Ikutola Lubazu Mukukamantanya Munzi Kwiinda Mukukulwaizya Lukkomano Azintu Ziyandika Kapati Mumukwasyi
1 Cilakatazya kukamantanya mukwasyi mazubaano kwiinda lyoonse. Kuli zintu zili mukucitika ziyanda kunyonyoona bukkale bwamukwasyi. Ibantu banji bakatazyigwa akuvwula kwamakwatano aali mukumana alimwi akunyonyooka kwaziyanza zibotu zyamumukwasyi muciinga cesu. Mazubaano mukwasyi uli mukucinca. Kuzanga akupenzya bana, kulwana kwabanabukwetene, budakwi alimwi amapenzi aambi aamanya lukkomano mumukwasyi. Kubana banji alimwi abapati, mukwasyi tuucili ciyubilo pe.
2 Imikwasyi iitobela njiisyo zya Bbaibbele akusungwaalila Bwami bwa Leza bajana kuti mapenzi aabo alacesyegwa, nokuba kumanizilwa limwi, alimwi babaa lukkomano. Sena mulumbe wamubbuku lya Inzila Yakujana Lukkomano Mumukwasyi tauli mulumbe mubotu wakutolela mikwasyi mucilawo canu mumweezi wa June? Ino mulimo oyu tuyooucita buti? Nkwiinda mukubabalila Jwi lya Leza, lyalo ilitondezya injiisyo zyabukkale buleta lukkomano mumukwasyi. Bukkale bwamukwasyi ncecintu bantu ncobabikkilide maanu. Amulisungule kusikila bantu amakani aajatikizya bukkale bwamukwasyi. Amuubandike cabusungu mulumbe oyu. Ino inga mwatalika buti?
3 Mulakonzya kutalika munzila eyi:
◼ “Ndili mukuswaya beenzuma kuti tubandike ambabo imakani aajatikizya ipenzi lyanyonganya bunji bwabantu munyika mazubaano. Ajatikizya lukkomano mumukwasyi. Toonse tuyanda kuti mukwasyi wesu kaukkomene, pele tulizyi kuti mikwasyi minji kwiina noikkomene cini-cini. Muyeeya kuti ncinzi cinga cagwasya bantu kujana lukkomano lunji mubukkale bwabo bwamumukwasyi? [Amulindile kwiingula.] Kuluulwa kuti ibantu banji balaa mapenzi muŋanda. Musyoma kuti ncinzi cinga cagwasya mikwasyi kusitikila alimwi akukkomana? [Amulindile kwiingula.] Sena mulazumina kuti inga cagwasya kuswiilila caamba Mulengi wamukwasyi? Wabikka malailile aayandika mu Bbaibbele. Injiisyo ezi zyabandikwa mubbuku eli lyakuti Inzila Yakujana Lukkomano Mumukwasyi. Amutondezye mitwe misyoonto iikkomanisya. Amuye kupeeji 10 akubala kaambo kamamanino mumuncali wa 17 kuyoosikila kumamanino kwamuncali wa 18. Amulisiye bbuku. Amupandulule kuti mulaa zintu zinji zyakubapandulwida alimwi mubabuzye ciindi nomunga muyooswaangana alimwi.
4 Naa mulakonzya kutalisya mubandi kwiinda mukwaamba penzi limwi, ambweni kwiinda mukwaamba kuti:
◼ “Nokuba kuti boonse bayanda kulimvwa kukkalwa myoyo, cilibonya kuti mikwasyi minji kwiina noyakonzya kubaa ciimo eci. Muyeeya kuti ncinzi cinga cabagwasya kujana lukkomano lwini-lwini? [Amulindile kwiingula.] Ikale-kale, Ibbaibbele lyakayubununa mapenzi ngotwakali kuzyoobaangawo mumikwasyi mazubaano. [Amubale 2 Timoteo 3:1-3.] Pele, Ibbaibbele alimwi lilayaambila mikwasyi ncoyeelede kucita kutegwa mapenzi aaya amane alimwi amboinga yajana lukkomano lutamani. Injiisyo zyalyo zilabandikwa mubbuku eli lya, Inzila Yakujana Lukkomano Mumukwasyi.” Mpoonya amutondezye kabbokesi kajisi mibuzyo yakwiinduluka kumamanino kwacaandaano ceelede, amubale, akulisiya bbuku.
5 Mwaakupilukila, mulakonzya kubaa mbaakani yakutalisya ciiyo ca Bbaibbele kwiinda mukwaamba kuti:
◼ “Ndayeeya ncomwakaamba kujatikizya makani aabukkale bwamumukwasyi, alimwi ndamuletela cimwi ncondisyoma kuti inga mwacikkomanina. [Amutondezye broshuwa ya Ncayanda, amuvwunune kupeeji 16, akubala mibuzyo iili cisambomwe iili aatala.] Cilibonya kuti umwi aumwi mumukwasyi ulaalubazu ndwayelede kucita kutegwa kube lukkomano mumukwasyi. Mumaminiti masyoonto buyo, andimutondezye mbomunga mwagwasigwa kapati amakani aaya.” Mpoonya amutalike kwiiya Ciiyo 8.
6 Naa mwakabandika zyambokuyandika kuswiilila ku Mulengi wamukwasyi nomwakaswaya lutaanzi, amuubusye mubandi alimwi kwiinda mukwaamba kuti:
◼ “Bamwi balimvwa kuti lulayo lwamu Bbaibbele talubeleki munyika mazubaano. Ino nywebo mulimvwa buti kumakani aaya? [Amulindile kwiingula.] Sena tamuzumini kuti ibbuku ilipa lulayo lwini-lwini lunga lwatujanya lukkomano mubukkale bwamukwasyi lilagwasya? [Amubaleke baambe.] Zintu zyalikuyeeyegwa akucitwa zijatikizya bukkale bwamumukwasyi zyacinca, aboobo izyacitika nzyotubona sunu nzibyaabi. Pele imikwasyi iitobela zyaamba Bbaibbele kanjikanji ilisitikide alimwi ilikkomene.” Amubale Ba-Kolose 3:18-21. Amupandulule kuti tukulwaizya bantu kubaa ciiyo ca Bbaibbele caaŋanda citabbadelwi.
7 Aino, ciindi nomukanana kubantu kujatikizya mapenzi aabuumi bwamumukwasyi, muyooyandika kucenjela. Amweelebe kucitya mwini ŋanda kulimvwa kuti mumuyeeyela kuti ulaamapenzi mumukwasyi wakwe. Inga cabota kutondezya kuti ipenzi ndyomubandika lijatikizya bantu boonse.
8 Tusyoma kuti mulazumina kuti ibbuku eli liyooigwasya kapati mikwasyi iili muzilawo zyesu. Elyo, nomusoleka kugwasya bamwi kuba basikwiiya, amuyeeye kugwasya mikwasyi yoonse mbwiizulwa. Amubagwasye kubona bubotu bwamulumbe wa Bwami kutegwa caantoomwe bakatole lubazu muzilongezyo zyakumbele. (Ciy. 21:4) Atulimwaye ibbuku lya Lukkomano Mumukwasyi ikutegwa bantu koonse-koonse bagwasigwe a Jwi lya Leza kubaa bulangizi bwabuumi butamani kumbele.—1 Tim. 6:19.