Muuya wa Jehova Ulatugwasilizya
1 To Bakamboni ba Jehova, tujisi mulimo mupati cini-cini. Jesu wakati: “Kuleelede kuti anzina Makani Mabotu akakambaukwe kumasi oonse.” (Mk. 13:10) Kuulanga munzila yabuntu, eci inga cadoonekwa, pele taceelede pe. Tulaanguzu zinji ziinda nguzu zyoonse izitugwasya kuyaambele, nkokuti—muuya wa Leza.—Mt. 19:26.
2 Icitondezyo Camumwaanda Wamyaka Wakusaanguna: Kalyaamba lwakwe kujatikizya businsimi bwa Isaya, Jesu wakati: ‘Muuya wa-Jehova uli alindime . . . kuti ndikambauke makani mabotu.’ (Lk. 4:17, 18) Katanapilukila kujulu, wakaambila bamaapostolo bakwe kuti abalo bakali kuyooyumizigwa amuuya uusalala kuti bakambauke “mane kusikila kumamanino aanyika.” Mpoonya kuzwawaawo, Filipo wakasololelwa amuuya uusalala kukambaukila sinkuta umwi waku Etiopiya, muuya wakatuma Petro kuli silumamba muna Roma alimwi wakatumizya Paulo a Barnaba kuyookambaukila Bamasi. Nguni wakali kunga weezeezya kuti bantu bakalaa bukkale buli boobu inga bakatambula kasimpe? Pele bakakatambula.—Inc. 1:8; 8:29-38; 10:19, 20, 44-48; 13:2-4, 46-48.
3 Citondezyo Camazubaano: Ibbuku lya Ciyubunuzyo lilakwaambisya ikujatikizigwa kwamuuya uusalala mumulimo wakukambauka wamazubaano, noliti: “Muuya anabwiinga balaamba kuti, Boola. . . . Amuntu woonse uuyanda anywe cabuyo maanzi aabuumi.” (Ciy. 22:17) Imuuya wakulwaizya ciinga cabanabwiinga ba Kristo alimwi abeenzinyina “[ba]mbelele zimwi” kukambauka makani mabotu kubantu boonse. (Joh. 10:16) Tweelede kuba basicamba notukambauka, kuteenkeenka kusikila bantu babukkale boonse, lyoonse katusyoma kuti muuya wa Leza uyootugwasya. 1998 Yearbook ipa bumboni buzwide bwakuti muuya wa Leza ucizumanana kugwasya babelesi bakwe. Amulange buyo zyakacitika! Mumyaka yamulimo yobilo yainda, mweelwe waakati-kati wabantu bali 1,000 bakali kubbapatizigwa abuzuba.
4 Amusyomezyegwe kuti muuya wa Leza uyoozumanana kutugwasya mbotukambaukila mulumbe wa Bwami kusikila Jehova akati mbubo. Luzibo olu lweelede kutukulwaizya kuzumanana kusolekesya mumulimo wesu uuyandika kapati wa Bwami.—1 Tim. 4:10.