Sena Muli Mukugwasyigwaa Mulimo Ngomubeleka?
(4 min.) Imulimi uutobela nzila nguba-uba munzila yeelede inga ulangila kuyootebula zilyo zinji. (Muk. 11:4, 6; 2 Kor. 9:6) Nokuba boobo, ibalimi balicenjede kwiinda ikutanyonyoona imbuto zyabo mukubyala waawo mpobabona kuti inga tazyikomeni pe. Mbubwenya buyo, andiswe tweelede kubaa bupampu ciindi notwaabila mabbuku naa mamagazini mumuunda. Makanzeesu ngakwaabila mabbuku naa mamagazini kubantu ibajisi luyandisisyo lwini-lwini. Tuyanda kubapa coolwe aabo ibeelela ikwiiya zyalubomba lwa Jehova alimwi abulangizi bwa Bwami. Ino mbuti mbotukonzya kutondezya busongo alimwi abupampu mumakani aaya?
(3 min.) Mulangizi wamulimo weelede kukankaizya mbociyandika kulibambila ikutegwa katwaabila mabbuku naa mamagazini alimwi akutambula mali aasangwa munzila yeelede alimwi imbotu. Amwiikulwaizye mbungano kuti iswiilile kabotu-kabotu kuzyitondezyo eezyi zyitobela zyotatwe akulemba twaambo.
(5 min.) Sikumwaya naa mupainiya wamwaya bbuku lya Luzibo kumuntu iwatondezya luyandisisyo lwini-lwini. Sikumwaya waamba kuti: “Bakamboni ba Jehova mbabelesi basikulisungula alimwi balimvwa kuti ncintu ciyandika kapati kuti bantu ibayoowa Leza bamvwe makani mabotu. Ikusanga kwakuliyandila nkobacita Bakamboni ba Jehova alimwi abantu bambi ibazyi mboluyandika lwiiyo lwamu Bbaibbele sunu nkokutugwasya mumulimo ooyu. Alimwi kupa kuti tucikonzye ikwaabila bbuku eeli kakunyina kubbadelesya kubantu ibayandisisya ncobeni kwiiya makanze ngajisi Leza kujatikizya bantu.” Mwiniŋanda wabuzya kuti: “Sena mundaambila kuti inga ndalibweza bbuku eeli?” Sikumwaya waingula kuti: “Inzya mulakonzya kulibweza, ikuti kamusyomezya kuti muyakuubala mulumbe wamu Bbaibbele uuli mubbuku eeli. Inga ndakkomana kuyoomuswaya alimwi akuzoobandika andinywe makani aambi. Ikuti kamuyanda kusanga kufwumbwa mali ngomuyanda kugwasilizya mulimo ooyu wakuyiisya Bbaibbele, mulaangulukide kucita oobo. Ku mali ngomusanga tulamulumba kapati alimwi ayoobelesyegwa mukutolaambele makani mabotu aa Bwami.” Mwiniŋanda walisungula kusanga alimwi walombwa kuti abikke mali aakwe mumvwulupu iibambilidwe mulimo waanyika yoonse.
(5 min.) Amubelesye citondezyo nciconya ikutondezya sikumwaya mbwakonzya kwaabila bbuku lya Luzibo, ikulipa mwiniŋanda mpoonya akubuzya naa inga bayanda kusanga kugwasilizya mulimo waanyika yoonse. Luno lweendo mwiniŋanda waamba kuti, “Tandisyomi kuti inga ndalibala bbuku.” Sikumwaya walitambula bbuku kuzwa kumwiniŋanda akwaamba kuti: “Njoolipa muntu umwi uyoolikkomanina kubala. Ndiza inga mulakkomana kubala katulakiti aaka.”
(3 min.) Sikumwaya naa mupainiya utondezya mbokumwaigwa mamagazini mapya. “Mwabuka. Ndime _____. Ndamuletela makani aayandika kapati kujatikizya [amwaambe makani naa mutwe]. Kuli kaambo kaandikkomanisya. [Amumutondezye kaambo kukagama naa amupandulule cikozyanyo.] Aaya makani akandigwasya [amupandulule mbomwakagwasyigwa], aboobo ndiyeeya kuti andinywe alamugwasya. Inga ndamusiila magazini eeyi ikuti mwandisyomezya kuti mulaibala.” Mwiniŋanda wabuzya kuti, “Ino muuzya mali nzi mamagazini aaya?” Sikumwaya naa mupainiya waingula kuti, “Tatuulisyi pe mabbuku naa mamagazini eesu, pele ikuti kamuyanda kugwasyilizya kwiinda mukusanga kufwumbwa mali ngomukonzya kumulimo wesu waanyika yoonse walwiiyo lwa Bbaibbele, inga twakkomana ikwaatambula mali.” Mwiniŋanda walisungula kusanga alimwi walombwa kuti abikke mali aakwe mumvwulupu iibambilidwe mulimo waanyika yoonse.
(5 min.) Mulangizi wamulimo wabaibalusya basikumwaya ikwaabelesya kabotu mabbuku eesu alimwi akupandulula bubambe bwakusanga munzila mbotu kubantu aabo ibatondezya luyandisisyo lwini-lwini alimwi babweza mabbuku. Ikutegwa bantu bagwasyigwe ncobeni amabbuku eesu, tweelede kwaapa kubantu ibayanda kuzyiba kasimpe, nkokuti aabo ibalaa luyandisisyo lwini-lwini mumulumbe alimwi amulimo wesu. Kanjikanji mulakonzya kubona naa muntu uulaa luyandisisyo eelyo nomuswaya ciindi cakusaanguna. Basikumwaya tabeelede kuleka kwaabila mabbuku. (Mt. 10:11) Kulubazu lumwi, tatweelede kwiile kupa mabbuku cipaape kubantu ibatatondezyi aluyandisisyo luli loonse kumulumbe wamu Bbaibbele. Makanzeesu ngakuyandaula alimwi akusanina mbelele zya Mwami alimwi akubagwasya kulibambila kuti bakafwutuke kunjila munyika ya Jehova mpya.
Tatweelede kuleka ikubyala mbuto zya Bwami akaambo kakuti tatulibambilide ikupandulwida bantu mbougwasyilizyigwa mulimo wesu. Pele alimwi tweelede kuba bantu balaa bupampu kutegwa mabbuku eesu atasinyigwi ‘muvwu lyamabwe.’ (Mk. 4:5, 6, 16, 17) Aabo ibazyi mbwaayandika makani mabotu ngotubatolela balakkomana ikugwasyilizya kwiinda mukusanga.—Amweezyanisye a Matayo 10:42.