Ikujanika Lyoonse Kumiswaangano—Kulayandika Kutegwa Tuyume
1 Mwaapostolo Paulo wakatukulwaizya kuzumanana ‘kuyuma mulusyomo.’ (Taita. 1:9, 13, Ci) Kumiswaangano yambungano twiiya mizeezo mibotu alimwi tulayiisigwa mbotweelede kulikwabilila azilwanyo zyakumuuya kutegwa tucikonzye “kwiima mumeneeno aa-Diabolosi.”—Ef. 6:11; Flp. 4:8.
2 Miswaangano Itupa Zintu Nzyotuyandika: Kujanika lyoonse kumiswaangano yambungano ncintu ciyandika kapati kutegwa tuyume. (1 Kor. 16:13) Mipailo yakulumba akutembaula Leza ilapailwa kumiswaangano, alimwi ayakumukumbila kuti agwasye mbungano muzintu ziyandika. (Flp. 4:6, 7) Ikusangana munyimbo zya Bwami kulatuyumya alimwi kulatukulwaizya kuti tutondezye mbotulimvwa ciindi notukomba Jehova. (Ef. 5:19, 20) Kuyanzana kwesu nkotubaankuko ku Ŋanda ya Bwami katutana talika muswaangano anowamana muswaangano, kulatukulwaizya, akutuyaka alimwi kulatukatalusya.—1 Tes. 5:11.
3 Makani aalubazu aakakananwa mwakali mu April aamutwe wakuti, “Ikuba Balongwe Beni-Beni ba Leza Ababantuma,” akatugwasya toonse kubona coolwe cipati ncotujisi cakuba balongwe ba Jehova alimwi alukkomano ndotujana kubikkilizya akaambo kancotweelede kusolekesya kapati kuti tumuzibe alimwi akumukkomanisya. (Heb. 11:6) Mumwezi wa October cakali cintu cikulwaizya kulanga-langa zibalo zyotatwe mu Ngazi Yamulindizi zyabakubusi mbobanga batondezya muuya wiindene awanyika mubukkale bwabo boonse. (Kol. 3:8) Amuyeeye buyo nzyotwakali kunooindwa notwatakaliko kumiswaangano eeyo.
4 Muswaangano wesu Wacooko wa “Ijwi lya Leza Lyabusinsimi” wa 1999 wakayumya lusyomo lwesu muzisyomezyo zyoonse zya Leza zitanazuzikizigwa kuti ziyoozuzikigwa. Twakayumizigwa kuzumanana kukambaukila bamwi ijwi lya Leza lyabusinsimi. Ibbuku lya Tuliyanzene Kumanizya Mulimo Wesu apeeji 72, lyaamba kuti Cikolo Camulimo Wateokrasi ncipego calwiiyo lucitwa lino kumbungano yoonse mboizulwa. Kutegwa tugwasigwe acipego eci, tweelede kulutobela lulayo ndotupegwa. Eci ciyootugwasya kuciziba kabotu kukambauka makani aa Bwami kubuleya alimwi aŋanda aŋanda. Oolu lwiiyo talweelede kutwiinda pe.
5 Muswaangano wesu Wamulimo utugwasya kuti tucizibe kabotu kukambauka. Eci cakatondezyegwa mumuswaangano ngotwakajisi nkotwakapegwa malailile aambuli mbwayelede kumwaigwa mabbuku kwiinda mukusanga buyo. Basikumwaya bacibwene ibakabelesegwa kucita zitondezyo tiibakaamba kuti mamagazini amabbuku lino anoopegwa buyo pe, pele bakaamba kuti lino anoomwaigwa kakutakwe kubbadelesya. Bakatutondezya kabotu-kabotu mbokumwaigwa mabbuku naa mamagazini ambotunga twamulomba mwiniŋanda kusanga kugwasilizya mulimo wesu wanyika yoonse. Aabo bajanika kumiswaangano lyoonse bakagwasigwa kumvwisya lubazu ndobajisi mububambe oobu bupya akuti Jehova uyooulongezya mulimo wesu ooyu.—2 Kor. 9:7.
6 Ciiyo Cabbuku Cambungano mubbuku lya Muntu Mupati Kwiinda Iwakaponede capa kuti tumuyande kapati Jesu Kristo. Catugwasya kumvwisya ncocaamba kuba sikumutobela. Twanoolanga-langa mazubaa mamanino mumulimo wakwe Jesu mubbuku lya Muntu Mupati citupa kukkala akasaala akaambo kakuti tulibwene kuti ciindi ciyaabufwambaana kumana.
7 Kujanika Kumiswaangano Acibe Cintu Cipati Kulindiswe: Mumasi manji ibakwesu mobali mumasunko balizi mbociyandika kapati kuswaangana antoomwe nsondo ansondo. Kuli bantu banji bapya ibaboola kumiswaangano cakuti mweelwe wabasikumwaya ulayindwa aziindi zyobilo naa zyotatwe amweelwe wabapya ibajanika kumiswaangano. Munzila eeyi, Jehova ulabagwasya bakwesu kwiima nji camoyo omwe.—Flp. 1:27; Heb. 10:23-25.
8 Kufwumbwa muntu watali kubikkila maanu kumiswaangano aatalikke lino kunoojanika kumiswaangano lyoonse. (Muk. 4:9-12) Ikutegwa tuyume, tuyandika kuyumizyanya abasyomima basimide kwiinda mukujanika lyoonse kumiswaangano.—Rom. 1:11.