Mbuti Ino Basazinyoko?
1 Bunji bwesu tujisi basazima bali mbobabede ibatali mukasimpe. Ino tulalombozya kaka kuti kubota bayandwa besu bali boobu basangana andiswe munzila yabuumi! Ikuyeeyela buumi bwabo butamani kumbele mane bulakozya kukomena kuti kabali bamuŋanda yesu buya. Nokuba kuti twasola kwamyaka iili mbwiibede kubapa kuyanda kasimpe, tatweelede kuyeeya kuti bali muciimo citakwe mbocicitwa.
2 Ciindi Jesu naakali kukambauka, (“banabakwabo tabakali kumusyoma.”) (Joh. 7:5) Cimwi ciindi mane basazinyina bakayeeya kuti wasondoka. (Mk. 3:21) Pesi walo Jesu tanaakatyompwa ambabo. Muciindi bana bakwabo bakakazumina kasimpe. (Inc. 1:14) Imwanaakwabo kuli banyina, Jakobo wakazooba musemu mumbungano ya Bunakristo. (Gal. 1:18, 19; 2:9) Kuti kamuyanda kuti mukakondwe akaambo kakubona basazinyoko kabazumina kasimpe, mutaleki kusoleka kusisya makani mabotu aa Bwami kulimbabo.
3 Amube Bantu Bakkazika Myoyo Ikutali Bazundikizya: Ciindi Jesu naakakambaukila bambi, baswiilizi bakwe bakakkazikwa myoyo, teebakabwekelwa pe. (Mt. 11:28, 29) Tanaakabakopanya mizeezo kwiinda muziyiisyo nzyobatakonzi kumvwa pe. Kutegwa mubakkazike myoyo basazinyoko kwiinda mumaanzi aakasimpe, amubapede munkomeki bucebuce, ikutali mumungomo buya uuzwide pe! Umwi mulangizi weendeenda wakati: “Ibainda kuzwidilila mbabaabo ibakulwaizya basazinyina kwiinda mukubakambaukila bucebuce.” Munzila eeyi, nobaba basikukazya inga batalika kubuzya mibuzyo mane limwi babaa nyota yakasimpe.—1 Pet. 2:2; amweezyanye a 1 Ba-Korinto 3:1, 2.
4 Ibanakristo banji ibali mulukwatano bazwidilila mukukambaukila mbobakwetene limwi batasyomi kwiinda mukusiya mabbuku kaajulidwe azibalo izinga zyababotela. Umwi mucizi iwakacita boobu wakali kunga ulacita ciiyo ca Bbaibbele abana bakwe kumwi mulumaakwe kamvwide, kayaabupa bupanduluzi bunga bulamugwasya. Zimwi ziindi wakali kunga wamubuzya wati: “Sunu ndaiya ceeci aceeci muciiyo cangu. Muciyeeyela buti nywebo?” Mane limwi mulumaakwe wakakazumina kasimpe.
5 Amube Bantu Balemeka, Kutali Baintide: Umwi sikumwaya wakaamba kuti “nobaba basazima balaangulukide kuliyeeyela munzila yabo beni.” Aboobo tweelede kubatondezya bulemu ciindi nobaamba mbuli mbobayeeya naa ciindi nobagama buya ikutulomba kuti tutani kubaambili makani aajatikizya kasimpe. (Muk. 3:7; 1 Pet. 3:15) Kwiinda mukukkazika moyo akubaa luyando alimwi akwiinda mukuba baswiilizi babotu, tulakonzya kujana nzila zyakukambauka camaanu-maanu. Kukkazika camba kuli boobu kulakonzya kulumbula kapati, mbuli mbokubonwa mucikozyanyo camulumi Munakristo iwakakkazika camba akuliyumya mukupenzegwa amukaintu wakwe kwamyaka iili 20. Naakatalika kucinca, walo mulumi wakati: “Ndilamulumba cini-cini Jehova walo wakandigwasya kwiiya kukkazika camba, nkaambo lino ndabubona butebuzi: Mukaintu wangu lino uleenda munzila yabuumi!”
6 Mbuti ino basazinyoko? Kulakonzya kuti kwiinda mukulilemeka kwenu kwa Bunakristo alimwi amipailo njomubacitila, ‘inga mwaakubasandula kuza kuli Jehova.’—1 Pet. 3:1, 2, NW, Kagwalo kakunsi.