimwi. Aboobo ba Kenneth aba Filomena bakababuzya icakali kubapa kulila.

Bakaintu aaba bakapandulula kuti, bakali kuyanda kulijaya masyikati ngoonya aayo, alimwi bakali kulemba kagwalo kubalumi babo ikakali kutondezya kuti bayanda kulijaya, pele ciindi nobakatuma fooni ba Kenneth, ndendilyo nobakaleka kulemba kagwalo aako. Bakaintu aaba bakaambila ba Kenneth aba Filomena kuti bakalityompedwe kapati, aboobo bakabala ambabo twaambo tuumbulizya kuzwa mu Bbaibbele. Luumbulizyo oolo lwakabavwuna bakaintu aaba.

Ba Kenneth bakaamba kuti: “Twakamulumba Jehova akaambo kakutupa coolwe cakugwasya bakaintu aaba ibakauside kapati, kwaambisya ikutusololela—ambweni kwiinda mumungelo naa muuya wakwe uusalala—kutegwa tubatumine fooni!”a

Sena baliluzi ba Kenneth aba Filomena kusyoma kuti Leza ngowakabagwasya, kufwumbwa naa nkwiinda mumungelo naa nkwiinda mumuuya wakwe uusalala? Naa kuti ambweni fooni iilya njobakatuma ba Kenneth ncintu buyo cakacitika mbuli mbozicitika zintu zyoonse?

Tatukonzyi kwaamba cakusinizya kujatikizya makani aaya. Pele ncotuzyi ncakuti, Leza ulababelesya bangelo bakwe kugwasya bantu kumuuya. Mucikozyanyo, Bbaibbele lyaamba kuti Leza wakabelesya mungelo kusololela mukambausi Munakristo wazina lya Filipo ikugwasya muna Etiopiya iwakali kuyandaula busolozi bwakumuuya.—Milimo 8:26-31.

Zikombelo ziindene-indene zikulwaizya bantu kusyoma zilenge zyamuuya zitalibonyi, izimwi akati kazyeezi zyaambwa kuti zilagwasya alimwi zicita kuyanda kwa Leza naa kukwabilila muntu umwi aumwi kumugama. Bantu banji tabasyomi buyo kuti bangelo nkobali, pele akuti bangelo aaba balabajatikizya munzila imwi iigwasya. Nokuba boobo, bantu banji tabasyomi naaceya kuti bangelo nkobali.

Sena bangelo nkobali ncobeni? Kuti naa nkobali, ino bakazwa kuli? Ino makani nzi aamasimpe aaliko kujatikizya bangelo? Sena balakonzya kubujatikizya buumi bwanu? Atubulange-lange bumboni buliko.