Cibeela 2—Izilongezyo Zijanika Akaambo Kakutondezya Kulumba Kuluyando lwa Jehova
1 Mwezi wainda mucibeela eeci, twakabandika nzila zyone motukonzya kutondezya kulumba kwesu kuluyando lwa Jehova mumulimo wesu. (1 Joh. 4:9-11) Lino tulabikka azimbi nzila zyosanwe motukonzya kucita boobo. Ciindi notutola lubazu mukugwasya bamwi munzila yakumuuya, tulalongezyegwa.
2 Bukambausi Bwamukwiizya: Eeyi ninzila iigwasya kapati mukujana bantu balaa nzala anyota yabululami alimwi akubasiila mabbuku. Cilagwasya ‘ikucibelesya kabotu ciindi cesu’ akupa bukamboni lyoonse kumuntu uuli woonse ngotukonzya kuyaanya. (Ef. 5:16) Tuyandika kubaa camba kutegwa tucikonzye kupa bumboni munzila eeyi, pele ikuti katutondezya kulumba kuluyando lwa Leza alimwi akuzyiba nzyobabulide bantu, tuyoopa bumboni aciindi coonse ncotukonzya kujana.—2 Tim. 1:7, 8.
3 Mumisyinali umwi wakalongezyegwa kapati amubandi ngwaakatalisya amwaalumi ngwaakakkwelede limwi mumootokala. Imwaalumi ooyo wakatondezya luyandisisyo. Kwakacitwa bubambe bwakupilukila, mpoonya ciiyo ca Bbaibbele cakatalikwa. Imwaalumi ooyo wakakatambula kasimpe mane akuyaambele kusikila wakaba mwaalu mumbungano!
4 Kulemba Magwalo: Ambweni cilatukakila kweenda kuŋandaa ŋanda akaambo kakuciswa-ciswa. Tulakonzya kulemba magwalo akupa bumboni mubufwaafwi kwiinda mukwaatuma mumposo kubantu bamwi mbotuzyi, aabo bakasweekelwa bayandwa babo naa aabo mbotwatajanaa ŋanda mucilawo cesu. Inga twabikkilizya akatulakiti komwe kajisi mulumbe uumbulizya wamu Bbaibbele alimwi ikakulwaizya sikukatambula kuti amulembele ikuti kalaa mibuzyo iili yoonse. Amubelesye kkeyala yanu nkomutambwida magwalo naa yaku Ŋanda ya Bwami; mwalombwa kuti mutabelesyi yakuofesi yamutabi pe.
5 Bukambausi Bwaaluwaile: Eeyi ninzila mbotu yakwaambaulaa bantu mbotutakonzyi kubona mumulimo wakuŋandaa ŋanda. Ikuti twabucita munzila mbotu yaluzyibo, yalubomba, alimwi iitanyemyi bantu, tulakonzya kuzwidilila kapati. Mulimo Wesu Wabwami wamu February 2001 apeeji 4 mincali ya 5 alimwi a 6 itondezya zilongezyo ziboola eelyo notubeleka cabunkutwe.
6 Ciindi mucizyi naakali kukambauka aluwaile, wakabuzya mwanakazi umwi naa kuli naakabikkila maanu kujatikizya bukkale bwakwe bwakumbele alimwi abwamukwasyi. Imwanakazi ooyo wakaamba kuti wakali kubikkila maanu. Wakaamba kuti mbwaanga wakalityompedwe kapati, wakayeeya kuti ncibotu kalikkalila mwini aŋanda yakwe. Wakakulwaizyigwaa luyando lwini-lwini ndwaakatondezya mucizyi, aboobo imwanakazi ooyo wakazumina ikubonana amucizyi amusika wakalaafwaafwi. Akaambo kaceeci, imwanakazi ooyo wakazumina kubaa ciiyo ca Bbaibbele mpoonyaawo.
7 Ikusamausya Beenzu: Ikuti katubayanda basimukoboma, tunoopakamene ikubona beenzu aabo ibaboola abusena bwesu mpotuswaanganina alimwi tuyoobasamausya. (Rom. 15:7) Amumugwasye kulimvwa kuti uli akati kabantu ibabikkila maanu mukuyaambele kwakwe munzila yakumuuya. Iluyando lwesu lwini-lwini alimwi akumulomba kuti katwiiya anguwe ciiyo ca Bbaibbele kuyoomukulwaizya kuzumina lugwasyo ndotumupa.
8 Ibukkale Bwesu Bubotu: Kwiinda mubukkale bwesu bubotu, tulakalemeka kasimpe. (Tit. 2:10) Eelyo aabo bali munyika nobaamba zintu zibotu kujatikizya ndiswe mbotuli Bakamboni ba Jehova, balemeka Leza. (1 Pet. 2:12) Eeci acalo cilakonzya kubakulwaizya bamwi kutobela nzila iisololela kubuumi.
9 Ino inga tatuzilangi-langi nzila eezyi zyosanwe motukonzya kutondezya kulumba kwesu kuluyando lwa Jehova ndwaakatutondezya alimwi akuzyibelesya? (1 Joh. 4:16) Mwacita boobo, muyoogwasyigwa kapati.