Amutole Lubazu Mumulimo Uutakaindululwi Limbi
1 Kuzwa leelyo kaindi nokwakaba bantu, kuziindi ziindene-indene kwali kuyandika kuti Jehova acite lubeta lwakwe kuli basinkondonyina. Nokuba boobo, akaambo kaluse lwakwe, walikupa baluleme myoyo inzila yakufwutuka. (Int. 103:13) Inzila njobalutambula luse lwakwe njiyakali kuzooba ceeleko cabulumbu bwabo.
2 Mucikozyanyo, kalitanasika Zambangulwe, mu 2370 B.C.E., Nowa wakali “mukambausi wabululami.” Ibakaloba mbabaabo ibakacita muuzyamvwide kukucenjezya kwa Leza. (2 Pet. 2:5; Heb. 11:7) Kautananyonyoonwa munzi wa Jerusalemu mu 70 C.E., Jesu wakacisalazya kupandulula ntaamu zyakali kuyandika kutola kutegwa muntu uuli woonse aluloboke lunyonyooko lwakeelede kusikila munzi oyo. Boonse ibakakaka kucenjezya kwakwe bakapenga kapati. (Lk. 21:20-24) Incenjezyo zya Leza zili boobu alimwi alubeta zyali kwiindululwa ziindi zinji kuzwa kaindi.
3 Mulimo Wamazubaano wakucenjezya: Ikaindi Jehova wakaambilizya bukali mbwaakali kuzoocitila bweende bwazintu ibuli sunu akuti ibalo babombe mbabazoofwutuka. (Zef. 2:2, 3; 3:8) Iciindi cakukambauka mulumbe ooyu wakucenjezya ciyaabumana cakufwambaana! “Mapenzi mapati” acili buyo ambele-mbele, alimwi babombe lino bali mukuyobololwa. Ncobeni “myuunda, yayuma kale kuti itebulwe.” Aboobo, kunyina mulimo uunga weelana ayooyu kubupati akukubindaana.—Mt. 24:14, 21, 22; Joh. 4:35.
4 Tweelede kutola lubazu mukwaambilizya ncenjezyo yamazubaano kulibambi nokuba kuti “ambweni bayooswiilila, ambweni bayookaka.” Ooyu mmulimo utumidwe aa Leza walo ngotunga tatusoleli limwi kulekelezya. (Ezk. 2:4, 5; 3:17, 18) Ikutola lubazu luzwide mumulimo oyu kupa citondezyo cisalala caluyando lwesu lupati kuli Leza, mbuli mbotubalanganya ncobeni beenzuma, alimwi lusyomo lwesu lutazungaani mu Mufwutuli wesu, Jesu Kristo.
5 Ecino Nceciindi Cakutola Ntaamu: Nolwali kwiinda ilubeta lwa Jehova, lyoonse kwali kubuka bumbi bubi akaambo kakuti Saatani abadaimona bakwe bacili kubeleka. Pele cino ciindi calo cinooli bumbi. Kuyunga kwa Saatani kuyoogwisigwa. Takucikayandiki ncenjezyo yanyika yoonse mbwiizulwa iijatikizya “mapenzi mapati” aalaafwi kusika. (Ciy. 7:4; Rom. 16:20) Tujisi coolwe cilibedelede icakuba alubazu mumulimo uutakaindululwi limbi. Ecino nceciindi cakuti swebo tuzulizye kucibelesya coolwe eci.
6 Kujatikizya mulimo wakwe wakukambauka, mwaapostolo Paulo, wakaamba cakusinizya, wakati: “Ndasalala kubulowa bwabantu boonse.” (Inc. 20:26) Takwe naakalimvwa kubaa mulandu wabulowa kwiinda mukutaambilizya ncenjezyo. Nkaambo nzi? Nkaambo wakali kukonzya kuwaamba boobu imulimo wakwe: “Nciconya eco ncimbelekela akusolekesya.” (Kol. 1:29) Aswebo atujane lubazu luzwide mukukondwa nkukonya mumulimo ooyo uutakaindululwi limbi!—2 Tim. 2:15.