Amulizibye Zina lya Jehova Munyika Yoonse
1 Jesu naakatuma basikwiiya bakwe kuba bakamboni “mane kusikila kumamanino aanyika,” wakalibapede kale cikozyanyo cakutobela. (Inc. 1:8) Wakali kubandika abantu zyamakanze aa Leza aajatikizya nzyayanda kucitila bantu kufwumbwa ciindi ncaakali kubaswaanganya abusena nkwaakali kubajana. Abalo baciinga camuzike musyomesi uucenjede mbubonya mbuli Jesu balabelesya nzila ziindene-indene kucita kuti zina lya Jehova libe “ampuo munyika yoonse.”—Is. 12:4, 5.
2 Icaali Kucitwa Kaindi: Mumyaka yainda, imakani aa Bbaibbele akali kumwaigwa mumapepa aamakani; icipekupeku citegwa “Photo-Drama of Creation” cakabambwa akutondezegwa kutuulunzuma twabantu; myootokala ijisi zyakwaambawida yakabelesyegwa; amuncini wamalekkoodi wakabelesegwa kapati alimwi awailesi—eezi zyoonse zyakali zyakukambaukila makani mabotu. Lyoonse kwali kukankaizigwa kuti tweelede kubasikila bantu akwaambaula ambabo kutegwa tukomezye luyandisisyo lwabo. Aboobo mulimo waŋanda aŋanda wagwasya kapati mukuzibya izina lya Jehova koonse-koonse.—Inc. 5:42.
3 Icicitwa Mumazubeesu: Iziindi mboziyaabuncinca ibantu bajata bubi, aboobo ibunji bwabo tabavwuli kujanwa aŋanda. Mbasyoonto bajisi ciindi cakubala akuzinzibala kuyeeya zintu zyakumuuya. Aboobo atweendelanye mulimo wesu kweelana abukkale bwabantu. Kunze lyamulimo wamucilawo waŋanda aŋanda, twakulwaizigwa kuunka nkobajanika bantu akuba bantu “balibambide lyoonse” kubapandulwida makani aalusyomo ndotujisi. (1 Pet. 3:15) Eci caamba kuti tweelede kusolekesya kukambaukila baabo mbotubeleka limwi, ambotwiiya limwi, abaabo mbotuswaanganya mumigwagwa alimwi amumapaaki naa omuya imusiigwa myootokala, kucintoolo acintoolo akuli koonse nkotukonzya kujana bantu. Mbwaanga Jehova ulatugwasya, tuyoozwidilila mumilimo yesu. Sena mulatola lubazu mukusikila bantu kuli koonse nkobakonzya kujanwa?
4 Umwi aumwi wandiswe asoleke nzila iili yoonse kucitya kuti zina lya Jehova libe ampuwo mucilawo cesu. Tulakonzya kubaa lukkomano lunji mumulimo wesu notusyoma muli Jehova kuti abayobolole aabo babombe myoyo.—Joh. 6:44.