Ibantu Bakomena Balakambauka Cakutaleka
1 Ibantu nobayabukomena, ibunji bwabo balaleka kubeleka kutegwa balyookezye, baliibe mumyaka yacaala yabuumi bwabo. Ambweni bayeeya kuti babeleka canguzu, elyo bayandika kulyookezya lino. Ambweni naa bayanda buyo kukkala kabotu muciindi casyaala cabuumi bwabo.—Lk. 12:19.
2 Iswebo tobabelesi ba Jehova balyaabide tujisi makanze aasiyene mubuumi. Tulizi kuti kunyina kulyookezya kukubelekela Leza. Tatutyompwi nkaambo lyoonse ‘tulindila buumi butamani.’ (Jud. 21) Imyaka minji njaatola muntu mukwiiya akubaa luzibo inga yamupa kuti aye ambele mubupampu amubusongo bwakuteelela. Eeci inga camupa kuti asongwaalisye akweendelezya zintu munzila yeelede akuteelelesya buumi mbobubede. Zyoonse zintu ezi zigwasya mulanda wamakani mabotu.
3 Kukomena tacaambi buyo kucembaala kwamubili; cilajatikizya alimwi mbwayeeya muntu. Ikuti kolangila koongola alimwi kosola kuboneka bwana munzila njozilanga zintu, ulalangilwa kuzizuzikizya zintu zyoonse ezyo zyobile. Ibantu bapati balakonzya kubotya buumi bwabo kwiinda mukuyungizya luzibo lwabo munzila yakumuuya alimwi akukambaukila bantu luzibo oolo.—1 Kor. 9:23.
4 Izikozyanyo Zyabantu: Kali amyaka iili 86 yakuzyalwa, umwi mucizi wakati: “Ikuti naa ndazinzibala ndayeeya myaka iili 60 yainda kuzwa ciindi nondakaiya kasimpe, ndiyeeya kuzuzikizigwa kwacisyomezyo ca Leza mumoyo wangu. Ee, Jehova uusyomeka kuli baabo basyomeka utupa kuti tukkomane kapati.” (Int. 18:25) Umwi mukwesu uucembeede ulayeeya lufwu lwamwinakwe mbulwakamugwisya moyo kapati, icakapa kuti kuzwa waawo atalike kuciswa-ciswa. Wakati: “Pele kwiinda muluzyalo lwa Jehova, ndakabukuluka cakuti ndakali kukonzya kunjila mulimo wabupainiya nokwakainda myaka yobile. Ikaka ndamulumba Jehova iwandigwasya kuti ndibe kabotu akaambo kakuyungizya mulimo wakukambauka!”
5 Taciliboteli kubona kuti bantu bakomena banji balisungweede kuzumanana kukambauka mbuli mbobakonzya kweelana ambuli mbobalimvwa—kabataleki! Balijisi kaambo kakoompolola kuti: “O Leza, nduwe wandiiyisya kuzwa kubwanike bwangu, lino asunu nciluula malele aako.”—Int. 71:17.