Elo Ncibotu Kaka Ikujanika Lyoonse!
1 Kwamakumi aamyaka aali mbwaabede, ibakwesu banji ku Eastern Europe bakali kukasigwa kuswaangana caantangalala. Amuyeeye buyo lukkomano ndobakabaalo mulawo uukasya nowakamana elyo nobakatalika kuswaangana kabaangulukide!
2 Mulangizi wabbazu umwi kaamba zyakuswaya kwakwe kumbungano imwi kubusena obo, wakalemba kuti: “Muli Bwabili imangolezya, kakucili kumatalikilo kwini kwakuswaya kwangu, muncini uupa kukasaala wakafwa. Anze cakali caanda, muŋanda kwakali kukasaala buyo kusikaa 5° C. Ibakwesu bakakkala kabasamide majansi aabo, milembo yamunsingo, zyakumaanza zikwabilila mpeyo, tunkepesi alimwi amabbusu aamumpeyo. Kwiina wakali kukonzya kutobelezya kulanga magwalo mu Bbaibbele, mbwaanga kwiina nokwakali kukonzyeka kuvwununa mapeeji. Kandiimvwi aacibumbili kandisamide buyo nsuti, ndakaandwa, alimwi nindakali kwambaula ndakali kubona muya wiile kuzwa. Pele cakandikkomanisya ncakuti kwiina wakatongooka naba umwi. Bakwesu boonse bakali kwiile kwaamba mbocakali kukkomanisya ambocakali cibotu ikujanika!” Bakwesu aabo kwiina anobakalombozya kuti anu nobatakajanika buyo amuswaangano oyo!
3 Sena Obo Mbotulimvwa Aswebo? Sena tulacikkomanina coolwe cakuswaangana katwaangulukide amiswaangano yesu yansondo ansondo? Naa ambweni tatwiibikkili maanu miswaangano zintu nozitali kabotu? Ikujanika lyoonse amiswaangano kulakonzya kukatazya, alimwi zimwi ziindi inga katulaa twaambo twini-twini twakutajanika. Pele, mutalubi kuti nkobali bamwi akati kesu ibanga banyina makani akucembaala, kuciswa-ciswa kapati, ikulemana, imilimo iitabapi ciindi cibotu alimwi amikuli iimbi ibabona kuyandika kwakujanika aamiswaangano elyo balajanika kanjikanji. Elo nzikozyanyo zibotu kaka ezi nzyotweelede kutobela!—Amweezyanisye Luka 2:37.
4 Acibe ciyanza cesu ikusumpula bukombi bwakasimpe kwiinda mukujanika amiswaangano yoonse ya Bunakristo, kutalikilaa kakamu kasyoonto kaciiyo cabbuku kusikila kumuswaangano mupati. Nkaambo nzi ncotweelede kukubikkila maanu kapati kujanika aamiswaangano eyi? Nkaambo mmulawo wakazwa kuli Leza wakuti tweelede kuswaangana. Pele nkotuli atumwi twaambo tupati ncotucitila boobo. Toonse tuyandika lugwasyo luboola kwiinda mukulaililwaa Leza alimwi alugwasyo lwamuuya uusalala, eezi zyoonse zijanwa kumiswaangano. (Mt. 18:20) Tulayumizigwa kwiinda mukukulwaizyanya notuyanzana abakwesu.—Heb. 10:24, 25.
5 Ciindi Jesu naakasanduka, Petro wakati, “Omwami, ncibotu katucikede ano.” (Lk. 9:33) Oobo mbotweelede kulimvwa aswebo kujatikizya miswaangano yoonse ya Bunakristo. Ncobeni, ncibotu kaka ikujanika lyoonse!