Sena Mulizyi?

Sena cileelela kwaamba basambazi ibakali kusambala banyama mutempele ku Jerusalemu kuti ‘mbabbi’?

KWEELANA acibalo cijanika mu Makani Mabotu aa Matayo, “Jesu wakanjila mutempele akubatandila anze boonse aabo ibakali kusambala akuula mutempele, alimwi wakatingamuna matebulu aabasikucinca mali azyuuno zyabaabo ibakali kusambala nkwilimba. Alimwi wakabaambila kuti: ‘Kulilembedwe kuti, “Ŋanda yangu inakwiitwa kuti niŋanda yakukombela,” pele nywebo mwaicita kuba ciyubilo cababbi.’”—Mt. 21:12, 13.

Mabbuku aakaindi aaba Juda atondezya kuti basambazi bamutempele bakali kubalida masuku atala aamutwe aabo mbobakali kusambalila kwiinda mukubaduzizya banyama bakutuula. Mucikozyanyo, mumwaanda wamyaka wakusaanguna C.E., bbuku lya Mishnah (Keritot 1:7) lyaamba ciindi muulo wankwilimba zyobilo zyakutuula nowakasika ku dinari lyangolida. Ooyu ngomweelwe wamali ngwaakali kuvwola muntu uutajisi luzyibo lugaminide abeleka kwamazuba aali 25. Nkwilimba alimwi anziba zyakali kukonzya kutuulwa abantu bacete; nokuba boobo, nouba muulo wabayuni aaba wakali kuluma. (Lev. 1:14; 5:7; 12:6-8) Mwiiyi waba Juda wazina lya Simeon ben Gamaliel, wakanyema kapati akaambo kabukkale oobu cakuti wakaucesya mweelwe wazipaizyo izyakeelede kutuulwa, calo cakapa kuti muulo wankwilimba zyobilo ujoke ansi kapati.

Akaambo katwaambo itwaambwa atala aawa, Jesu wakaliluzi ikwaamba basambazi bamu tempele kuti ‘mbabbi’ akaambo kabusyaacivulemwaangu bwabo.