Izina Lyamu Bbaibbele Ililembedwe Anongo Yakaindi

Tupaanzi-paanzi twanongo yabulongo iyakabumbwa myaka iili 3,000 yainda iyakavwukkulwa mumwaka wa 2012, twakabakkomanisya kapati basikuvwuntauzya makani aakaindi. Ino ncinzi cakabakkomanisya basikuvwuntauzya aaba? Tatuli tupaanzi-paanzi pe, pele icakalembedwe anongo eeyo.

Ciindi basikuvwukkula zyakaindi nobakacikonzya kutubikka antoomwe tupaanzi-paanzi ootu, bakacikonzya kubala malembe aakaindi abana Kanana aakalembedwe anongo eeyo. Akalembedwe kuti: “Esibaala Ben [mwana wa] Beda.” Eeci ncecakali ciindi cakusaanguna basikuvwukkula zyakaindi ikujana zina eeli kalilembedwe acintu cakaindi.

Alimwi buya, izina alimbi lyakuti Esibaala lilaambidwe mu Bbaibbele—wakali umwi wabana ba Mwami Saulo. (1Mak. 8:33; 9:39) Syaazibwene wazina lyakuti Yosef Garfinkel, iwakatola lubazu mukuvwukkula ooko, wakati: “Cilakkomanisya kapati kuzyiba kuti izina lya Esibaala lilajanika mu Bbaibbele, alimwi lino amuzintu zyakavwukkulwa zyakaindi, ilijanika buyo naakali kulela Mwami Davida.” Bamwi bayeeya kuti lyakali zina ilyakaliko buyo kuciindi eeco cabulelo bwa Davida. Alimwi twabona kuti, kaambo kamwi ikajanika mu Bbaibbele kasinizyigwa abumboni bujanika muzintu zyakavwukkulwa izyakaindi.

Mutupango tumwi mu Bbaibbele, izina lya Esibaala liimininwa azina lya Isibosete, izina lya “baala” lyakanjililwa busena alya “bosete.” (2Sam. 2:10) Nkaambo nzi? Basikuvwuntauzya bapandulula kuti, mulembi wabbuku lya 2 Samuele ambweni wakeeleba kulibelesya zina lya Esibaala nkaambo lyakali kuyeekezya bana Israyeli Baala, leza waguwo ooyo bana Kanana ngobakali kukomba. Nokuba boobo, mubbuku lyamu Bbaibbele lya 1 Makani, inga twalijana zina lyakuti Esibaala.