Ipulogilamu Impya Yakuyaka Maanda aa Bwami
1 Masimpe Jehova uli mukuzuzikizya cisyomezyo cakwe cakuyiisya basiŋanda bakwe akubeenzya munzila zyakwe. (Is. 54:13) Kuzwa kumatalikilo ubikkide bubambe bwakukomba calukamantano bwalo ibubikkilizyaa kupa malailile aayandika kapati. (Dt. 31:12, 13; Neh. 8:1-8; Int. 122:1) Eci cabagwasya kapati bantu bakwe basyomeka. Kwiinda mukutobela lulayo lwakwe cabusungu, bacikonzya kuzumanana kabaandeene anyika pele kabayanzene kapati abakombinyina. (Kul. 34:11-16; 2 Kor. 6:14-18) Ikapati mumazubaano aamamanino tulaililwa kunikuswaangana lyoonse, ikutegwa tutayiisigwi buyo a Jehova, pele akuti tutole lubazu mukuyumizyanya akubusyanya-busyanya umwi amweenzinyina kuluyando akucitilana milimo mibotu.—Rom. 1:11, 12; Heb. 10:23-25.
2 Kuzwa mumwaanda wamyaka wakusaanguna kusikila lino Banakristo balaswaangana kuti bakombe mumaandaabo alimwi amumasena aakubuleya. (Inc. 2:42, 46; 12:12) Pele kapati kuzwa mu 1935, nokwakaambilizigwa kuti busena bwakuswaanganina bupya ibwakali kuyakwa ku Hawaii bwakali kuyooitwa kuti ni Ŋanda ya Bwami, imbungano zya Bakamboni ba Jehova koonse-koonse basoleka kujana busena bwabo bwakukombela bubageme alimwi babwiita azina eeli ndilyonya. Kuli Bakamboni ba Jehova, Ŋanda ya Bwami njeŋanda iilemekwa kwiinda mumunzi. Mpaacitilwa bukombi bwakasimpe alimwi ngomusemu wamilimo yateokrasi yoonse mumunzi. Iŋanda eyi ipa bumboni bwakuti makani mabotu aa Bwami alakambaukwa kubusena nkoibede. Mbusena ibukatalusya cini-cini munzila yakumuuya alimwi ikujanwa malailile kuli baabo boonse balaa cilakalaka cacilyo cakumuuya.—Mt. 5:3.
3 Ikuvwula kwabantu cakufwambaana kwacitya kuti kuyandike maandaa bwami: Imalipooti aazwa mumuunda atondezya kuti Jehova wazumanana ‘kuufwambya’ mulimo wakuyobolola bantu, mamanino aabweende bwazintu buno aalo mbwaafwambaanina kuswena afwaafwi. Cacitika ncobeni mbubwena mbuli mbwaakaamba kwiinda mumusinsimi Isaya kuti “kakamu kaniini kayooba cuulu, abantu bace bayooba mukowa mupati.” (Is. 60:22) Mucikozyanyo, mumwaka wamulimo wa 1987 cisi ca Zambia cakalaa mweelwe waatala wabasikumwaya ibali 67,144. Kwiinde buyo myaka iili 10 imweelwe wakavwula akuba 96,686, icaamba kuti kwakaba basikumwaya bapya ibali 29,542. Ikuvwula oku kugambya kwacitya kuti kuyandike myaanda yambungano zipya, eci caamba kuti alimwi kulayandika myaanda ya Ŋanda zya Bwami.
4 Ikuyaka Ŋanda zya Bwami ziyandika: Imilimo mibotu itondezya lusyomo lubeleka. Mucikozyanyo, lusyomo lukulwaizya Banakristo kugwasya calubomba aabo ibayandika lugwasyo. (Jak. 2:14-17, 26) Ilusyomo luli boobo lwatondezyegwa munzila iilibedelede mukugwasilizya kuli mukucitwa kupulogilamu yalino yakuyaka Maanda aa Bwami alimwi amukusanga ku Society Kingdom Hall Fund. Nokuba kuti bali mukwaatikizigwa kapati abukkale bwabuzuba abuzuba, kubikkilizya akudula kapati kwamayake, Bakamboni ba Jehova mumasena oonse aanyika balitondezya kuti “[m]bantu . . . balisanga kumana milimo mibotu” kwiinda mukulisungula kubeleka alimwi akugwasilizya mukusanga mali aayandika mukuyaka Maanda aa Bwami aambi manji alimwi imabotu.—Tit. 2:14.
5 Ikusanga kucitwa lyoonse ku Society Kingdom Hall Fund kwagwasya mbungano iziyandika mayake aa Ŋanda zya Bwami cakufwambaana, ikapati ono muzisi zitasumpukide. Imalooni aatakatazyi kubbadela ono ali mukupegwa mbungano ziyandika lugwasyo. Aaya malooni mbwaabbadelelwa ambungano, imali alavwula, mpoona alabelesyegwa kugwasya mbungano zimbi. Mali aaya ono ayoobelesyegwa mukuyakwa kwa Maanda aa Bwami mapya aali 34 alimwi acilawo cipati comwe icikkwana mbungano izili 75, imwakuswaanganina lyamiswaangano muno mu Zambia. Cibalo eci nocaali kulembwa ikuyakwa kwa Maanda aa Bwami mapya aali 22 kwakali manide kale. Mumyaka yobile yainda imagwalo aayinda ku 60 aakubuzya zyamalooni atambulwa a Sosaiti.
6 Ikutegwa zyeelele kutambula lugwasyo lwamali, imbungano zyeelede kubaa pepa lyamumulawo ilyabumukamwini (legal title deed) kujatikizya busena aayooyakilwa. Cilayandika kapati kuti malailile aamulawo alimwi amizeezo iizwa ku Sosaiti itobelwe ciindi nomuyanda kujana pepa eli lyabumukamwini. Nomuunka ku Bbooma kuyoopa mapepa aakulembela zyanyika mpomuyooyakila, amubone kuti kuzwa kumatalikilo kwini mapepa aya alembedwe muzina lya Zambia Association of Jehovah’s Witnesses Registered Trustees, kamubelesezye namba YANU ya P.O. Box. Imbungano izilaa pepa lyabumukamwini muzina lyambungano yazyo zyeelede kubona kwaamba kuti zyaacinca, mazina aayo taazizilwe pe amfwulumende mukupegwa nyika. Kusikila sunu imbungano zyajana mapepa aaya aamumulawo aali 39. Ibaalu bambungano yomwe-yomwe iijisi mapepa aabumukamwini beelede kwaalanga-langa kabotu-kabotu mapepa aayo kutegwa bazyibe naa mapepa aayo alizumizidwe mumulawo. Ikuti kamuli kale a Ŋanda ya Bwami pele munyina pepa lyabumukamwini lyamumulawo, ibaalu bakulwaizigwa kuti balijane pepa elyo lyabusena obo cakufwambaana. Kwiinda mukucita boobo munookwabilila lubono lwambungano alimwi muyoojula mulyango wakupegwa lugwasyo lwamali kuzwa ku Sosaiti.
7 Nciindi cakufwambaanya mulimo: Mumyaka yainda calino-lino imulimo mupati wacitwa mukuyaka Maanda aa Bwami “aayakwa cakufwambaana.” Imakkomitii Yakuyaka Mucooko (Regional Building Committee[RBC]) mukubelekelaamwi aba Society’s Kingdom Hall Desk, akabambwa kutegwa agwasye baalu kujatikizya Maanda aa Bwami mapya, imayake aakubambulula, ikujana mapepa aabumukamwini aazumizidwe mumulawo alimwi akugwasilizya mbungano mukulembela lugwasyo lwamali kwiinda mu Sosaiti. Alagwasilizya kubona zintu ziyandika, naa ni Ŋanda mpya iiyandika naa kuyandika buyo kubambulula. Imbungano imwi aimwi ilijisi kkomitii nkoilembedwe naa ku Kingdom Hall Desk ikuti mubusena nkomuzwa kakunyina RBC. Imbungano noziyanda kuyaka mayake, baalu banyenzi beelede kuzyibya sicuuno wakkomitii yakuyaka kumatalikilo nkweena.
8 Imakkomitii aa Kuyaka Mucooko apegwa malailile kuzwa ku Sosaiti alimwi acitondezyo cambwaayelede kuyakwa Maanda aa Bwami aataduli aayendelanaa nzila yakuyaka iifwambaana. Ibubotu bwanzila eyi impya yakuyaka mbwakuti kuyooyakwa mayake mabotu muciindi cisyoonto buyo. Eci ciyoogwasya mbungano zijatikizidwe kupilukila kumulimo wamumuunda cakufwambaana.
9 Icitondezyo cakuti muuya uusalala wa Jehova ulabeendelezya bakwesu abacizi ibabeleka mulimo wakuyaka Maanda aa Bwami capa bukamboni bubotu kubantu bakunze. Umwi muntu uubeleka mu Bbooma wakagambwa naakali kweebelela Ŋanda ya Bwami imwi yakayakwa cakufwambaana noyakali kuyaabumana. Wakabona bakwesu abacizi, basyoonto abapati, kababeleka caantoomwe, kabavwelenganya akutila samende, ikuyaka bwaanda bwazidina, ikubikka zijazyo, impulungwido, kubotya lubuwa akupenta. Ŋanda eyi noyakamana, wakati: “Swebo tobabbooma notwakalizyi kuti nywebo nobantu mulakonzya kuyaka kabotu boobu, notwakamupa nyika iili mukati mwini mudolopo.”
10 Basikugwasilizya Balisungwide: Sikulisungula muntu uuli buti? Muntu uulyaaba kumulimo kwiinda mukulisalila lwakwe mwini. Aabo ibagwasilizya mumayake aa Maanda aa Bwami balacita obo cakulisungula alimwi kakunyina kubbadelwa kumulimo ngobacita. Mbwaanga Mbanakristo eci ncitondezyo caluyando lwabunyina boonse. Ooyu muuya wakulisungula ncitondezyo cibotu kapati caluyando lwabunyina, mbwaanga mulimo oyu ucitya kuti basiye mbungano zyabo amikwasyi. Ikujatikizya Jesu iwakabikkwa acuuno cabwami ibbuku lya Intembauzyo 110:3 lyaamba kuti: “Bantu bako balabungana camoyo woonse azilundu zisalala mubuzuba bwalumamba lwako,” alimwi eci cazuzikizigwa ikutali buyo mumulimo wakukambaka akugwasya bamwi kuba basikwiiya pele amumilimo yamayake. Aino, muli zeezi zyoonse tusyoma Jehova kuti ulalongezya bubambe boonse. Mbubwena mbuli Intembauzyo 127:1 mboyaamba kuti: “Naatali Jehova uuyaka iŋanda, milimo yabayaki njabuyo.”
11 Aimbi Myaanda Yabasikulisungula Balayandika: Sena mulakonzya kubelesyegwa? Imakkomitii aamuzyooko ayanda kubelesya bakwesu bazyi milimo ibali mumbungano ibayooswaangana mu Ŋanda ya Bwami impya naa iibambulwidwe. Alimwi balabeleka abakwesu bambi, ikapati baalu alimwi abakutausi, kuti babayiisye. Aabo ibajana luzibo luyandika beelede kukulwaizigwaa luyando kuyanda kugwasilizya mukuyaka Maanda aa Bwami aambungano zimbi. Aabo ibayanzana aambungano izili mukuyaka Maanda aa Bwami beelede kutondezya muuya wakuyanda kugwasya, ikutali kulangila kuti bamwi bayooilanganya milimo yoonse ya Ŋanda ya Bwami yabo.—Neh. 4:6b; 5:19; Flp. 2:3, 4.
12 Babelesi bazwa mumasena aakule: Bakwesu bamwi babelesya zyakweendela zyabuleya alimwi baleenda kwamawoola manji kabajisi azibelesyo zyabo alimwi basika aamasena aayakilwa kabalibambilide kubeleka. Imulimo noutola mazuba aali mbwaabede kuti umane, bakwesu aaba balapegwa aakoona amikwasyi minyenzi. Izyakulya izikasaala alimwi ziyaka mubili zilapegwa kuli basikulisungula boonse ibabelekelaa mayake. Basimakkomitii aakuuyaka bamwi mane bacita bubambe bwakujana cakweendela, mbuli mootokala wakuleta bakwesu ibaizyi milimo imwi kubusena bwamayake.—Rom. 12:10; Heb. 13:1.
13 Mbaani ibanga balisungula: Basikumwaya babbapatizidwe ibazyi milimo iiyelede alimwi ibalaabwiime bubotu mumbungano bakulwaizigwa kugwasya. Ibaalu a bakutausi, ibazyi milimo yamayake nobaba aabo ibatazyi boonse balayandika. Imapepa aakulembela kugwasilizya alakonzya kujanwa kumulangizi weendelezya naa mulembi. Aapepa lyakulembela amutondezye bulamfwu bwaciindi ncomwabeleka mulimo oyo mbuli kuyaka kwakubelesya zidina, kubikka mipaipi, imagesi naa mulimo uumbi, mbuli kubamba zyakulya, kukwabilila ntenda, mwakubweza zintu zibelesyegwa, zyamaakkaunti, drafting naa ikweendelezya mapepa aamulawo azimwi-zimwi. Ikulisungula munzila eyi ncitondezyo caluyando lwesu kuli basimukoboma beni-beni—ibakwesu Banakristo. (Mt. 7:12; 22:39; Joh. 13:35) Imbungano imwi aimwi yakapegwa mapepa obile, mapepa aaya alizumizidwe kukkopololwa kumincini iicita boobo. Ikuti mbungano kaiyanda mapepa manji aakulembela, alakonzya kujanwa kuzwa ku Kkomitii Yakuyaka Mucooko, naa ku Sosaiti, kwiinda mukubalembela kuti, attention: Kingdom Hall Desk.
14 Basikulisungula Balalumbwa: Nokwakamana kuyakwa Ŋanda ya Bwami imwi, baalu bakalemba kuti: “Ikakamu ka Baalu ambungano zyoonse mukkomponi yesu; imyoyo yesu izwide lukkomano, aboobo toonse twabula acakwaamba mukutondezya kulumba kwesu kumulimo wamayake. Kuzwa ciindi ikakamu kabasikuyaka nokakasika aabusena, imuuya wakulyaaba akati kabakwesu abacizi kubikkilizya abana, wakalitondezya kwiinda mukugwasilizya aumwi mpagolela mukuyaka. Ikuyaka kwakufwambaana kwakabagambya boonse bakali kulangilila, cakuti kusikila sunu imayake aa Ŋanda ya Bwami acili ngamakani aadumide kubantu bakunze alimwi abakwesu.”
15 Imuuya wakulyaaba abusungu bwabakwesu ulalibonya, mbubwena mbuli kakamu kamwi mbokakalemba kuti: “Cakali kukkomanisya kapati ikubona bakwesu abacizi kuzwa mumbungano zibelesya myaambo iisiyene-siyene kabaswaangene mukubelekelaamwi mukukomba Jehova calukamantano!”
16 Sikulangilila uutali kamboni naakabona bantu banji kababelekelaamwi wakakankamuka ulaamba, “Leza ulaandinywe nobantu nywebo!”
17 Iziyandika ono: Imbungano zimwi ono kwainda myaka iili mbwiibede kazisoleka kuyaka maanda aazyo alimwi akaambo kakukatazya kwamali, bakakilwa kwaamanizya. Imbungano zimwi zinyina luzibo lwakubelesya mukuyaka Ŋanda ya Bwami. Mumasenaamwi ŋanda yomwe ibelesegwaa mbungano zinji mane kusikila kumbungano zili fwuka. Imaanda aakaindi inga taaceeleli kweelana amayake aasunu. Imbungano zisyoonto ziswaanganina mumaanda aakutelela, mbuli masena aakubuleya amuzikolo. Muciimo eci, izintu zyoonse izibelesyegwa zyilalonzyegwa coonse ciindi, iziyandika kubikkwa lyamuswaangano umwi aumwi akulongelwa wamana muswaangano. Zimwi ziindi masena aaya inga alizekawidwe mukati naa aanze kujatikizya kusekelela kwabantu bakunze. Kanjikanji imaanda aakutelela inga ali mumasena zikombelo zimbi moziswaanganina azyalo aciindi ncimunya alimwi kuyobeka kwabo kulatunyonganya mubukombi bwesu. Alimwi, ibantu inga mbungano baibona kuti taikookkala kwaciindi cilamfwu pe, alimwi eci cicitya kuti itakomeni. Imaanda aaya amwi ali mumasena mutasalazigwi kabotu, cileta malwazi alimwi zimwi ziindi antenda. Eezi zyoonse zicitya kuti kutabi kuyaambele mubusena obo.
18 Imbungano zyoonse iziyanda Ŋanda ya Bwami zyakulwaizigwa kusungwaala kuyandaula nyika aakuyooyakila. Inyika yajanwa mweelede kujana ipepa lyabumukamwini lyamumulawo ilyeelede ikujatikizya nyika eyo. Mweelede kuzumanana, impindu nzyomunga mwajana tazikonzyi kweelanisigwaa mulimo ngomutikabeleke kujana ncomuyanda. Amuyeeye kuti Jehova ulakulongezya kusoleka kwababelesi bakwe. Ikuti kakunyina kusoleka kwiina cilongezyo.—Amweezyanisye 2 Bami 13:15-19.
19 Ikutondezya kulumba: Imbungano imwi ku Western Province yakali kuswaanganina mukkilasi kucikolo cimwi cakupulaimali kabasyaanikizyanya. Bakali kukkala aatuuno tuniini aakkala bana, kwamyaka iili mbwiibede. Sikumwaya umwi wakati: “Camyoyo yesu yoonse, twamulumba. Ibantu mucilawo cesu baligambidwe cini-cini kubona ncobali mukucita Bakamboni ba Jehova. Icintu cikkomanisya ncakuti balimukulumbaizya Jehova. Bamwi bali mukujanika kumiswaangano kuzyooswiilila; bamwi baboola buyo kuzyoobona Ŋanda ya Bwami iyakayakwa mumvwiki yomwe buyo.”
20 Ikaambo kakonzyenye akaaka kakaambwa a mwaalu, iwakayungizya kuti: “Ibantu kuno baciluula zya Ŋanda ya Bwami yakayakwa cakufwambaana alimwi bali mukuboola kumiswaangano yesu cakuti ibantu bajanika aamiswaangano bavwula cini-cini.”
21 Imbungano imwi ku Southern Province yakalemba kuti: “Ono mbwaanga tulaa Ŋanda ya Bwami ini-ini ibantu bajanika aamiswaangano bayungizigwa kutandila ziindi zyobile. Ibantu balayandisisya kuunka kubusena bulondosi, busalala kuyookomba.”
22 Aimbi ikkomitii yamayake yakalemba kuti: “Tuyanda kumuzyibya kulumba kwesu kwamoyo woonse kububambe bubotu cini-cini ibwakabambwa aba Sosaiti kutugwasya kumanizya mulimo wesu wakuyaka Ŋanda ya Bwami mpya. Cilakkomanisya kubona kuti ŋanda yesu mpya yatalika kale kukambauka mubusena buno. Mucikozyanyo, umwi wakali kwiinda wakakkomana kapati naakaibona cakuti wakatambula bbuku lya Luzibo akutalika kwiiya.”
23 Imajwi aakulumba kuzwa kumucizi wesu umwi: “Ndakabala zya Bakwesu mumasena amwi aanyika kabayaka Maanda aa Bwami akwaamanizya mumazuba obile naa mumvwiki yomwe buyo, pele ono cilacitika akati kesu, elo cakandikkomanisya cini-cini. Elyo ndilumba Muzike Musyomesi a Kabunga Keendelezya mukutalisya ipulogilamu yakuyaka iili boobu akwiizumizya amwalo mucisi cesu ca Zambia.”
24 Mbotulangila zyakumbele, tulalomba lyoonse kuti Jehova azumanane kutulongezya mupulogilamu eyi yakuyaka Maanda aa Bwami. Kwiinda mukugwasilizya kwesu kwamoyo woonse, tulakonzya kutondezya kulumba kwesu ku Ŋanda ya Bwami alimwi alubazu ndoijisi mukutugwasya kukulwaizyanya alimwi ‘amukubusyanya-busyanya mukuyandana akucita milimo mibotu.’ (Heb. 10:24, 25) Eci cijatikizya kwiibamba kabotu akwiilanganya cakusyomeka Ŋanda yesu ya Bwami alimwi akugwasya bamwi, mumulimo wakulisungula alimwi akugwasilizya ikumbi nkotukonzya. Aboobo mumakani aaya toonse atukanze ‘tutalengaani mukucita kabotu, nkaambo kuciindi ceelede tuyootebula, twatafunuka.’—Gal. 6:9.
Cifwanikiso icili apeeji 3]
Chawama, Lusaka
Cifwanikiso icili apeeji 3]
Chunga, Lusaka
Cifwanikiso icili apeeji 4]
Ijisi mpulungwido zyamagilazi
Cifwanikiso icili apeeji 4]
Ijisi mpilungwido zyamapulanga
Cifwanikiso icili apeeji 5]
Cibumbili aabbazu
Cifwanikiso icili apeeji 5]
Mujulu mwaciluli mocili mukati imunyina civwumbilila
Cifwanikiso icili apeeji 5]
Mujulu mwaciluli mocili mukati imuvwumbidwe
Cifwanikiso icili apeeji 6]
Emmasdale, Lusaka
Cifwanikiso icili apeeji 6]
Addis Ababa, Lusaka