Kusololelwa Amuuya wa Leza Mumwaanda Wamyaka Wakusaanguna Alimwi Amazuba Aano
“Milimo yoonse eeyi ilacitwa amuuya omwe nguwenya ooyu.”—1 KO. 12:11.
1. Ntwaambo nzi ntotutiibandike mucibalo eeci?
IBBALA lyakuti Pentekoste lituyeezya zyintu zikkomanisya kapati. (Mil. 2:1-4) Kutilwa kwamuuya uusalala aciindi eeci mumwaanda wamyaka wakusaanguna kwakatondezya kucinca kupati kujatikizya Leza mbwaakali kusololela bantu bakwe. Mucibalo cainda, twakalanga-langa nzila zimwi muuya wa Leza mbookagwasya babelesi bakwe basyomeka bakaindi kutegwa bacikonzye kucita mulimo uukatazya kapati. Nkwiindana nzi kuliko kujatikizya mbookali kubeleka muuya wa Leza Bunakristo kabutanatalika alimwi ambookali kubeleka mumwaanda wamyaka wakusaanguna? Alimwi mbuti Banakristo mazuba aano mbobagwasyigwa amboubeleka muuya uusalala wa Leza? Atubone.
“Bona . . . Muzike wa Jehova”
2. Muunzila nzi Mariya mwaakabona mboubeleka muuya uusalala?
2 Mariya wakaliko omuya muŋanda yamujulu yaku Jerusalemu ciindi muuya uusalala wakasyomezyedwe nookatilwa aali mbabo. (Mil. 1:13, 14) Pele nokuba boobo, kwamyaaka iinda kumakumi otatwe, Mariya wakabona muuya wa Jehova mboubeleka munzila zigambya. Jehova wakalonzya buumi bwa Mwanaakwe kuzwa kujulu kuboola ansi aano, akupa kuti Mariya nakalindu amite. Ncaakamitide cakali “camuuya uusalala.”—Mt. 1:20.
3, 4. Mbube nzi Mariya mbwaakatondezya, alimwi mbuti mbotukonzya kumwiiya?
3 Nkaambo nzi Mariya ncaakabeda acoolwe cili boobu citaliboteli? Ciindi mungelo wa Jehova naakamana kumupandulwida Mariya kujatikizya kuyanda kwa Jehova, Mariya wakakankamuka kuti: “Bona, mebo ndili muzike wa Jehova! Akube mbubonya mbooamba.” (Lk. 1:38) Kwiinda mukwaamba majwi aayo, Mariya wakatondezya bube bwamoyo walo Leza ngwaakabona. Bwiinguzi mbwaakapa cakufwambaana butondezya kuti wakalilibambilide kale kucita kuyanda kwa Leza. Kunyina naakabuzya mubuzyo kujatikizya bantu bamucilawo cakwe mbobakali kuyoomulanganya akaambo kakumita naa kujatikizya nzyaakali kuyoocita muntu ngobakali kweebana limwi. Kwiinda mukulyaamba kuti muzike, Mariya wakatondezya kuti wakali kumusyoma Jehova cakumaninina alimwi wakali kumubona kuti Ngusimalelaakwe.
4 Sena kuli nomwakalimvwa kuteelela akaambo kabuyumuyumu mbomwakajana mumulimo wa Leza? Umwi aumwi wesu uyoocita kabotu kulibuzya kuti: ‘Sena ndilamusyoma Jehova cakumaninina kutegwa andigwasye kweelana akuyanda kwakwe? Sena ncobeni ndilatondezya muuya wakulyaaba?’ Amusyome kuti Leza ulapa muuya wakwe kulibaabo bamusyoma amoyo woonse alimwi bazyi kuti ngomweendelezi wabubumbo boonse.—Mil. 5:32.
Petro Wakagwasyigwa Amuuya Uusalala
5. Muunzila nzi Petro mwaakabona muuya uusalala mboubeleka ciindi ca Pentekoste 33 C.E. kacitanasika?
5 Mbubwenya mbuli Mariya, mwaapostolo Petro awalo wakalibwene kale nguzu muuya wa Leza nzyoujisi ciindi ca Pentekoste 33 C.E. kacitanasika. Jesu wakalimupede Petro abamwi nguzu zyakugusya madaimona. (Mk. 3:14-16) Nokuba kuti kunyina makani manji aalembedwe mu Magwalo, kulibonya kuti Petro wakazibelesya nguzu eezyi. Nguzu zya Leza alimwi zyakalibonya ciindi Jesu naakatamba Petro kutegwa acikonzye kweenda atala aamaanzi Mulwizi lwa Galileya, Petro wakacikonzya kucita oobo. (Amubale Matayo 14:25-29.) Cakutadooneka, Petro wakasyoma muuya uusalala kutegwa umugwasye kucita zyintu zigambya. Kakutanainda ciindi cilamfwu muuya wakali kuyoobeleka aali Petro alimwi abasiciiya bamwi munzila mpya.
6. Kwiinda mukugwasyigwa amuuya wa Leza, ncinzi Petro ncaakacita ciindi ca Pentekoste 33 C.E. kacitanasika anocakainda?
6 Ciindi capobwe lya Pentekoste 33 C.E., Petro alimwi abamwi bakapegwa nguzu zigambya kutegwa bacikonzye kukanana mumyaambo yabaabo bakaboolede kuswaya ku Jerusalemu. Kuzwa waawo, Petro wakasololela mukukambaukila nkamu yabantu. (Mil. 2:14-36) Ooyu muntu iwakali kuyoowa wakaba sicamba kutegwa ape bumboni nokuba kuti bakali kukazyigwa. (Mil. 4:18-20, 31) Wakatambula luzyibo kwiinda muciyubunuzyo ca Leza. (Mil. 5:8, 9) Alimwi wakagwasyigwa kubusya muntu wakafwide.—Mil. 9:40.
7. Ninjiisyo nzi zya Jesu nzyaatakali kumvwisya Petro ciindi katanananikwa?
7 Ciindi ca Pentekoste kacitanasika, kuli njiisyo zinji zyakasimpe Petro nzyaakali kumvwisya Jesu nzyaakali kuyiisya. (Mt. 16:16, 17; Joh. 6:68) Pele nokuba boobo, kuli njiisyo azimbi nzyakayiisya Jesu nzyaatakali kumvwisya Petro ciindi ca Pentekoste kacitanasika. Mucikozyanyo, Petro kunyina naakali kusyoma kuti aakufwa Kristo wakali kuyoobusyigwa kwakwiinda mazuba otatwe akuba muntu wamuuya alimwi akuti Bwami Bwakwe bwakali kuyooba kujulu. (Joh. 20:6-10; Mil. 1:6) Kaambo kakuti bantu balakonzya kuba amubili wamuuya akulela mu Bwami bwakujulu kakali keenzu kuli Petro. Pele ciindi walo mwini naakabbapatizyigwa amuuya uusalala akuba aabulangizi bwakuunka kujulu, wakali kukonzya lino kuzimvwisya kabotu-kabotu njiisyo zya Jesu.
8. Ino nduzyibo nzi ndobajisi bananike alimwi aba “mbelele zimbi”?
8 Zyintu zimwi nzyobatakali kumvwisya basikwiiya ba Jesu bakatalika kuzimvwisya ciindi muuya uusalala nookatilwa alimbabo. Kwiinda mukusololelwa amuuya, balembi ba Magwalo aa Chigiliki aa Banakristo bakaamba zyintu zigambya kujatikizya makanze aa Jehova kutegwa tugwasyigwe. (Ef. 3:8-11, 18) Mazuba aano, bananikidwe amuuya antoomwe aba “mbelele zimbi” balida antoomwe cakulya cakumuuya, kuyiila antoomwe kasimpe. (Joh. 10:16) Sena mulalumba luzyibo akumvwisya nkomujana mu Jwi lya Leza kwiinda mukugwasyigwa amuuya uusalala?
Paulo ‘Wakazula Muuya Uusalala’
9. Ncinzi Paulo ncaakali kukonzya kuzuzikizya kwiinda mukugwasyigwa amuuya uusalala?
9 Nokwakainda mwaka omwe naa kwiinda aawo kuzwa ciindi ca Pentekoste 33 C.E., aumbi muntu wakatambula cipego camuuya uusalala wa Leza. Ooyu muntu wakali Saulo, walo wakazooba Paulo. Muuya wakabeleka alinguwe munzila zitugwasya mazuba aano. Mwaapostolo Paulo wakasololelwa amuuya kulemba mabbuku aali 14 aamu Bbaibbele. Alimwi mbubwenya mbocakabede kuli Petro, muuya wa Leza wakagwasya Paulo kumvwisya akulemba cakusalazya kujatikizya bulangizi bwamubili uutafwi alimwi uutaboli kujulu. Kwiinda mukugwasyigwa amuuya uusalala, Paulo wakaponya malwazi, wakatanda madaimona alimwi nokuba kubusya bafwide. Nokuba boobo, nguzu nzyaakatambula kwiinda mumuuya uusalala zyakali kuyoomugwasya kucita mulimo uuyandika kapati. Mbubwenya buyo, babelesi ba Leza boonse mazuba aano balazyitambula nguzu kutegwa bacikonzye kucita mulimo uukozyenye, nokuba kuti tabatambuli nguzu eezyi munzila yamaleele.
10. Mbuti muuya uusalala mbookamugwasya Paulo kuti kacikonzya kukanana kabotu?
10 Paulo ‘iwakazwide muuya uusalala,’ wakaambaula cabusicamba kukazya simabibo. Eelo kaka wakagambwa mweendelezi wacooko ca Kupro, iwakali kuswiilila kumubandi woonse! Mweendelezi ooyo wakatambula kasimpe, “nkaambo zyakamugambya njiisyo zya Jehova.” (Mil. 13:8-12) Cilasalala kuti Paulo wakalizyi kabotu muuya uusalala wa Leza mbouyandika caboola kukwaamba kasimpe. (Mt. 10:20) Mukuya kwaciindi, wakakombelezya mbungano yaku Efeso kuti bamupailile kutegwa ‘acikonzye kukanana’ kabotu.—Ef. 6:18-20.
11. Mbuti Paulo mbwaakasololelwa amuuya wa Leza?
11 Muuya uusalala tiiwakamugwasya buyo kukanana kabotu Paulo, pele zimwi ziindi wakamukasya kukanana mumasena amwi. Naakali munyendo zyakwe zyabumisyinali, Paulo wakali kusololelwa amuuya wa Leza. (Mil. 13:2; amubale Milimo 16:6-10.) Jehova ucisololela mulimo wakukambauka kwiinda mukubelesya muuya wakwe. Mbubwenya mbuli Paulo, babelesi ba Jehova boonse basyomeka balabeleka canguzu kutegwa baambilizye kasimpe cabusicamba alimwi cabusungu. Nokuba kuti busolozi bwa Leza tabuli mbobwakabede muciindi ca Paulo, tulakonzya kuba masimpe kuti Jehova ubelesya muuya wakwe uusalala kutegwa boonse beelela bakamvwe kasimpe.—Joh. 6:44.
‘Nzila Ziindene-Indene Mboubeleka Muuya’
12-14. Sena muuya wa Leza ulabeleka munzila iikozyenye kubabelesi bakwe boonse? Amupandulule.
12 Sena zibalo zyaamba Jehova mbwaakalongezya mbungano yamumwaanda wamyaka wakusaanguna yabananike zilabayumya-yumya babelesi ba Leza balyaabide mazuba aano? Inzya! Amuyeeye majwi aa Paulo aakasololelwa amuuya ngaakaamba kumbungano yaku Korinto kujatikizya zipego zyamaleele zyamuuya mumazuba aakwe. Wakati: “Lino kuli zipego ziindene-indene, pele kuli buyo muuya omwe; alimwi kuli milimo yiindene-indene, pele kuli buyo Mwami omwe; alimwi kuli nzila zyakubeleka ziindene-indene, pele Leza ngumwi buyo ooyo uucita zyintu eezyi zyoonse mubantu boonse.” (1 Ko. 12:4-6, 11) Masimpe muuya uusalala ulakonzya kubeleka munzila ziindene-indene mubabelesi ba Leza baindene-indene kuzuzikizya mulimo umwi uugaminide. Mubwini muuya uusalala ulapegwa “[ku]katanga kaniini” alimwi “[aku]mbelele zimbi” zya Kristo. (Lk. 12:32; Joh. 10:16) Nokuba boobo, taubeleki munzila iikozyenye kumuntu umwi aumwi mumbungano.
13 Mucikozyanyo, baalu balasalwa amuuya uusalala. (Mil. 20:28) Pele tabali boonse bakananikwa amuuya ibabeleka kabali balangizi mumbungano. Ino ncinzi ncotukonzya kwaamba kuliceeci? Inga twaamba kuti muuya wa Leza ulabeleka munzila ziindene-indene kubantu bali mumbungano.
14 Muuya uubapa kusinizya bananike kuti bakatambula ‘muuya uupa kuti babe bana ba Leza’ ngonguwe Jehova ngwaakabelesya kubusya Mwanaakwe simuzyalwaalikke kuzwa kubafwu kuti abe abuumi butafwi kujulu. (Amubale Baloma 8:11, 15.) Ngonguwe alimwi Jehova ngwaakabelesya kulenga bubumbo boonse. (Matl. 1:1-3) Nguwenya muuya uusalala ooyo, ngonguwe Jehova ngwaakabelesya kugwasya Bezaleli kuti abeleke mulimo waalubazu atempele, kupa Samsoni nguzu zyakucita milimo iiyandika nguzu zilibedelede alimwi akugwasya Petro kuti acikonzye kweenda atala aamaanzi. Aboobo, kuli kwiindana kuliko akati kakuba amuuya wa Leza akunanikwa amuuya wa Leza, kunanikwa amuuya wa Leza ninzila buyo yomwe yaalubazu muuya mboubeleka. Leza nguusala mbayanda kunanika amuuya.
15. Sena kubbapatizya amuuya uusalala kuyoozumanana kukabe kutamani? Amupandulule.
15 Muuya wa Leza uusalala wazumanana kubeleka munzila ziindene-indene akati kababelesi bakwe basyomeka kuzwa kaindi, inzya zyuulu-zyuulu zyamyaka kunanikwa amuuya uusalala kakutanatalika. Ciindi ca Pentekoste 33 C.E., nzila eeyi mpya yakubelesya muuya yakatalika pele tiiyakali kunoobelesyegwa lyoonse. Kubbapatizyigwa amuuya kuyoomana, pele muuya uusalala uyoozumanana kubeleka akati kabantu ba Leza kutegwa kabacita kuyanda kwakwe kukabe kutamani.
16. Ncinzi ncobacita lino babelesi ba Leza akaambo kakugwasyigwa amuuya wakwe?
16 Ncinzi cicitika mazuba aano munyika yoonse akaambo kamuuya uusalala wa Jehova? Lugwalo lwa Ciyubunuzyo 22:17 lwiingula kuti: “Muuya alimwi anabwiinga bazumanana kwaamba kuti: ‘Boola!’ Eelyo kufwumbwa ooyo uumvwa aambe kuti: ‘Boola!’ Alimwi kufwumbwa ooyo uufwide nyota aboole; kufwumbwa ooyo uuyanda anywe maanzi aabuumi cabuyo.” Akaambo kakugwasyigwa amuuya wa Leza, Banakristo mazuba aano balatamba “kufwumbwa ooyo uuyanda” kutegwa anywe maanzi aabuumi ngapa Jehova. Banakristo bananike mbebali kumbele mukucita mulimo ooyu. Pele abalo bambelele zimbi balabasangana mukucita mulimo ooyu wakutamba bantu. Inkamu zyoonse zyobilo zilabeleka kweelana amuuya uusalala kutegwa baucite kabotu mulimo ooyu. Aabo bali munkamu zyoonse zyobilo bakalyaaba kuli Jehova akubbapatizyigwa “muzyina lya Taata alya Mwana alya muuya uusalala.” (Mt. 28:19) Alimwi boonse balalibombya kubusolozi bwa muuya wa Leza mubuumi bwabo akuzumizya kuti uzyale mucelo mulimbabo. (Gal. 5:22, 23) Mbubwenya mbuli bananike, bambelele zimbi balauzumizya muuya wa Leza kuti ubagwasye. Akaambo kakugwasyigwa amuuya balasolekesya kutegwa kabapona kweelana azyeelelo zya Jehova zisalala.—2 Ko. 7:1; Ciy. 7:9, 14.
Amuzumanane Kulomba Muuya Uusalala
17. Mbuti mbotukonzya kutondezya kuti tulijisi muuya wa Leza?
17 Kufwumbwa naa bulangizi mbwamupede Leza mbwabuumi butamani kujulu naa anyika, Jehova ulakonzya kumupa “nguzu zigambya iziinda zyabantu” kutegwa muzumanane kusyomeka alimwi akuyoojana bulumbu. (2 Ko. 4:7) Akaambo kakuzumanana kukambauka makani mabotu aa Bwami tulakonzya kusampaulwa. Pele kamuyeeya kuti “ikuti naa kamusampaulwa akaambo kazyina lya Kilisito, mulakkomana, nkaambo muuya wabulemu, nkokuti imuuya wa Leza, uli alindinywe.”—1 Pe. 4:14.
18, 19. Mbuti Jehova mbwayoomugwasya kwiinda mumuuya uusalala, alimwi ncinzi ncomukanzide kucita kujatikizya makani aaya?
18 Muuya uusalala ncipego ca Leza kuli baabo bauyandaula cakusinizya. Muuya uusalala ulakonzya kutugwasya kutali buyo kuti katucita kabotu pele alimwi akuba aluyandisisyo lwakucita kabotu mumulimo wesu. “Leza ngonguwe uumupa nguzu, uumupa kuti kamukanza alimwi anguzu zyakucita zyintu akaambo kaceeco cimubotela.” Eeci cipego citaambiki camuuya uusalala kubikkilizya akusolekesya kwesu ‘kujatisya jwi lyabuumi’ kuyootupa kuti ‘tuzumanane kubelekela lufwutuko lwesu cakuyoowa akukankama.’—Flp. 2:12, 13, 16.
19 Amusyome muuya wa Leza cakumaninina, kumane amubikkile maano kumulimo uuliwoonse ngomupedwe, amuuzyibe kabotu mulimo ooyo alimwi akulangila kuli Jehova kuti amugwasye. (Jak. 1:5) Jehova uyakumupa cini ncomuyandika kutegwa mulimvwisye kabotu Jwi lyakwe, muliyumye mumapenzi aamucitikila alimwi akukambauka makani mabotu. “Amuzumanane kulomba, eelyo muyoopegwa nzyomulomba; amuzumanane kuyandaula, eelyo muyoojana; amuzumanane kukonkomona, eelyo muyoojalwidwa,” eeci cibikkilizya kutambula muuya uusalala. (Lk. 11:9, 13) Inzya, amuzumanane kupaila kuli Jehova kutegwa mube mbuli bantu basyomeka bakaindi alimwi aba mazuba aano basololelwa amuuya wa Leza uusalala.
Sena Inga Mwapandulula?
• Mbubwenya mbuli Mariya, ino tweelede kuzyilanga buti zyintu kutegwa tujane zilongezyo?
• Muunzila nzi Paulo mwaakasololelwa amuuya wa Leza?
• Ino babelesi ba Leza basololelwa buti amuuya wa Leza mazuba aano?
[Cifwanikiso icili apeeji 24
Muuya wa Leza wakagwasya Paulo kuti aliyumye kumyuuya mibi
[Cifwanikiso icili apeeji 26
Mazuba aano muuya uusalala ulabagwasya Banakristo kufwumbwa bulangizi mbobajisi