KUCITA CINTU COMWE Citondezya Luyando lwa Bunakristo

BAUSYI baba John bakabbapatizyigwa akuba Bakamboni ba Jehova kumamanino aamyaka yakuma 1950, mudolopo lisyoonto mu Gujarat ku India. Ba John abanabokwabo basimbi abasankwa bosanwe abanyina bakali kusyomeka kapati kucikombelo ca Katolika aboobo bakali kuzikazya nzyobakali kusyoma bausyi.

Bumwi buzuba, bausyi baba John bakalomba ba John kuti batole mvwulupu kumulongwe wabo umwi wamumbungano. Nokuba boobo buzuba oobo mafwumofwumo, ba John bakalitenda citaambiki kukanwe nobakali kusola kujalula cigabba cipati. Pele, akaambo kakuyanda kumvwida bausyi, bakaanga kasani kukanwe ikakali kuzwa bulowa akutalika kweenda kutola mvwulupu.

Ba John nobakasika aŋanda eeyo, bakaintu bamulongwe wabausyi, ibakali Bakamboni ba Jehova, bakaitambula mvwulupu. Mpoonya bakabona kuti ba John baliliciside kukanwe aboobo bakalomba kuti babasilike. Bakabweza kabbokesi kamisamu, akucisalazya cilonda amusamu uujaya tuzunda alimwi akukaanga bbandeji kanwe. Mpoonya bakaintu aabo bakabapangila tii uupya ba John, kumwi kababandika cabulongwe kujatikizya Bbaibbele.

Aciindi eeci, lusulo ndobakajisi ba John kujatikizya Bakamboni lwakatalika kumana, aboobo bakabuzya bakaintu aabo kujatikizya twaambo tobilo mobakaindene azintu nzyobakali kusyoma bausyi—naa Jesu ngu Leza alimwi naa Banakristo baleelede kupaila kuli Mariya. Mbwaanga mucizyi Kamboni ooyu wakaluuzyi mwaambo waba John waci Gujarati, wakabaingula kubelesya Bbaibbele alimwi akubapa kabbuku kakuti “This Good News of the Kingdom.”

Mukuya kwaciindi nobakazumanana kukabala kabbuku, ba John bakalimvwa kuti cakali ciindi cakusaanguna kumvwa kasimpe kamu Bbaibbele. Bakaunka kumupaizi wabo akumubuzya mibuzyo njeena yobilo. Kakunyina kulijata mupaizi wakanyema akufwusa Bbaibbele kuli ba John, akupozomoka kuti: “Yebo waba Saatani! Konditondezya Bbaibbele mpolyaamba kuti Jesu tali Leza. Konditondezya mpolyaamba kuti tamweelede kukomba kuli Mariya. Konditondezya!” Ba John bakagambwa ambwaakalilemeka mupaizi cakuti bakamwaambila kuti: “Tandikalyati limbi mucikombelo ca Katolika.” Masimpe tiibakalyata limbi!

Ba John bakatalika kwiiya a Bakamboni, bakakakatila kubukombi bwakasimpe, akutalika kubelekela Jehova. Mukuya kwaciindi, banamukwasyi ibali mbobabede abalo bakacita mbubwenya. Mazuba aano, ba John bacijisi cibata kukanwe kujanza lyalulyo nkobakalitenda myaka iibalilwa ku 60 iyainda. Baciyeeya kabotu-kabotu kujatikizya cintu comwe ncobakacitilwa citondezya luyando lwa Bunakristo icakabakwela kubukombi busalala.—2Kor. 6:4, 6.