MAKANI AAYEEME AMUTWE UULI ACIVWUMBYO | BANGELO—SENA NKOBALI NCOBENI? INO BATUJATIKIZYA BUTI?
Makani Aamasimpe Kujatikizya Bangelo
Sena inga mwayanda kuzyiba makani aamasimpe kujatikizya bangelo kuti naa mbaani, bakalengwa buti, alimwi amulimo ngobacita? Kunyina kumbi nkotukonzya kujana bwiinguzi pele buyo mujwi lya Leza Bbaibbele ilyakasololelwa amuuya. (2 Timoteyo 3:16) Ino Bbaibbele litwaambila nzi?
Mbubonya Leza mbwali muuya, abalo bangelo myuuya iitalibonyi nkaambo ‘tabajisi nyama azifwuwa.’ Bangelo basyomeka bakkala kujulu alimwi balo balamubona Leza cakaanzambwene.—Luka 24:39; Matayo 18:10; Johane 4:24.
Zimwi ziindi bangelo bakali kusanduka akusama mibili yanyama ciindi nobakali kubeleka milimo ya Leza aanyika, mpoonya bakali kusanduka alimwi akusama mibili yamuuya nobakali kumana kubeleka milimo yabo.—Babetesi 6:11-23; 13:15-20.
Nokuba kuti bangelo mu Bbaibbele baambwa kuba muciimo cabaalumi alimwi akuti lyoonse bakali kusanduka akulibonya muciimo cabaalumi, pele bwini mbwakuti kunyina bangelo basankwa naa basimbi akati kabo. Tabakwati alimwi tabazyali bana ibakozyanya ambabo. Kuyungizya waawo, bangelo tiibakasaanguna kupona anyika kabali bantu—mbuli bavwanda, bana naa bapati. Bangelo bakalengwa a Jehova; nkakaambo kaako Bbaibbele ncolibaamba kuti “bana ba Leza mwini-mwini.”—Jobu 1:6; Intembauzyo 148:2, 5.
Bbaibbele lyaamba kujatikizya “myaambo yabantu ayabangelo,” kutondezya kuti zilenge zyamuuya zilijisi mwaambo alimwi zilabandika. Nokuba kuti Leza wali kubelesya bangelo kubandika abantu, tatuzumizyi kuti katubakomba naa kupaila kuli mbabo.—1 Bakorinto 13:1; Ciyubunuzyo 22:8, 9.
Kuli zyuulu-zyuulu zyazyuulu zyabangelo, andiza mweelwe wabo inga wasika kumabbiliyoni.a—Daniele 7:10; Ciyubunuzyo 5:11.
Bangelo balijisi ‘nguzu zitaambiki,’ inzya nzinji kapati kwiinda zyabantu alimwi balijisi busongo bulibedelede. Cakutadooneka balakonzya kweenda misinzo milamfwu kapati kabazuzide citaambiki. Alimwi bantu tabakonzyi kulumvwisya lubilo lwabo.—Intembauzyo 103:20; Daniele 9:20-23.
Nokuba kuti bangelo balijisi busongo anguzu zilibedelede, kuli mpobagolela, alimwi buya kuli zintu zimwi nzyobatazyi kabotu.—Matayo 24:36; 1 Petro 1:12.
Bangelo bakalengwa kabajisi bube bwiindene-indene, mbuli bube bwabunaleza alimwi anguzu zyakulisalila. Mbubonya mbuli bantu, balakonzya kusala kucita cintu cibotu naa cibi. Cuusisya cakuti, bangelo bamwi bakasala kuzangila Leza.—Juda 6.
a Zyuulu izili kkumi ncimwi buyo a 10,000. Zyuulu izili kkumi zyazyuulu izili kkumi ncimwi buyo a 100 miliyoni. Nokuba boobo, ibbuku lya Ciyubunuzyo lyaamba ‘makumi-makumi aazyuulu zyabangelo.’ Eeci caamba kuti kuli myaanda-myaanda yatuulunzuma, ndiza mabbiliyoni aazilenge zyamuuya!