Amubasikile Baalumi naa Bakaintu Batali Bakamboni
1 Cilakkomanisya iciindi banabukwetene nobakamantene mubukombi bwakasimpe. Pele, mumikwasyi minji kujanika kuti kuli buyo omwe akati kabanabukwetene iwakaitambula inzila yakasimpe. Mbuti mbotunga twabasikila aaba baalumi naa bakaintu batasyomi akubakulwaizya kukomba Jehova antoomwe andiswe?—1 Tim. 2:1-4.
2 Amukuteelele Kuyeeya Kwabo: Nokuba kuti baalumi naa bakaintu ibatali Bakamboni inga kabakazya, kanjikanji ipenzi inga lili aakutamvwana akutateelelana. Umwi inga walimvwa kuti wafwutatilwa naa kuba aabuzuba akaambo kabukombi bwamukaakwe bupya. Kaibalukwa mwaalumi umwi waamba kuti, “Nondakasyaala endike muŋanda, ndakafwa bukata citaambiki.” Aumbi wakati, “Ndakalimvwa mbuli kuti mukaintu wangu abana bayabundisiya.” Ibaalumi bamwi inga bayeeya kuti bukombi bwabanyanzya mukwasyi wabo. (Amubone Ngazi Yamulindizi ya Cingisi ya August 15, 1990, mapeeji 20-3.) Ncocili cintu cibotu kapati kuti mwaalumi kabikkilizigwa amukaintu wakwe mububambe bwaciiyo ca Bbaibbele caaŋanda kuzwa kumatalikilo.
3 Amubelekele Antoomwe: Bakamboni bamwi banabukwetene bakabelekela antoomwe mukugwasya bantu bakwetene kuba mubukombi bwakasimpe. Imucizi naakatalisya ciiyo amukaintu, mukwesu awalo wakali kumuswaya mulumaa mukaintu oyu. Kanjikanji wakali kunga watalisya ciiyo kumwaalumi oyu.
4 Amusekeseke Akusamausya: Imikwasyi mumbungano ilakonzya kugwasya mikwasyi iitanakamantana mubukombi bwakasimpe kwiinda mukwiibikkila maanu. Ikubaswaya-swaya akwiizya ambabo kulakonzya kugwasya mulumi naa mukaintu uutali Kamboni kuzyiba kuti Bakamboni ba Jehova balabikkilana maanu, Mbanakristo ibabalanganya kabotu beenzinyina.
5 Ciindi aciindi ibaalu balakonzya kukkala ansi akubona kuti balingaule bubambe bucitidwe ikutegwa baalumi naa bakaintu ibatali Bakamboni bagwasigwe alimwi akubona naa baciyandika lugwasyo lumbi lunga lwapegwa kutegwa bakwelelezegwe kulubazu lwa Jehova.—1 Pet. 3:1.