Mbuti Mbotukonzya Kukambauka Kuli Bamukwasyi?
1. Nkaambo bupampu ncobuyandika notukambauka kuli bamukwasyi?
1 Tuyookondwa kapati kunjila munyika mpya abamukwasyi wesu, katukamantene mukukomba Jehova! Kwiinda mukukambauka kuli bamukwasyi wesu, balakonzya kwiiya mbwakombwa Jehova akuba abulangizi bwakuyooba abuumi munyika mpya. Aboobo kutegwa tukambauke kuli bamukwasyi munzila iikonzya kubakkomanisya, kuyandika kucita cabupampu. Mulangizi wabbazu wakaamba kuti: “Ibainda kuzwidilila mbabaabo ibakulwaizya bamukwasyi kwiinda mukubakambaukila bucebuce.” Mbuti mbotukonzya kucicita eeci?
2. Mbuti luyandisyo lwini-lwini ndotujisi kuli bamukwasyi wesu mbolukonzya kutugwasya kucita kuti babe aluyandisyisyo?
2 Amubape Kuti Babe Aluyandisyisyo: Amubikkile maano kapati mbuli mbomunga mwapa kuti babe aluyandisyisyo bamumukwasyi. (Tus. 15:28) Ino nzintu nzi nzyobalilauka mubuumi? Ino mapenzi nzi ngobajisi? Antela mulakonzya kubatondezya cibalo naa kwaamba lugwalo lukkomanisya amakani aabakkomanisya. Ikuti bamukwasyi kabatakkali afwaafwi, antela mulakonzya kubakambaukila kwiinda mukubalembela naa kubaumina luwaile. Kakunyina akubatyompya, amusyange mbuto zyakasimpe alimwi amulangile kuli Jehova kuti akomezye mbuto eezyi.—1 Kor. 3:6.
3. Mbuti luyandisyisyo ndobajisi bamumukwasyi kulindiswe mbolukonzya kutujaluda nzila yakukambauka?
3 Jesu wakalailila muntu ngwaakagusya madaimona manji kuti: “Koya kuŋanda yako kubeenzinyoko, ukabalwiide ezyo nzyaakucitila Mwami, ambwaakufwida luzyalo.” (Mk. 5:19) Amuyeeye buyo mbobakalimvwa bamukwasyi wakwe! Nokuba kuti tamukonzyi kucitikilwa cintu cili mbuli bwaceeci, bamukwasyi balaikkomanina milimo yanu naa yabana banu. Ikwaamba makani ngomwakaamba mu Cikolo Camulimo Weendelezyegwa a Leza, muswaangano wacooko ngomwakajanika, kuswaya ku Bbeteli naa cintu cimwi cakacitika cikondelezya cilakonzya kumupa nzila yakwaambaula ambabo kujatikizya Jehova alimwi ambunga yakwe.
4. Ino zintu zili buti nzyotweelede kweeleba notukambauka kuli bamukwasyi?
4 Amupakamane: Nomukambauka kuli bamukwasyi, mutani kubaambili zintu zinji aciindi comwe. Kayeeya naakatalika kwiiya Bbaibbele, mukwesu umwi wakaamba kuti: “Ndakabagambya bamaama abupanduluzi bwazintu zinji zyindakaiya mu Bbaibbele, alimwi eeci kanji-kanji cakali kuletela kuzwangana ikapati abataata.” Noliba leelyo wamukwasyi natondezya luyandisyo mumulumbe wamu Bbaibbele, amupe bwiinguzi bupa kuti muntu ayande kuzyiba zinji. (Tus. 25:7) Lyoonse amube abulemu, lweetelelo alimwi akukkazyika moyo mbuli mbomukonzya kucita nomwaambaula abeenzu mumulimo.—Kol. 4:6.
5. Ncinzi ncotweelede kucita ikuti bamukwasyi kabawayawaya notubakambaukila?
5 Iciindi cimwi, bamukwasyi wa Jesu bakali kuyeeya kuti wasondoka. (Mk. 3:21) Pele nokwakainda ciindi, bamwi bakazyikuba basyomi. (Inc. 1:14) Ikuti kusola-sola kwanu kwakusaanguna nomubakambaukila kasimpe bamukwasyi tiikwatambulwa kabotu, mutacileki pe. Bukkale bwabamukwasyi inga bwacinca. Amusole kujana nzila iimbi yakubaambila kaambo kakonzya kubapa kuba aluyandisyisyo. Mulakonzya kukkomana kubagwasya kutalika nzila iisololela kubuumi butamani.—Mt. 7:13, 14.